XXVIII.
Donatio olivarii facta a Mirone et Raymundo, Judicibus monasterio Vallis Laureae, an. MCLIX. (1159) (Vid. pág. 135.)
Ex arch. monast. SS. Crucum.
Legimus a sanctis Patribus traditum, sanctisque ac divinis constitutionibus canonice confirmatum ut quaecumque Domino offeruntur, res Ecclesiae et oblationes fidelium appellentur; quae in nullis aliis usibus quam ecclesiasticis et Christianorum indigentium fratrum non debent converti, quia vota sunt fidelium et praetia peccatorum. Quapropter notitiae cunctorum significare procuramus, qualiter ego Miro Judex, et Raymundus Judex, frater meus ob remedium animarum nostrarum et parentum nostrorum damus et tradimus et offerimus Domino Deo et Beatae Dei Genitricis Mariae, et in manu Petri, Abbatis Sanctae Mariae Vallis Laureae, coeterorumque ejusdem fratrum, olivariam unam quam habemus subtus ecclesiam Sancti Gervasii ad capud illius nostrae pariliatae inter ipsos duos torrentes, sicut nos melius eam habemus, vel aliquomodo habere debemus, cum ingressibus et egressibus suis damus et tradimus et offerimus illam Domino et Deo, et Beatae Mariae, et in manu ejusdem praedicti Abbatis: tali videlicet modo et ordine ut oleum hujus olivariae semper ardeat ante altare Beatae Mariae. Quaecumque ecclesiastica saecularisve persona hanc nostrae donationis paginam suae pravae voluntatis studiis aliquo modo in toto vel in parte infringere voluerit, nullomodo facere possit, sed ea quae infringere temptaverit in duplo componat, et insuper haec praescripta donatio firma et stabilis omni tempore perseveret. Actum est hoc II. nonas junii anno XXII. regni Regis Lodoici Junioris. = + Mironis Judicis qui hanc donationis scripturam laudo, et firmo. = Sig+num Raymundi Judicis, fratris ejus. = Sig+num Guillermi de Pau. = Sig+num Bernardi de Gurb. = Sig+num Petri de Vilagelary. = Sig+num Bernardi de Castejo. = Sig+num Petri de Mulins. = Sig+num Petri, presbyteri.
