Tomo 6, apéndice 45. Concordia Raimundi Gaufredi episc. Ausonensis cum canonicis eiusdem ecclesiae,

XLV. 

Concordia Raimundi Gaufredi episc. Ausonensis cum canonicis eiusdem ecclesiae, incerto anno. (V. pág. 226.) 

Ex autogr. in arch. eccl. Vicensis. 

Quoniam Christi ecclesia in hoc erumnoso solo posita, cotidianis peccatis hominum exigentibus, saevissimis sepe quatitur procellis, necessarium est et perutile, ut assiduis protegatur et muniatur fidelium orationibus et auxiliis. Quapropter ego Raimundus Dei gratiâ Ausonensis ecclesiae episcopus, providens utilitati ecclesiae Dei, quam a Deo regendam, licet indignus, suscepi, convenio Omnipotenti Deo et beato Petro Apostolorum principi, et fratribus meis Vicensis ecclesiae canonicis, quod ab hodierno die et deinceps fidelis sim de thesauris ipsius ecclesiae, et de omni honore canonicae prefatae ecclesiae, quem modo habet vel habere debet, vel in antea Deo dante adquisitura est, et de vita et corporibus clericorum canonicorum, et de omnibus honoribus eorum, ipsos et omnes res eorum defendendo contra cunctos homines vel feminas, eorum velle et consilio. Hoc insuper adiciens, quod si me aliquando huius ecclesiae prelationes, videlicet, archidiachonatum, sacristaniam, oapitiscoliam, stabilire contigerit, non eas diminuam, sed integre et canonice, sanioris partis consilio ipsius capituli, eas stabiliam. Quapropter obedientiam et humilitatem sectando, ego Gerallus archilevita, et Berengarius sacricustos, et Petrus primicherius, coeterique istius ecclesiae canonici convenimus Deo et beato Petro Apostolo, et tibi Raimunde Ausonensis sedis episcope, quod ab hodierna die et deinceps fideles simus de thesauris praefatae ecclesiae, et de omni honore canonicae, quem modo habet vel habere debet, vel in antea Deo dante adquisitura est, et de vita et corpore tuo et membris, sive de omni honore, quem modo habes vel habere debes, vel in antea Deo dante et nostro consilio adquisiturus es, te, et omnes res tuas defendendo, sicut boni filii facere debent atque fideles. Et nos omnes pariter episcopus, videlicet, atque canonici convenimus, quod si aliqua discordia vel propter honorem vel propter sermonem sive aliquam occasionem inter episcopum et clericos, vel inter clericum et clericum instigaste diabolo supervenerit, consilio et laudamento vel iudicio illorum IIII.or, qui electi sunt vel fuerint, in capítulo coram fratribus terminetur, et diffiniatur, absque appellatione alterius capituli, vel sine intromissione aut acclamacione alicuius laicalis personae. Hoc adiungendo ut nullus hanc fraternitatem nostram, idest, canonicum fieri, adipisci possit, qui istam convenientiam, sicut nos, non laudaverit et firmaverit, nisi aetas vel stultitia illum impedierit. Quicumque vero ab hac convenientia superius scripta ingenio vel superbiâ se substraxerit, si episcopus sit, careat obedientia, amore, dilectione, et servitio omnium canonicorum: si vero canonicus fuerit, canonicali beneficio privetur, et neque episcopus neque canonicus sibi in aliquo solatium fraternitatis, beneficium amoris exibeat vel impendat. = + Raimundus Dei gratiâ Ausonensis episcopus. = Berengarius sacrista, qui hoc confirmo +. = G. scriptis favet archidiachonus istis +. = Guillermus sacerdos subscribo. = Berengarius sacriscrinius. = Hoc ea quae laudat Guillermus carmine firmat +. = R. Bertrandus levita. = Berengarius levita subsc. = Petrus Berengarii levita. = Sig+num Guillermi de Solario. = Berengarius levita +. = Berengarius diaconus +. = Bernardus sacerdos + = Iohannes Bachonis + atque levita. = Arnallus sacerdos subscribo. = Guillermus prior qui hoc firmo +. = Petrus levita subscribo. = Petrus adest scriptor confirmans scripta fidelis +. 

Tomo 6, apéndice 44. Absolutio ab excommunicationis sententia, anno MCVIII (1108)

XLIV. 

Absolutio ab excommunicationis sententia, anno MCVIII (1108) (V. pág. 225.) 

Ex autogr. in arch. eccl. Vicens. n. 338. 

Notum sit omnibus hominibus, tam praesentibus quam futuris, quomodo ego Ugoni, proli Dalmadi, et coniux mea nomine Ermessendis, donavimus et tradimus in potestate Dei et Sancti Petri sedis Vici ipso closet, qui est ante ostium de ipsa mansione de Sancti Petri iam dicti, cum ipso espinalb, qui unam (f. uvam) vitis sustinet, vel ipsos chesals, qui sunt in circuitu. Hoc totum donamus et emendamus per ipsa eschomunione, quae ego Ugoni fuerit pro ipsa ecclesia de Rosdors, quae ego fuit apud Bermundi Aiandrici afingere, unde erit descomunicati: propter hoc facio ipsa emendatione, et remedium animarum nostrarum vel parentorum nostrorum, qui fuerunt ante nos, et venerint post nos. Et ego domnus Arnallus gratiâ Dei Ausonensis episcopus cum eius kannonica, solvimus de ista eschomunione de ipsum sacrilegium, et habeatis partem in totam nostram commemorationem, vel in nostris orationibus. Et qui ista emendatione infringere voluerit, descomunicatus erit, et cum luda Eschariocis (Judas Iscariote) abligatus erit in profundum in infernum. Actum est hoc XII. Kalendas Iunii, annos XLVIII. regnanti Philipi regi. = Sig+num Ugoni Dalmadi. = Sig+num Ermessen uxor mea, nos qui ista emendatione fecimus scribere, et manus nostras firmamus, et testes firmareque rogamus. = Sig+num Arnad sac. procuratori. = Sig+num Pere Ramon. = Sig+num Guillermus Ponç. = Ermengaudus levita qui scripsit die et anno quo + supra. 

Tomo 6, apéndice 43. Decretum Arnalli episc. Ausonensis super ecclesia de Manlleu, anno MCV (1105).

XLIII. 

Decretum Arnalli episc. Ausonensis super ecclesia de Manlleu, anno MCV (1105). 

(V. pág. 224.) 

Ex arch. episc. Vicens. tom. 4. n. 38. 

Regnante Domino nostro Ihesu Christo in perpetuum. Ego Arnallus Dei nutu praesul Ausonensis ecclesiae, cum assensu canonicorum eiusdem sedis Sancti Petri supterius annotatorum, vobis clericis Sanctae Mariae de Mauseolo, praesentibus et futuris, secundum regulam Beati Agustini canonice Deo militantibus in eadem ecclesia, hanc perhenniter facimus libertatem. Quoniam in credita nobis ecclesiarum cura solerti studio nos semper condecet vigilare, consultissimum officii nostri speramus remedium provenire, dum pro utilitatibus ecclesiae, quae debent observari, nostrâ auctoritate iuxta canonum statuta sancimus. Ideoque praesenti firm... mus, ut quicquid in praesentiarum memorata habet ecclesia, vel in perpetuum per Dei gratiam iuste adquisierit, secure ac quiete... possideat inquietudine. Nulli ecclesiasticâ dignitate fulto, neque seculari potestate utriusque sexus erecto liceat de rebus eiusdem ecclesiae aliquid auferre ad dampnum illius, neque ut ullus ibi amplius subrogetur capellanus, sed secundum electionem san(ioris partis) fratrum ibi degentium eiusdem loci ibi prior sublimetur. Si vero quislibet ibi dignus huic officio repertus non fuerit, cuiuslibet loci huic ministerio congruum eligendi potestatem habeant. Quae electio, si regulariter facta fuerit, ab episcopo et eiusdem sedis clericis approbetur. Quod si eiusdem loci fratres hanc electionem secundum Deum statuere noluerint, sive ignoraverint, episcopi electione seu aliorum canonicorum secundum canonicalem regulam ibidem prior praeponatur, qui episcopo et eiusdem sedis clericis secundum Deum obediens existat, et observet cerimonias eius iuxta canonum instituta. Et ecclesiae praetaxatae non prohibeatur divinum officium praeter culpam canonicorum ibi degentium, nisi forte coeterae canonicales ecclesiae per episcopatium vel monasteria propter aliquod piaculum a pontífice vel a clericis sepedictae sedis fuerint interdicta. Laycis ab hac immunitate divini cultus prohibitis, si rebelles extiterint, quod absit, canonicis institutis a sede propensius divulgatis. Si quis autem huius nostri decreti violator extiterit, donec resipiscat, et ecclesiae illi vel canonicis eius satisfaciat, anatematis gladio feriatur, et cum Iuda traditore loris igneis averni perpetim comburatur. Sinodales insuper redditus et ebdomades, et coetera quae reddere solet nostrae sedi, retinemus ad opus eiusdem sedis Sancti Petri. Factum est decretum anno dominicae Incarnationis M.C.V., regis Philippi XLVII. = Bernardus archiepiscopus Toletanae sedis, et sanctae Romanae ecclesiae legatus subscribo. = + Arnallus gratiâ Dei Ausonensis episcopus. = Ego Boso cardinalis subscribo. = Bernardus archidiachonus subscribo. = Berengarius iudex atque sacrista +. = Berengarius Eriballi, canonicus Sancti Petri +. = Petrus Bernardi subscribo. = Guillermus Bernardi, clericus Roturensis subsc. = Berengarius paraphonista hic adsunt sua scripta +. = Raimundus caput scolae +. = Ut res monstravit + sic Poncius ista notavit.