Comme & vers quel temps le tiltre d' Evesque universel se planta dedans l' Eglise, & en quelle façon les choses se passerent pour cest esgard.
CHAPITRE II.
Tout ainsi que soubs le moyen aage de nostre Eglise le tiltre de Patriarche fut introduict en ces cinq grands sieges: aussi commença l' on de les honorer diversement de ceste qualité de Prelats universels ainsi que j' ay presentement touché: mais comme, les coustumes ne sont pas jettees en moule, ains prennent leur accroissement par un taisible progrez, & alluvion: ainsi ne s' insinua, ce mot tout d' un coup entre nous. Celuy qui en fut premierement honoré, fut le Pape Leon premier de ce nom au Concil general de Chalcedoine tenu sous l' Empereur Marcian par six cens Evesques, où fut condamnee l' heresie Eutichienne. Sainct Gregoire escrivant à l' Empereur Maurice, dit que ce tiltre avoit esté accordé à Leon par le suffrage commun du Concil: toutesfois dans le Concil qui court par nos mains, je n' en trouve un tout seul article: mais bien trouverez vous que ceux du menu Clergé, qui lors presenterent Requestes au Concil, meirent en la suscription d' icelles, Sanctissimo & beatissimo universali Archiepiscopo, & Patriarcha magnae Romae, & sanctae universali Synodo. Tiltre que Leon n' accepta, mais aussi ne le refusa. Je ne voudrois pas certes dire, que ce grand personnage sainct Gregoire se fut mespris: car mesmes il attouchoit de pres ce temps là, & y avroit à penser que le Concil tel qu' il nous est representé, a esté paradventure corrompu par la nonchalance des ans: mais soit l' un, ou l' autre, ce n' est point un petit advantage pour le Pape, voire peut être plus grand de la façon que nous le lisons dans les actes de ce Concil. Car si par le suffrage commun des Evesques ce titre luy eust esté accordé, il sembleroit que c' eust esté à sa solicitation, & poursuitte, comme une qualité qu' il eust ambitieusement mendiée: mais ce tiltre estant emané par l' organe de ce petit peuple: il n' y a homme si aueuglé qui ne voye que ce fut pour un respect, honneur & devotion qu' il portoit singulierement au siege de Rome: voire par dessus celuy de Constantinople, en faveur duquel Anathole Patriarche de ce lieu, fit glacer par brigues, & menees un article, dont la teneur estoit telle, laquelle j' ay icy rapporté mot à mot en nostre langage. En ensuyvant en tout & par tout les Decrets des saincts Peres & la sanction Canonique n' agueres leuë, nous avons advisé d' ordonner & statuer des privileges en faveur de la tres-saincte Eglise de Constantinople, nouvelle Rome.
Car aussi noz anciens Peres voulurent à bon droict octroyer des privileges au siege de la vieille Romme, par ce qu' elle commandoit: & tout d' une mesme consideration cent cinquante venerables Evesques tres-fidelles serviteurs de Dieu accorderent privileges esgaux au siege de la nouvelle Romme, cognoissant fort bien que ceste ville, qui est honnoree du tiltre de l' Empire, & du Senat, devoit jouyr de pareilles prerogatives que la vieille Romme: voire qu' és choses Ecclesiastiques, elle ne devoit être moins extollée que l' autre tenant le second lieu apres elle. A maniere que les Metropolitains d' Alsacie, & de Thrace, & encore tous les Evesques constituez és pays barbares doivent être ordonnez du sainct Siege de Constantinople: c' est à sçavoir, que chaque Metropolitain avecq' ses comprovinciaux, puisse consacrer les Evesques de sa Province, comme il est statué par les saincts Decrets, & Canons, & que le Metropolitain soit confirmé par le Patriarche de Constantinople, apres que l' election faicte canoniquement luy aura esté rapportee. Duquel article vous ne pouvez recueillir autre chose par cest entrelas de paroles, sinon que le Patriarche de Constantinople voyant que toutes les grandes prerogatives estoient accordees au Pape de Romme, recherchoit tous moyens de l' égaler en authorité sur ceux de son Patriarchat. Et à tant tout ainsi que le menu Clergé avoit au Concil de Chalcedoine donné au Pape Leon le tiltre d' universel: aussi les Patriarches de Constantinople le voulurent puis apres usurper. Qui causa une infinité de dissentions entre les deux Sieges. Car pour bien dire, encores, que ceste qualité eust esté donnee à Leon premier, toutesfois ny luy, ny longuement apres, ses successeurs ne la mirent en usage: mais bien l' Archevesque de Constantinople. Je diray cecy en passant, & peur être ne seray-je desauoué de ceux qui sans passion ont fueilleté l' Histoire Ecclesiastique, que la grandeur du Siege de Romme creut du commencement par la
saincte vie des saincts Peres qui y presiderent, & par la devotion que les bonnes gens leurs porterent: Et quant à celuy de Constantinople, encores qu' il y ait eu quelques Prelats, gens de bien, si est-ce que la plus-part donnoit ordre d' accroistre ce Siege plus par brigues, & ambition, qu' autrement, & ce pour le lieu qu' ils tenoient pres des Empereurs. Le premier d' entre eux qui le prit à face ouverte, fut un nommé Jean, personnage de grande recommandation, tant en jugement, & doctrine, qu' à bien escrire. Plus ces Prelats se rendoient recommandez en grandeur de sens, plus affecterent-ils de former la grandeur en leurs Sieges, ainsi que vous voyez par ces quatre grands personnages. Leon Evesque de Rome, Cyrille Evesque d' Alexandrie, Chrysostome, & Jean Evesques de Constantinople. Ce tiltre fut non seulement pris par Jean, ains plausiblement accordé par le cinquiesme Concil de Constantinople: auquel Concil le Pape de Rome ne fut appellé, tellement que Jean y presida. Qui me faict presque juger que ce fut pour s' authoriser de ce nouveau tiltre, d' autant que vous y trouverez une infinité de fois ceste qualité d' œcumenique, & universel luy estre donnee, tantost par quelques particuliers du Clergé, tantost par le Concil mesmes, & entre autres y a un acte de telle substance. Domino nostro sanctissimo, & beatissimo, Patri Patrum; Archiepiscopo, & oecumenico Patriarchæ Ioanni, Synodus in hac imperiali civitate congregata, in Domino salutem. Qui est à dire. A nostre Sanctissime, & Beatissime Seigneur, Pere des Peres, Archevesque, & Patriarche universel Jean, tout le Concil de present assemblé en ceste ville Imperiale, desire salut en Dieu. A quoy s' opposa vertueusement, premierement le Pape Pelage second, & apres son decés, Sainct Gregoire son successeur, lequel ayant opinion que l' Empereur Maurice favorisoit aucunement la cause du Constantinopolitain, prit ceste querelle en main, & luy en escrivit vertueusement, ensemble à l' Imperatrix Constance, & specialement escrivant à Maurice, apres avoir recueilly tous les passages de la saincte Escriture, par lesquels on voit que la primauté de l' Eglise avoit esté donnee à sainct Pierre, il adjouste, & tamen universalis Apostolus non vocatur: & vir sanctissimus consacerdos meus Ioannes, universalis Episcopus vocari conatur, exclamare compellor, ac dicere, ô tempora, ô mores, &c. Et toutesfois (dit-il) sainct Pierre ne fut appellé Apostre universel, & reverend Pere en Dieu Jean mon confrere tasche de se faire nommer Evesque universel: Et vrayement je suis contrainct de m' escrier, & dire, ô temps, ô mœurs, &c. Non content de cela, encores escrit-il à Jean qu' il eust à bannir ceste ambition insuportable de sa teste: Et estant advenu à Euloge Patriarche d' Alexandrie d' appeller en l' une de ses lettres, Gregoire Evesque universel, il l' en reprend tres-aigrement. Pour tout cela neantmoins ne laissa le Patriarche de Constantinople de continuer ce tiltre par luy usurpé, en son siege. Et à l' imitation de luy nous trouvons dedans le trente troisiesme livre de Nicephore, qu' au premier Concil d' Ephese, qui fut tenu souz Theodose second, Cyrille Patriarche d' Alexandrie, grand personnage de son temps, & qui fut prié par le Pape Celestin de tenir son lieu, en ceste assemblee se fit donner pareil tiltre d' Evesque universel. Tiltre (dit-il) qui fut usurpé depuis long temps apres par tous les successeurs en ce Siege. Cela fut cause que le Pape ne douta plus de là en avant de prendre ceste mesme qualité, non seulement pour ne descheoir du degré qui luy avoit esté adjugé par dessus le Constantinopolitain, & les autres, mais aussi qu' il estimoit qu' elle luy estoit loyaument deuë: & passerent les choses de façon, que le Grec en langue Gregeoise se faisoit appeler Oecumenique, & le Romain en Latine, Universel. Ce que je dy expressemment pour respondre à ceux qui se persuadent que Maurice premierement adjugea ce tiltre d' Universel au Patriarche de Constantinople, au prejudice de l' Evesque de Romme, & que son successeur Phocas luy osta, pour le rendre au Romain. Encores que je sçache bien que Reginon l' Abbé, & apres luy Adon de Vienne facent mention de ce jugement de Phocas. Car je ne me puis persuader que Nicephore, qui a escrit l' Histoire Ecclesiastique jusques à la mort de Phocas, eust passé par oubliance le jugement de Maurice, luy qui d' ailleurs, pour favoriser son pays a falsifié le Concil de Constantinople tenu souz le grand Theodose, disant qu' en cestuy fut la primauté de l' Eglise adjugee au Patriarche de Constantinople: & sainct Gregoire, qui descouvrit brusquement à Maurice ce qu' il en pensoit, n' eust oublié de luy en toucher quelque mot. Joinct que depuis ces deux Empereurs, ceste qualité passa en tel usage, qu' au sixiesme Concil de Constantinople tenu par l' authorité de l' Empereur Constantin Pogonat, ces deux Prelats, (comme j' ay dit) sont diversement appellez, l' un Oecumenique, l' autre Universel, & neantmoins en ceste concurrence de tiltre, les Legats, & Vicegerans du Pape sont en la soubscription nommez les premiers, & apres eux les Patriarches de Constantinople, Alexandrie, Antioche, & Hierusalem.
Depuis petit à petit, à mesure que les Empereurs de Constantinople decheurent de leur majesté, aussi d' une mesme balance declina l' authorité du Patriarche, comme celuy qui n' avoit tiré sa grandeur que par les brigues des Empereurs. Toutesfois il ne voulut jamais demordre ce tiltre. Car au Concil mesmes de Basle tenu en l' an 1435. Joseph Patriarche Constantinopolitain, envoya une Bulle soubz plomb, dans laquelle il se qualifioit par la grace de Dieu Archevesque Metropolitain, & Patriarche universel de la nouvelle Romme. En fin tout ainsi que nostre Religion Chrestienne a presque perdu son cours par tout le Levant, aussi se sont par mesme moyen esvanouyes, & anichilees les authoritez, prerogatives, & grandeurs de ces quatre grands sieges, esquels on ne peut voir autre chose que l' image d' un Patriarche. Estant la grandeur de l' Eglise universelle devoluë par effect en la dignité Pontificale de Rome. En quoy apres avoir discouru ce qui appartient à l' Histoire, je feray pour conclusion ceste remarque, qui ne desplaira, comme j' espere, à ceux qui sont touchez d' un meilleur enclin envers l' Eglise Catholique. Tout ainsi que nostre Seigneur Jesus Christ appella sainct Pierre premier de tous ses Apostres à sa suitte, aussi luy promeit il de bastir sur luy son Eglise. En consequence de ce grand Arrest, je trouve une chose memorable de luy, qui merite d' être remarquee. Par ce que l' histoire Ecclesiastique nous enseigne, qu' il presida successivement en trois Sieges. Premierement quelque peu de temps a Anthioche, puis en Alexandrie, jusques à ce que finalement il vint confiner, & fa demeure, & sa vie à Romme: Aussi trouvez vous que ces trois sieges furent erigez en Patriarchats, comme premiers, & generaux des Eglises, avecq' celuy de Hierusalem, receptacle des miracles de la Passion de nostre Sauveur. Car quant à celuy de Constantinople, je pense qu' il y eut plus de l' homme pour son progrés, & advancement, que de la Religion: mais tout ainsi que sainct Pierre establit en fin son principal siege dans Romme, & que les deux autres ne luy avoient esté que comme passagers, & transitoires: aussi toutes les puissances des autres Patriarchats sont en fin abouties en ce grand siege de Rome, ainsi que nous avons veu. Au demourant ceux qui principalement provignerent ceste grande puissance entre les Papes, furent Leon, Gregoire, & Nicolas, tous trois premiers de leurs noms, que la posterité ne sçavroit assez dignement recommander.
