DES RECHERCHES
DE LA FRANCE,
LIVRE TROISIESME.
Encores que voulant icy discourir des affaires de nostre France, quelques uns estimeront de prime face que je m' esloigne de mon but, de traverser les montaignes, toutesfois qui repassera sommairement les grandes obligations que nostre Couronne a receu du sainct Siege Apostolic, & celles en contr' eschange que le saint Siege a receu de nous, indubitablement il jugera, que non seulement les discours que je me suis maintenant proposez, ne devoient être escoulez souz silence: mais au contraire que les escoulant, j' eusse faict tort à mon entreprise. Je dy obligations que le sainct Siege a receu de nous: car combien que toute puissance de ce bas être soit establie de Dieu, & specialement ceste cy que nous recognoissons avoir la primauté, & intendance sur nous, si est-ce que les plus grands esclairs se manifesterent par l' aide & instrument de noz Roys. Jamais principauté ne prit traict d' une origine si basse (j' entens basse quant au monde, non quant à Dieu: car elle fut bastie du commencement sur une pauvreté obstinee, sur une affliction continuë, sur un martire juré) & jamais principauté n' arriva à telle extremité de grandeur, tant en temporel, que spirituel, ayant quelquefois faict vacquer les Empires & Royaumes, quand les occasions s' y sont presentees. Et qui est chose plus esmerveillable c' est que les autres Monarchies qui ont voulu accroistre leurs frontieres, l' ont faict par les armes: au contraire ceste-cy, bien que par fois se soit desbandee aux armes, si n' est-elle en ses communes regles retenuë par la force, & violence humaine, ains par la seule parole qui procede de sa puissance absoluë. Je ne veux pas denier que de fois à autres, il n' y ait eu en cecy de l' homme plus que la dignité Ecclesiastique ne requeroit, toutesfois non seulement ne s' est l' Eglise demembree par ce defaut, lors que le chef s' est trouvé malade, mais par un mystere de Dieu admirable, ceste maladie a servy quelquefois d' edification au peuple pour le contenir en devoir. Et si avecq' tout cecy il vous plaist adjouster les obstacles, que receut du commencement ce sainct Siege, encores vous esbahirez vous d' avantage, comment il ait esté possible selon le jugement humain, qu' il soit parvenu à tel accomplissement de grandeur. Car en la premiere distribution des Evesques, le suffrage commun des Apostres tomba sur sainct Jacques dit le Juste, au premier Concil qui jamais fut tenu. D' avantage en ce grand Concil de Nice, qui fut celebré soubz l' Empereur Constantin, semble qu' il y eut un article, par lequel on luy bailla pour compagnon l' Evesque d' Alexandrie: voire que s' il vous plaist passer jusques à nous, combien que nostre Gaule ne fut jamais accusee de desobeissance contre l' Eglise (car entre autres loüanges que sainct Hierosme nous baille escrivant contre Vigilance, c' est que la Gaule n' avoit oncques produit des monstres, voulant dire qu' elle ne produisoit des heretiques) toutesfois je ne voy point soubz toute la lignee de Clovis, que ceste superiorité, & primace fust recogneuë absolument, de la façon que nous avons depuis faict, ains se passoient les choses par Synodes Provinciaux és affaires, où l' authorité du sainct Siege a depuis esté requise: Et noz Roys mesmes avoient bonne part à toutes les Constitutions Ecclesiastiques, ainsi qu' il sera deduit en son lieu. Ce neantmoins chacun sçait la parole qui avoit esté donnee à sainct Pierre, quand nostre Sauveur Jesus Christ luy promeit de bastir sur luy son Eglise, & qu' il luy donnoit les clefs des Cieux. C' est luy qui fut le premier mandé, luy, le dernier commandé par nostre Seigneur montant au Ciel, de bien gouverner ses oüailles, luy auquel d' ordinaire il adresse en particulier sa parole, au millieu de tous ses Apostres, luy qui en contr' eschange se donne la liberté de l' interroger, pendant que les autres se taifent, & quelquefois de le dedire par une abondance de zele: luy, di-je, qui en tous les actes solemnels de son maistre, y est expressement par luy appellé, & sans y être appellé, s' y trouve. Et combien qu' il y ait de fois à autres, & en ses demandes, & en ses actions, quelque fragilité, comme celuy sur lequel nostre Seigneur n' avoit encores espandu les rayons de son sainct Esprit, par le merite de sa passion, si est-ce que non seulement il ne voulut tourner cela au scandale, mais au contraire à l' edification generale de nous tous. C' est pourquoy on ne fit jamais de doute que de la chaire de S. Pierre, despendoit l' union de nostre Eglise universelle. Ains l' aprenons nous de S. Frenee au livre second encontre les heretiques, de Tertulian en son traité contre les Gnostigies, de S. Cyprian en l' Epistre de l' unité de l' Eglise, & en une autre à Jubaïan, de S. Hierosme au livre premier contre Jovinian, en une Epistre à Damase Evesque de Rome de sainct Augustin en l' Epistre cent soixante cinquiesme, & de S. Ambroise escrivant à Sirice Pape, & encores sur le vingtdeuxiesme chapitre de sainct Luc. Mesmes combien que sainct Jacques, eust esté esleu pour presider sur l' Eglise de Hierusalem, si est-ce que pour *cela la surintendance & Primace generale de sainct Pierre entre les Apostres, ne luy feust ostee. Comme de faict en ce premier conseil par moy cy-dessus touché, c' est luy qui ouvre le pas, luy qui fait les propositions, luy qui les resoult, en cela suivy par S. Jacques, & tous les autres Apostres. Et neantmoins toutes ces particularitez n' empescherent pas, que ceste grande Superiorité ne feust quelque temps traversee en ses successeurs. Tellement que quand je voy les longueurs qui se sont trouvees depuis à l' advancement, & progrés de ceste grande dignité, & neantmoins que l' arrest de Dieu ne pouvoit être menteur, je ne puis que je ne la compare presque à la nativité & suitte qui se trouve en la propagation de nous autres. Car tout ainsi que Dieu ayant procreé l' homme à son image, luy donna toutes prerogatives sur tous les autres animaux, & qu' à ceste cause, nature comme grandement empeschee en l' Architecture d' un si grand & laborieux bastiment, esleve ce petit corps avec une infinité de difficultez, lesquelles ne se rencontrent en toutes les autres creatures terrestres: Aussi Dieu voulant authoriser ce sainct Siege de grandes preéminences, pardessus les autres, cela ne devoit être faict qu' avecques longues racines, lesquelles petit à petit ont jetté & espandu leurs effects, de la façon que nous avons veu. Et comme ainsi soit que les choses, qui ont esté preordonnees par un jugement tres-certain de Dieu, ont toutesfois leurs heurts & rencontres fluctuantes & incertaines, ainsi qu' il plaist à sa majesté qu' elles s' acheminent à leur effect determiné: Aussi puis-je dire qu' au present discours si l' on y voit quelques traverses (comme il est malaisé qu' en racontant les histoires des hommes, il ne se trouve en eux passions, & quelquesfois des-mesurees.) Si protesté-je ne le faire en intention de vilipender la grandeur de celuy, que nous avons tousjours recogneu, & recognoissons pour le chef de l' Eglise: ains parce que la necessité de l' histoire me le commande, & que ce sont mesmes fautes à celuy qui descrit l' ancienneté, de pallier un mensonge, comme de taire une verité. Et de ma part, j' estime que combien que la vertu des premiers peres de Romme ait grandement servy pour l' accomplissement, & augmentation de ce Siege, toutesfois les vices, qui se sont depuis trouvez aux uns, & aux autres Papes, n' en ont en riens diminué l' authorité. Voila pourquoy je supplieray tout homme, qui se donnera le loisir de lire ce Troisiesme livre, d' y apporter mesme candeur, tondeur, & syncerité que je fais.
