D' un Royal Apophthegme du Roy François premier de ce nom, & aussi d' une rencontre que luy fit un Moyne de Marcoucy.
CHAPITRE VIII.
L' on raconte que sainct Louys ayant accordé une remission à un mal-faicteur par les importunitez d' un sien favory, tombant sur un Verset du Psalmiste, par lequel il exhorte les Princes de rendre la Justice à leurs subjects, revoqua soudain son ordonnance, & voulut que punition fust faicte du delict. Le bon esprit du Roy François premier de ce nom luy apporta mille responses Royalles & dignes de sa grandeur, entre lesquelles, celle que je veux deduire est digne de grande celebration: car ayant esté Jean des Marests meurtry par le Seigneur de Talart, de haute & ancienne lignee, & Gentil-homme supporté de plusieurs grandes alliances, & nommément de Messire Jean du Bellay Cardinal qui en faisoit son propre faict, il sembloit que l' expedition de la Justice n' en fust si prompte comme la vangeance l' exigeoit. L' ayeule du pauvre deffunct ayant son seul recours au Prince, se jetta de genoux devant luy toute esploree, à Fontaine-bleau. Dequoy le Roy estonné luy demanda quelle chose elle vouloit de luy, Justice, Sire, (respondit-elle) s' il vous plaist: A laquelle parole il luy commanda de se lever promptement, & s' addressant vers toute la compagnie qui l' environnoit: Foy de Gentil-homme (dit-il) ce n' est pas raison que cette Damoiselle se prosterne devant moy, me demandant une chose que pour le deu de mon Estat je luy dois: mais c' est à faire à ceux qui m' importunent sur les remissions & abolitions, lesquelles je ne leur dois sinon de grace & puissance Royale. Parquoy apres l' avoir longuement entenduë sur le discours de sa requeste, qui tendoit seulement à fin de briefve Justice, & la luy ayant promise, il monstra que la parole d' un tel Roy se trouva en tout accomplie par l' evenement qui s' en ensuyvit. D' autant que ne pouvant estre fleschy par aucune priere de ceux qu' il favorisoit, ny mesme par Ambassadeurs estrangers, voulut la punition en estre faite, telle que la gravité du delict portoit. Comme de fait je vey decapiter Talart aux Halles de Paris, en l' an mil cinq cens quarante six.
Si l' Apophthegme de ce grand Roy est beau à l' endroit d' une pauvre Damoiselle, la rencontre d' un petit Moine envers un grand Roy n' est pas moins belle. Le mesme Roy passant par les Celestins de Marcoucy, s' informant de quelques Moines de leans, qui avoit fondé ce Monastere, luy fut par aucuns respondu que c' estoit Messire Jean de Montaigu grand Maistre de France, sous le regne de Charles sixiesme. Ce Seigneur avoit esté autres-fois pendu au gibet de Paris, à la solicitation du Duc de Bourgongne qui lors gourmandoit toute la France. Le Roy François, comme bon coustumier qu' il estoit de tenir tousjours quelque propos de merite, dit à la compagnie qu' il s' esmerveilloit grandement comme cestuy qui avoit longuement gouverné le Roy son Maistre, avoit esté condamné à mort, veu qu' apres quelque suite d' annees ses os furent ensevelis avec honneur en ce lieu, par ordonnance de Justice: & qu' il falloit bien conclure par cela que les Juges avoient mal jugé. A quoy il y eut un Moine qui respondit au Roy d' une parole assez brusque, qu' il s' abusoit aucunement, parce que le procez du sieur de Montaigu n' avoit esté fait par Juges, ains seulement par Commissaires, comme s' il eust voulu inferer en son lourdois que tels Commissaires deleguez à l' appetit d' un Seigneur qui pouvoit lors toutes choses, n' apportoient en leurs jugemens la conscience ordinaire des bons Juges. Soit que cette parole fust proferee par un Moine en son gros lourdois, ou par un artifice affeté, elle appresta à rire, combien qu' elle se deust tourner à edification: car à bien dire les Commissions, encores qu' elles ne soient practiquees, si sont-elles tousjours suspectes envers toutes personnes graves, & semble à plusieurs que tels Juges soient choisis à la poste de ceux qui les y font commettre pour en rapporter tel profit, ou telle vangeance qu' ils se sont projettez dessous le masque de Justice. Ce que mesmement recognu par le Parlement, pour obvier aux scandales & foules du peuple qui ordinairement en adviennent, en une Mercuriale qui fut faite de nostre temps, il fut par serment solemnel arresté qu' aucun Conseiller de la Cour n' entreroit en commission, si tous les Commissaires & deputez n' estoient tirez du mesme corps, & non mandiez d' unes & autres Cours souveraines. En quoy neantmoins ce n' est du tout apporter medecine à la maladie, ains quelque temperament seulement. Au demeurant si ce Religieux eust esté nourry en l' Histoire, il pouvoit dire qu' un seul des Essars Prevost de Paris, Juge lors voüé aux passions du Duc de Bourgongne, avoit condamné Montaigu à mort.
