Gaucelm Faidit.
Moutas sazos es hom plus volontos
De so don mals e dans li deu venir
Que de son ben, e vuelh o per me dir,
Car ieu meteys m' anei metre cochos
En tal poder, don era m vau planhen,
Que m fai languir e sospirar soven,
E, quant ieu cug be n' aver, ieu n' ai dan,
E torn atras quan cug anar enan.
Be m' an trahit siey belh huelh amoros
E sos gens cors que s sap tan gen garnir,
Sos doutz parlars ab son bel aculhir,
Sos gais solatz, sos avinens respos;
Mala vi anc sa gran beutat valen,
Don miels cugei aver mon cor jauzen;
Mas era vau planhen e sospiran,
E no m' i val merces, quan la deman.
Anc no cugei qu'en nulha dona fos
Tan grans beutatz qu'en fos merces a dir,
C'on plus li clam merce, no m denh auzir,
Ans n' a son cor ades plus ergulhos,
Per que mos malz me vai ades creissen,
Et es mi piegz, si m sal Dieus, per un cen,
Per lieys, car re n' y a de malestan
Que per lo mal qu' ieu n' ai, ni per l' afan.
Lo mals qu' ieu trac me fora belhs e bos,
Belha dona, sol qu' el pogues sofrir;
Car ses afan no s pot hom enriquir
De nulh afar que sia cabalos;
E so que hom conquer ab gran turmen,
Ten hom plus car e plus celat e gen,
Que so que a tot jorn a son talan,
Car leu despen qui de leu a gazan.
De so don plus cugei esser joyos
Suy plus iratz, e n' ai mais de cossir;
Per qu' om no s deu per gaug trop esjauzir,
Ni per ira trop esser angoissos:
Mas ieu non puesc ges esser d' aital sen;
Qu' ieu m' alegrei trop al comensamen,
Dona, per vos, mas ara 'n vau ploran
Cum hom marrit que re no sap on s' an.
S'a ma dona plaguesson mas chansos
Ni mos preiars, mout m' estera plus gen;
Car ja enans non aurai bon talen
De nulha re, ni puesc far belh semblan,
Tro que de lieys aya so que deman.
___
Razon e mandamen
Ai de lieys, on m' aten
De far guaya chanso;
Doncx, pus ilh m' en somo,
Ben cove derenan
Qu' ieu m' alegr' en chantan
Mielhs que far no solia;
Qu' eras conosc e sai
Que mos enans li plai;
Qu'en franca senhoria
Ai mes mon cor e me;
Pero tanh e cove,
Pus que senher fai be
A son bon servidor,
Que s' en melhur' e cresca sa valor.
Qui don de senhor pren,
Non es ges avinen
Qu'el fassa mespreizo
Vas lui, ses ochaizo;
Ni non es benestan,
Si pueys li quier son dan
Ni so que non deuria:
E pus dona tan fai
Qu'a son amic s' atrai,
E l' us en l' autre fia,
Non sai don pueys lur ve
Que l' us l' autre malme;
Mas tan sai ieu e cre
Que celh a mais d' amor
Que mielhs ama, e rete mais d' onor.
En aisso fan non sen
Li drut, mon escien;
E qui 'n jutja razo
Es anta senes pro;
Qu' ades on mais auran
D'amor, miels preyaran
Sai e lai quascun dia;
E, per aquest assai,
Bayssa amor e deschai
E leials drudaria;
Quar, per un que s capte
Vas amor e vas se
Leialmen, ni rete
D' aquestz aips lo melhor,
En veiretz mainz que l' an per sordeyor.
Drutz qu' ama falsamen
Deu, per dreg jutjamen,
Aver fals guizardo;
Mas a vos m' enrazo,
Bona domna, d' aitan
Qu'en mi non a engan
Contra vos ni bauzia;
E si m donavatz jai
Segon lo cor qu' ieu n' ai,
Ja res pus no us querria;
Que d' aitan bona fe
Cum anc hom amet re,
Vos am, e no m recre
Per mal ni per dolor,
Tan vos ai cor de leial amador!
Domna, lo cor e 'l sen
E 'ls huels e 'l pessamen
Ai en vostra preizo,
E non truep guerizo
Mas solamen d' aitan,
Quan vos estau denan,
Adoncs me par qu' ieu sia
L' om el mon cui miels vai;
E, quan me part de lai,
Ven m' ira e feunia
Que m lassa 'l cor e m te:
Mas pueis, quan mi sove
De vos, cui jois mante,
Oblit l' ira maior,
E torn mon cor en joi et en doussor.
Belhs Desirs, mout mi plai
Del vostre gent cors gai,
Quar pueia quascun dia
En honor et en be,
Que quascus hom que us ve
Vos enans' e us mante,
Que de gaug e d' amor
Son vostre dig, e 'l fach son de lauzor.
___
Tot me cugiei de chanson far soffrir
Er ab l' ivern tro ves calenda maya;
Mas era vei que no m' en puesc giquir
Per ma razo que tot jorn es pus gaya,
E per joy qu' ai de mon Plus Avinen
E de son pretz qu' ades puei' e s' enansa;
Qu' ara sai ieu e conosc ses duptansa,
Que deu esser plus gaia ma chansos
Quar vol ni'l platz que sos belhs noms hi fos.
Ves ma domna soplei totas sazos
Que m nafret gen el cor, ses colp de lansa,
D'un dous esgart, ab sos huelhs amoros,
Lo jorn que m det sa joia e sa coinhtansa;
Aquel esgartz m' intret tan dolsamen
Al cor que tot lo m reven e m' apaya,
Et ab sos huelhs m' a fait cortesa playa;
Ilh m' en saup pueis cortezamen guarir,
Per que lo y dei conoisser e grazir.
En amor son fermat tuit mei cossir,
Si qu'en ren al no ai poder qu' els retraia,
Qu' ieu no sui faitz mas per far e per dir
Mi dons tot so que 'l sia bon ni 'l playa;
Qu'ades l' acli e grans merces li ren,
Ab bona fe et ab humil semblansa,
E grazic li lo joy e l' alegransa
Que m det tam ferm que no romp ni descos;
Per qu' ieu estauc alegres e joyos.
Nulhs hom no pot, ses amor, far que pros,
Si no i enten o no i a sa esperansa,
Qu'el joys d' amor es tan fis e tan bos,
Qu' encontra lieys non es mais benenansa;
Que per amor ten hom son cor plus gen,
Si 'n val hom mais e n' esfors' e n' assaya
D'aver bon pretz e de valor veraya;
Si 'n vol hom mais cavalcar e garnir
E far que pros e donar e servir.
Ja ma dona non cuig de lieys me vir
Ni altr' amors ja li m tolha ni m' aya,
C'on plus esgart autra domna ni mir
Non ai poder que ja de lieys m' estraya;
Per merce 'l clam e per essenhamen,
Aia de mi cossir et remenbransa,
E quar no m ve no s' o tenh' a pezensa (pezansa);
Qu' ieu n' estau tan pessius e cossiros
Qu'ades hi tenh los huelhs del cor amdos.
___
Chant e deport, joy, domney e solatz,
Ensenhamen, largueza e cortezia,
Honor e pretz e leyal drudaria
An si baissat engans e malvestatz
Qu'a pauc d' ira no m suy desesperatz;
Car, entre cent domnas e preyadors,
Non a una ni us que be s captenha
De ben amar, qu' a doas partz no s fenha,
Ni sapcha dir qu' es devengud' amors;
Gardatz cum es abayssada valors!
Quar drutz hi a e domnas, si 'n parlatz,
Que s fenheran e diran tota via
Que 'l son leyal et amon ses bauzia;
E pueys quascus es cubertz e celatz,
E tricharan say e lay, vas totz latz;
E las domnas, on plus an preyadors,
On plus cuian qu' om a pretz lur o tenha.
Mas aitals joys, cum cove, lur en venha;
Qu'a cascuna es anta e deshonors,
Pus a un drutz, que pueys desrey' alhors.
Aissi cum es miels en domna beutatz,
Gens acuillirs et avinens coindia,
E gens parlars, pretz e doussa paria,
Aissi deu miels gardar sas voluntatz;
Que ren no val cors de doas meitatz
Ni non es fis, pueys hi a vaira colors,
Quar una amors sola tanh la destrenha:
Non dic ieu ges qu' a domna descovenha,
S' om la preia, ni a entendedors,
Mas non deu ges en dos luecs far secors.
Tan quan renhet leyalmen amistatz,
Fo lo segles bos e ses vilania;
E pus amors tornet en leujaria,
Fo joys cazutz e jovens abayssatz;
Per qu' ieu meteys, si dir vuelh las vertatz,
Ai tant apres dels fais drutz trichadors
Que non es dregz que jamais en revenha,
Quar ves amor dis anc falsa entresenha,
Cum si m' agues mal faich, fugi de cors,
Quan m' ac levat et enansat e sors.
E s' il plagues qu' ab bels plazers honratz
Mi retengues en leyal senhoria,
E s' afranques, pus en als s' umilia,
E m perdones, aisi for' afinatz
Ves lieys, cum l' aurs s' afina en la fornatz;
E no m nogues paratges ni ricors,
Quar si elha m tra del mal, ni far o denha,
Aissi 'l serai fis, ses falsa entresenha,
Cum fo 'l leos a 'N Golfier de las Tors,
Quan l' ac estort de sos guerriers peyors.
Ha! s' aquest tortz, domna, m fos perdonatz,
Passad' agra la mar part Lombardia;
Mas ges non puesc far leyal romavia,
Si en abans non era adrechuratz.
Sol per aisso devetz voler la patz,
E car merces es ab vos e ricors,
An ma chansos, e res non la retenha,
Preyar vas vos francamen que us sovenha
Que a franc cor tanh franqueza e doussors,
E Dieus perdona als bos perdonadors.
Na Maria, tant es la grans valors
Qu'en vos estai, bona domna, e renha,
Que m meravill que nuills cors la sostenha,
E quascun jorn creissetz als trobadors
Avinens faitz, don crescan las lauzors.
.jpg "Rambaud de Vaqueiras. Raimbaut. Ja non cugei vezer")