De la charité de six notables Bourgeois de la ville de Calais envers leurs Citoyens.
CHAPITRE XLV.
Memorable fut, & digne de compassion singuliere le faict de ces six Bourgeois. Car estant la ville de Calais du temps de Philippes de Valois reduicte en telle angustie, qu' il ne luy restoit plus aucune esperance de secours, ny de viures, Messire Jean de Vienne qui y commandoit pour le Roy, commença de parlementer sur la reddition d' icelle: Requerant qu' on leur permist de s' en aller bagues sauves. Ce que rapporté au Roy Edoüard d' Angleterre, qui par l' espace d' unze mois avoit tenu la ville assiegee, luy qui estoit au possible qu' une seule ville eust tenu si long temps ses entreprinses en surseance, & aussi ramenant en memoire plusieurs efforts que par le passé les siens avoient receu sur la mer par cette ville, tant s' en faut qu' il leur voulust accorder leur requeste, qu' au contraire se resoudoit de faire passer tous les habitans de ce lieu par le trenchant de l' espee, n' eust esté qu' il en fut diverty par quelques sages Seigneurs de son Conseil, qui luy remonstrerent que pour avoir esté bons & loyaux serviteurs envers leur Roy, ils ne meritoient telle punition. Parquoy Edoüard tournant sa premiere deliberation en plus doux propos, promit d' user de misericorde envers eux, moyennant que six des plus notables Bourgeois de la ville luy apportassent les clefs, la teste, & pieds nuds, ensemble la hard au col, sous condition qu' il pourroit disposer de leurs vies à sa volonté. Chose dont estant Jean de Vienne adverty, soudain se transporta en la grande place, où ayant fait sonner le Befroy pour illec faire convenir tout le peuple: Adonc tout piteux & perplex il leur raconta de poinct en poinct les Articles à luy envoyez sur la deliurance de tous, laquelle ne se pouvoit accomplir que par la mort de ces six: Desquelles nouvelles chacun estant diversement affligé, & menant un dueil nompareil, soudain se leva un de la troupe nommé Eustache de S. Pierre, l' un des plus riches, & apparens, lequel dit à toute l' assistance. Seigneurs, je remercie Dieu des biens qu' il luy a pleu me faire par le passé: & par especial à cette heure, en laquelle il m' a presté si bonne fortune, que j' espere promptement vous donner à entendre combien j' ay la vie de vous tous plus chere que la mienne propre. A la parole duquel se leva un Jean Daire, & 4. autres consecutivement, qui firent semblables offres, non sans plusieurs pleurs & lamentations du commun peuple, qui les voyoit d' une telle gayeté pour le salut public quitter le leur particulier: & dés l' instant mesme sans plus longuement marchander, s' acheminerent avec les clefs vers le Roy d' Angleterre, non sous autre opinion que de la mort: De laquelle bien qu' ils se tinssent asseurez, si alloient-ils comme aux nopces. Et toutes-fois Dieu attendrissant le cœur de l' Anglois, par les prieres de sa femme, & de quelques autres sieurs, ils furent envoyez sains & sauves la part qu' il leur plairoit tenir. Et puis qu' on die que nostre France ait esté desgarnie de ses Horaces, Quintes Curses, & Deces? Nous avons les nostres comme le Romain: Mais une certaine fetardise qui est en nous, d' apprendre plustost les singularitez des estrangers, que les nostres, nous les fait ignorer. On fit faire maison neufve aux citoyens de Calais, & fut la ville toute repeuplée d' Anglois. Nous trouvons qu' en l' an 1347. le Roy Philippes de Valois ordonna que tous les Offices qui vaqueroient, fussent baillez à uns & autres de ces pauvres expatriez, & que Maistre Pierre de Hangest Conseiller Clerc au Parlement, & Maistre Jean Cordier Maistre de la Chambre des Comptes furent executeurs de cette Ordonnance.
