Du Royaume de Hierusalem, & pourquoy les Rois de Naples, & Sicile, se pretendent Rois de Hierusalem.
CHAPITRE XXIV. (XXV)
Le fault est grand de France en Angleterre tel qu' au precedant chapitre, & maintenant d' Angleterre en Hierusalem, & de Hierusalem en Sicile, pour en fin revenir en France: Toutesfois tout cela regarde la grandeur de nostre France, à laquelle sont principalement deubs les voyages que l' on fit pour conquerir la terre Saincte: Joint que nos Normands, qui commanderent premierement à la Sicile, puis successivement les deux familles d' Anjou, je veux dire celle de Charles frere de sainct Louys, puis celle de Louys frere de Charles cinquiesme, tout cela est de nostre estoc.
Au premier voyage que nous fismes en la Palestine, les affaires nous succederent si à propos, qu' eusmes moyen d' y establir un nouveau Royaume sous le tiltre de Hierusalem. L' on presenta premierement la Couronne à Robert, fils de Guillaume le Bastard, qui la refusa, & à son refus, Godefroy de Boüillon fut faict Roy, & neantmoins ne voulut jamais charger la Couronne sur sa teste, disant, que ja à Dieu ne pleust qu' il se vist couronner Roy en un lieu, où l' on avoit faict porter une Couronne d' espines à nostre grand Roy Jesus-Christ. A luy succeda son frere Baudoüin, puis Baudoüin deuxiesme son cousin. A luy Foulques Comte d' Anjou son gendre, auquel succeda Almeric son frere, qui eut trois enfans, Baudoüin le Lepreux, qui fut apres troisiesme Roy de ce nom, Sibille, & Isabelle. Sibille fut mariee deux fois, en premieres nopces avecques Guillame de Montferrand, dont ell' eut Baudoüin quatriesme. Puis à Guy de Lusignen. Baudoüin le Lepreux decedant recommanda son nepueu Baudoüin au peuple, le laisse pour son heritier, & le met en la garde de Raimond Prince de Tripoly. Il n' y a rien qui soit tant à craindre, que quand un Royaume tombe entre les mains d' un enfant: chacun en son particulier veut joüer au Roy despoüillé. Cela advint soubz ce jeune Prince, qui regna seulement un an, non sans grande suspicion qu' il avoit esté empoisonné par Guy de Lusignen son beau-pere, lequel lors s' empara de l' Estat: mais Raimond tuteur luy fit teste: Guerre civile entre ces deux Princes, Raimond plus foible appelle à son secours Saladin Souldan d' Egypte. Cestuy faisant contenance de favoriser son party, s' impatronise de la plus grande partie de nos anciennes conquestes, mesmes de la ville de Hierusalem, aux despens de l' ambition de ces deux Princes mal conseillez. Cela s' appelle 88. ans apres que nous en estions rendus maistres. Ce temps pendant meurt Sibille, par la mort de laquelle Guy son mary perdit le tiltre de Roy, reprenant pour cette cause la route de France: mais à son retour il trouva par bon heur le Roy Richard d' Angleterre, qui luy fit present du Royaume de Chipre, qu' il avoit nouvellement conquis: Adoncques Henry Comte de Champagne avoit espousé Isabelle, sœur puisnee de Sibille, lequel se fit proclamer Roy de Hierusalem en ce peu de païs qui nous restoit: Mais mourant, Almeric frere de Guy espouse sa veufve, & par mesme moyen le Royaume, chose toutesfois qu' il negligea: Parce que quelque peu apres il se demist de la couronne entre les mains de Jean de Braine, mary d' Yoland fille aisnee d' Isabelle. mais luy ne pouvant supporter les indignitez & secousses que l' on fassoit aux Chrestiens, s' en retourna de deça, où il maria sa fille unique avecques Federic Empereur second de ce nom, Roy de Naples, & de Sicile, lequel par le moyen de ce mariage fut aussi intitulé Roy de Hierusalem. Le Royaume de Sicile tombant depuis és mains de Charles d' Anjou, il prit aussi le titre de Roy de Hierusalem: Et voicy pourquoy, par ce que Marie seconde fille d' Isabelle du premier lit, pretendoit la couronne luy appartenir, à laquelle le Pape ordonna une pension sur le Royaume de Sicile, moyennant laquelle elle renonça à tous droicts qui luy pouvoient appartenir au Royaume de Hierusalem, lesquels pour bien dire estoient lors plus imaginaires, que par effect. Voila comment depuis ce temps là, les Roys de Naples & Sicile, se sont qualifiez Roys de Hierusalem.
