XXXIX. Donatio Archiepiscopi Tarraconensis ad monasterium de SS. Crucibus, an. MCLXXIII. (1173)

XXXIX.

Donatio Archiepiscopi Tarraconensis ad monasterium de SS. Crucibus, an. MCLXXIII. (1173) (Vid. pág. 137.)

Ex arch. eiusdem monast.

Et praesentis vitae conferre subsidium, et eternae salutis spectare cernitur praemium quod piis et religiosis collegiis Divini Numinis intuitu fuerit erogatum. Quapropter ego Guillermus Dei gratia Terrachonae Archiepiscopus, Apostolicae Sedis Legatus et universus Terrachonae ecclesiae conventus considerantes miserandas claustralium necessitates, et prout qualitas locorum indulget, eis consulere cupientes, donamus atque concedimus in perpetuum Deo et Beatae Mariae de Sanctis Crucibus, et tibi Petro Abbati, omnibusque successoribus tuis, necnon et fratribus ejusdem loci, tam praesentibus quam futuris, de territorio Terrachonae, in coctiano ad Sanctum Johannem de Consilio, tantum terrae quantum sufficiat plenarie ad quatuor juga boum per gauraitos veteres, sicuti continetur in carta donationis, quam inde fecerunt vobis quondam B. inclitae recordationis Terrachonae Archiepiscopus, et R. Comes Barchinonensis. Ita tamen praedictam donationem sive concessionem vobis facimus, ut de omnibus fructibus, qui ex laborationibus jam dictae terrae, ad quatuor juga boum vobis concessae, percepti fuerint, michi et conventui Terrachonae, nobis et post nos successoribus nostris in perpetuum vos et successores vestri duodecimam partem fideliter et cum integritate et sine aliquo impedimento tribuatis vel in garbis vel in grano, prout ego et Terrachonae conventus elegerimus, vel successores nostri elegerint; excepto una ferragenali in quo possit seminari unum sextarcium ordei, et exceptis omnibus nutrimentis nutrituris vestris et arborum fructibus, de quibus omnibus praeter olivas nichil nobis praestabitis. Similiter donamus et concedimus vobis decimas et primicias laborationum vestrarum in honore de Villa rotunda, et in honore Vallis Ursariae. Pro hac autem munificencia quam magis pietatis consideracione quam rei vestrae emolumento in vos et monasterium vestrum conferimus, accipimus dono a vobis unum ferragenale quod habetis Barchinonae apud Archus-veteres. Novissime autem nos Abbates, Poncius, Grandis Sylvae Abbas, et Petrus, monasterii de Sanctis Crucibus Abbas, et Vitalis, Abbas Fontis frigidi (Fontfreda, Fontfroide, Fuente fría) pro jam dicta donatione vestrae munifice largitatis Deo et vobis gratias referentes, promittimus vobis firmiter quod nichil vobis contra praedictam constitutionem machinabimur, sed integre et cum fidelitate vobis et successoribus vestris praedictam duodecimam fructuum partem tam de pane quam de vino et olivis praestabimus nos et successores nostri, vel praestari faciemus vobis et successoribus vestris, et de hoc ferragenali quod a nobis accipitis erimus vobis auctores et defensores jure, de omnibus emparatoribus. Nos quoque praedicti donatores de praescripta donacione et concessione quam vobis facimus, erimus vobis justi et fideles auctores ac defensores in perpetuum. Si quis hoc infringere temptaverit, nil valeat, sed in duplum componat et firmum maneat. Actum est hoc XV. kalendas julii, anno Dominicae incarnationis M.C.LXXIII. = + Ego Guillermus Dei gratia Terrachonae Archiepiscopus, Apostolicae Sedis Legatus, subscribo. = + Ego Bernardus, Barchinonae Episcopus, subscribo, salvo jure ecclesiae Barchinonae. = Ego Raymundus, Terrachonae Praepositus ecclesiae, subscribo. = Sig+num Johannis, Terrachonae ecclesiae Camerarius. = Ego Geraldus, Terrachonae canonicus, subscribo. = Ego Poncius, canonicus Terrachonae. = Sig+num Raymundi, Sacristae et praesbyteri. = Hoc ego subsigno Raymundus secula signo +. = Sig+num Raymundi, Terrachonae canonici. = Sig+num Raymundi Mironis, presbyteri. = Non est indigne Ricardo ponere signum +. = + Haec crux Renaldi fuit, et quid dixerit audi. = Sig+num Berengarii, canonici presbyteri. = Sig+num Guillelmi, presbyteri. = Sig+num Berengarii, canonici presbyteri. = Sig+num Bernardi, presbyteri. = Ex nostra parte rata sit transactio cartae. = Ego Arnaldus de Darniciis, rogatus testis subscribo. = Vicentius, presbyter hoc firmo. = Ego Lucas, presbyter et canonicus Terrachonae, subscribo. = Ego Geraldus, presbyter et canonicus subscribo. = Ego Poncius, dictus Abbas Grandis Sylvae laudo et confirmo. = + Petrus, de Sanctis Crucibus Abbas laudo et subscribo. = + Ego Guillermus, cellerarius de Sanctis Crucibus laudo et confirmo. =  + Signum Gilaberti, monachi de Sanctis Crucibus. = Sig+num Fortonis, de Sanctis Crucibus. = Sig+num Bernardi. = Sig+num Arkonis. = Sig+num Petri. = Sig+num Petri. = Sig+num Ugonis. = Sig+num Raymundi. = Sig+num Gumbaldi. = Sig+num Bernardi. = Sig+num Johannis. = Sig+num Stephani. = Sig+num Arnaldi. = Sig+num Henrici. = Sig+num Berengarii. = Sig+num Aymerici. = Sig+num Guillermi. = Sig+num Bernardi. = Sig+num Petri. = Sig+num Petri. = Sig+ num Petri. = Sig+num Stephani. = Sig+num Bernardi. = Sig+num Raymundi. = Sig+ num Guillermi Raymundi. = Sig+num Petri. = Ego Petrus de Terrachona hoc scripsi die et anno + praefixo.

XXXV. Restitutio terminorum Tarraconae facta ecclesiae Tarraconen. ab Ildefonso Rege, anno MCLXXIII. (1173)

XXXV.

Restitutio terminorum Tarraconae facta ecclesiae Tarraconen. ab Ildefonso Rege, anno MCLXXIII. (1173) (Vid. pág. 162.)

Ex cartul. eiusd. eccl.

Qui ablata restituit, Deum sibi patronum constituit. Idcirco in Dei nomine notum sit omnibus hominibus quod ego Ildefonsus Dei gratia Rex Aragonum, Comes Barchinon. et Marchio Provinciae, una cum consilio Baronium curiae meae inferius suscriptorum, reddo, deffinio atque restituo (paternam etiam donationem in perpetuum confirmo), Domino Deo et ecclesiae Sanctae Teclae Tarraconensi, et tibi Guillelmo, eiusdem ecclesiae Archiepiscopo, Apostolicae Sedis Legato, et omnibus successoribus tuis, terminos Tarraconae, qui extenduntur usque ad terminos de Gayano, sicut ascenditur per aquam de Gayano usque ad montes, et transit per calcem montium usque ad ipsum Engolador de capra, et pervenit usque ad ipsum embotum, et ascendit per cacumina montium de Carbonaria, sicut aquae vergunt ad orientem, et pervenit usque ad collem Ballagarii, et descendit in mare, quod est commune omnibus, quemadmodum in instrumentis super his terminis jam dudum factis continetur; quae instrumenta facta sunt ab avo meo, et a patre meo confirmata. Actum est hoc apud Anglesolam XV. kal. augusti anno Domini M.C.LXXIII. = Signum Ildefonsi, Regis Aragon., Comitis Barchinon. et Marchionis Provinciae. = Sig+num Gaucerandi de Pinoso. = Sig+num Poncii de Sanctafide. = Sig+num Geraldi de Jorba. = Sig+num Raymundi de Turrerubea. = Sig+num Guillermi de Alcaraz. = Sig+num Geraldi Alemany. = Sig+num Guillermi de Sancto Martino. = Sig+num Poncii de Sanctafide minoris.

XXXIII. Eiusdem ad eumdem Archiep. litterae

XXXIII.

Eiusdem ad eumdem Archiep. litterae quibus quae Raymundus Berengarii IV., Comes Barchinon., Archiepiscopo Tarraconensi in Ilerda et Dertusa concesserat, confirmat, an. M.C.LXXIII. (1173) (Vid. pág. 161).

Ex autogr. in arch. eccl. Tarracon.

Alexander Episcopus servus servorum Dei. Venerabili fratri W. Terracon. Archiepiscopo, Apostolicae Sedis Legato, salutem et Apostolicam benedictionem. Inducit nos, et hortatur comissae nobis dignitatis auctoritas fratribus et Coepiscopis nostris gratiae nostrae plenitudinem exhibere, et super hiis, quae legitime possident, Apostolici favoris et patrocinii subsidium ministrare, ut tanto circa devotionem Beati Petri, ac nostram teneantur ferventiores existere, quanto se ampliori praerrogativa cognoverint confoveri. Inde est quod Nos tuis postulationibus benignius annuentes, honorem illum, quem bonae memoriae R. quondam Comes Barchinonen. in Illerda et Dertusa, tibi, quando captae fuerunt, concessit, sicut ipsum pacifice habere dinosceris, devotioni tuae auctoritate Apostolica confirmamus, et praesentis scripti patrocinio communimus. Statuentes ut nulli omnino hominum liceat hanc paginam, etc... Datum Anagniae XVI. kalendas julii.

XXXII. Eiusdem Rom. Pont. confirmatio donationis factae a Raymundo, Barchin. Comite Sedi et eccl. Tarraconensi, an. M.C.LXXIII. (1173)

XXXII.

Eiusdem Rom. Pont. confirmatio donationis factae a Raymundo, Barchin. Comite Sedi et eccl. Tarraconensi, an. M.C.LXXIII. (1173) (Vid. pág. 161).

Ex arch. eiusd. eccl. 

Alexander Episcopus servus servorum Dei. Venerabili fratri Willelmo (a) Archiepiscopo, et dilectis filiis canonicis Terraconen. salutem et Apostolicam benedictionem. Ad hoc in Beati Petri Apostolorum Principis cathedra licet immeriti residemus ut omnium ecclesiarum providente Domino et curam sollicitudinem gerentes pro earum statu vigili studio debeamus satagere, et ut jura sua quiete valeant et libere possidere, Apostolicae proteccionis clipeo contra malignatium incursus sollicite defensare. Frustra enim videremur pontificalis dignitatis officium gerere, si circa tuitionem et defensionem ecclesiarum aliqua conspiceremur negligentia vel tepiditatis vitio laborare. Inde est quod Nos vestris justis postulationibus gratuitum impertientes assensum, donationem, quam bonae memoriae Raymundus, quondam Barchinonen. Comes de civitate Terraconen. et territorio suo ecclesiae vestrae fecit, hominia quoque fidelitates et juramenta, quae homines ejusdem civitatis et territorii Archiepiscopo et ecclesiae facere consueverunt, decimas, primitias dominicaturam de Stagno, de Vite, et de Franculino, Constantinum, et Villam Constantinam, et Lentiscleil, et castrum de Reds cum adjacentiis suis, et alias dominicaturas, quas nunc ibidem habetis, vobis et ecclesiae vestre, sicut ea in presentiarum pacifice possidetis, et in autentico scripto exinde facto continetur, auctoritate Apostolica confirmamus, et praesentis scripti patrocinio communimus. Statuentes, et sub in terminatione anathematis prohibentes, ne cui liceat donatione alicujus in prescripta civitate vel territorio ejus contra tenorem praedictae donationis, etc. Datum Tusculan. VII. kalendas februarii.

(a) Willelmo scilicet de Torroja, quem in sequenti rescripto Apostolicae Sedis Legatum vocat.

XXXI. Alexandri III. epistola ad Archiep. Tarracon. super defraudantibus decimas sibi debitas, an. M.C.LXXIII. (1173)

XXXI.

Alexandri III. epistola ad Archiep. Tarracon. super defraudantibus decimas sibi debitas, an. M.C.LXXIII. (1173) (Vid. pág. 161). 

Ex autogr. in arch. eccl. Tarrac.

Alexander Episcopus servus servorum Dei. Venerabili fratri Terragonen. Archiepiscopo salutem et Apostolicam benedictionem. Significatum est Nobis ex parte tua, quod quidam milites parrochiani tui decimas ad ecclesias tui episcopatus de jure spectantes violenter detinent, et eisdem ecclesiis solvere contradicunt; quas, si quando rescipiscunt, monasteriis et aliis ecclesiis pro sua voluntate dimittunt. Quoniam igitur nolumus ut ecclesiae tuae suo jure hac occasione fraudentur, tam eos, qui alienant eas, quam illos, qui contra voluntatem tuam injuste recipiunt, si comoniti satisfacere forte noluerint, et ecclesiae cujus sunt resignare, excommunicandi, appellatione cessante, tibi tribuimus facultatem. Datum Tusculan. VIII. kalendas octobris.

XXIX. Litterae Alexandri Papae III. ad Guillelmum de Torroja, Archiep. Tarrac. super nece Hugonis de Cervello, Archiepiscopi, ann. MCLXXIII. (1173)

XXIX.

Litterae Alexandri Papae III. ad Guillelmum de Torroja, Archiep. Tarrac. super nece Hugonis de Cervello, Archiepiscopi, ann. MCLXXIII. (1173) (Vid. pág. 158.)

Ex autograph. in arch. eiusd. eccl.

Alexander Episcopus servus servorum Dei. Venerabilibus fratribus W. Terragonen. Archiepiscopo, Apostolicae Sedis Legato, et suffraganeis ejus, salutem et Apostolicam benedictionem. Officio nostro convenit scelera et enormitates sceleratorum corrigere, et deliquentium culpas debita animadversione punire, ne aliis de impunitate facinoris relinquatur audacia delinquendi. Sane quam graviter et enormiter deliquerint, qui in necem bonae memoriae Hugonis, quondam Terragonen. Archiepiscopi machinati sunt, fraternitatis vestrae prudentiam non debet latere. Accepimus autem quod Robertus in mortem praedicti Archiepiscopi, instigante diabolo, conspiravit, et in eum quod conceperat virus iniquitatis effudit. Quoniam igitur tam immensum et crudele facinus non possumus, nec debemus impunitum relinquere, fraternitati vestrae per Apostolica scripta praecipiendo mandamus, et mandando praecipimus, quatinus karissimum in Xpto. filium nostrum illustrem Aragonen. Regem ex parte nostra et vestra moneatis, et inducere modis omnibus laboretis, ut praedictum Robertum in regno suo nulla ratione recipiat, nec ibi velit aliquatenus retinere, nec ei exhibeat aliquam gratiam vel favorem. Si autem monitis vestris acquiescere forte noluerit, in regno ejus, omni occasione et appellatione remota, divina, praeter baptisma parvulorum et poenitentias morientium, prohibeatis officia celebrari; et in ipsum Regem, omni timore et favore postposito, excommunicationis sententiam promulgetis, et sententiam ipsam usque ad dignam satisfactionem faciatis irrefragibiliter observari. Datum Anagniae VII. idus junii. (a: Quamquam hae litterae anni data careant, eas tamen ad ann. 1173 referimus, cum in illis Legatus Sedis Apostolicae audiat Guill. de Torroja, Archiep. Tarracon.; quod ante diem 7 junii hujus anni factum non esse certum nobis est.)