8. 20. Assassin, Assassinat, Apannage, mots empruntez des Voyages d' Outre-mer.

Assassin, Assassinat, Apannage, mots empruntez des Voyages d' Outre-mer.

CHAPITRE XX.

En matiere d' Estat c' est une chose fort familiere, quand on se trouve le plus foible, de hazarder l' un de ses sujects contre le chef des ennemis pour le faire mourir, a fin de se garentir du danger où l' on estoit. Le Roy Porsenna au siege de Rome en eust peu dire quelque chose, quand Scevola, pour sauver sa ville, le pensa tuer, prit son Secretaire au lieu de luy. Ainsi fut meurdry le Roy Sigisbert à l' instigation de Fredegonde, lors que Chilperic son mary estoit par luy estroitement assiegé en la ville de Soissons, ou Cambray. Ainsi Amurath Roy des Turcs, dans sa chambre par un soldat qui faisoit semblant de luy vouloir baiser les mains: qui fut cause (dit Theodore Spadugin) que depuis il fut ordonné que les Gardes tiendroient les mains de tout homme qui viendroit salüer le grand Turc, pour obvier de là en avant à tel inconvenient. Et à peu dire, de nostre temps en cette façon fut occis François Duc de Guyse en l' an mil cinq cens soixante & un, par Poltrot devant Orleans: la mort duquel fit lever le siege, & tout d' une suite apporta la Paix par tout le Royaume. Cela s' est fait par des particuliers. Mais que tout un peuple par Loy ancienne du pays fust voüé à faire de tels meurdres, quand il en recevoit commandement par son Prince ou Superieur, je n' en trouve que deux manieres de gens, ceux qui de nostre jeune aage suivirent la secte des Anabaptistes soubs Jean Leïdan, & anciennement au Levant les Assaßins, subject de ce present chapitre. Celuy qui premier en introduisit l' usage fut un Seigneur, lequel lors de nos voyages d' outremer s' estant fortifié dans un Chasteau de tres-difficile accés, attiroit à sa suite plusieurs gens ramassez, ausquels il donnoit des brevuages pour les endormir d' un profond somme, & à leur resveil ils se trouvoient en une maison de plaisance, où ils estoient accueillis de toutes sortes de voluptez par personnes à ce atiltrees: Et apres avoir passé en cette façon quelques jours, finalement estans endormis par cette potion, puis resveillez on les presentoit à leur Prince, lequel s' informant d' eux de tout ce qu' ils avoient faict en dormant (car à vray dire ils estimoient que ce fust un Songe) il leur faisoit promesse d' un tel Paradis, là & au cas que pour la deffense de leur Religion ils voulussent entreprendre de tuer ceux des Chrestiens qui leur seroient par luy commandez: ce qu' ils sceurent fort bien exploicter, & depuis tels commandemens s' estendirent non seulement encontre les Chrestiens, mais aussi contre tous autres, ores qu' ils fussent Mahumetistes, ainsi qu' il sembloit bon à leur Roy. Chose à quoy ils se voüoyent d' un cœur si franc, & gay, que leur commun mauldisson estoit, Mauldy sois tu comme celuy qui s' arme de peur de mouri. Nicetas Senateur de Constantinople dit qu' ils portoient tel respect aux commandemens de leur Seigneur, que si seulement ils eussent descouvert à un clin d' œil, que sa volonté estoit qu' ils mourussent, ils se fussent precipitez du haut en bas d' une maison, & exposez au meillieu de cent espees, ou jectez au feu, ou dans l' eau, plustost qu' ils ne luy eussent obey: & qu' estans par luy deleguez pour tuer quelques Princes, ils se transportoient vers eux, comme leurs serviteurs, ou comme ayans à leur dire quelque chose à l' aureille pour  leur profit, & trouvans leur apoint, ils ne doutoient de les tuer, à la charge d' estre puis apres tuez. Vray que le passage est corrompu, les appellans Chaßins, au lieu d' Assaßins, tout ainsi qu' en un autre endroict vous trouverez Blachiens ceux qu' on disoit Valachiens. Guillaume de Nangy acquiesçant à cette opinion, dit que ce Roy des Assassins estoit non seulement redouté des Chrestiens, mais aussi des Sarrazins: Et parce que son passage fait grandement à mon intention, il me plaist de le vous transplanter icy tout au long. Ce tres-mauvais, & mal-veillant Seigneur de Assassins habitoit en la confinité & contree d' Antioche & de Damas en Chasteaux tresbien garnis sur montagnes: Celuy Roy estoit moult redouté & craint des Chrestiens, & des Sarrazins, Princes prochains, & lointains: pource que moult de fois eux par ses messagers indifferemment faisoit occire: car aucuns enfans commandoit de sa terre estre emmenez en ses Palais, & illec apprenoient toutes manieres de langue, & estoient enseignez d' aimer leurs Seigneurs sur toutes autres choses, & à luy jusques à la mort obeyr, qu' ainsi pourroient aux joyes de Paradis parvenir, & quiconque mouroit en obedience, estoit honoré au gré de la terre des Assassins: & ainsi à leur Roy obeyssans, moult de Princes occirent, comme ceux qui de leur mort avoient peu de crainte. 

Il dit vray: car par eux fut proditoirement mis à mort le Comte de Tripoly, & quelque temps apres Edoüart d' Angleterre, plus Thierry Prince de Tir. Philippe Auguste estant de retour de son voyage de Hierusalem, eut advis que le mesme Richard Anglois, avoit attitré quelques uns de ce peuple pour le meurdrir, qui le fit tenir sur ses gardes plus ententivement que de coustume. Sainct Louys en l' un de ses Voyages d' Outremer fut adverty qu' on luy vouloit dresser pareille embusche. Le tout de la mesme façon, que sur nos jeunes ans nous vismes un Jean Leïdan Prince des Anabaptistes, dont j' ay cy-dessus parlé, qui depescha douze de ses supposts pour tuer tous les Princes d' Allemagne, a fin de maintenir contr'eux sa Religion.

Tout de cette mesme façon les Jesuites ont introduit en leur Republique,  un nouveau formulaire d' Estat, non seulement contre ceux qui pretendent guerroyer leurs Roys, Comme contre le feu Prince d' Orenge, qu' ils firent assassiner dedans Anvers l' an mil cinq cens quatre vingts quatre par un Baltasard Girard, & encores contre le Prince Maurice son fils, l' an mil cinq cens quatre vingts dix-neuf, par Jean Parme: mais contre les Roys, & Roynes mesmes en & au dedans leurs Royaumes: Ainsi l' attenterent-ils par quatre fois contre la defuncte Royne Elisabeth d' Angleterre, par leur Jesuite Campian ou Campiense, l' an mil cinq cens septante huict. Par Guillaume Parry l' an mil cinq cens octante quatre à ce poussé & induict par Benedetto Palmio dedans la ville de Venise, & depuis confirmé dedans Paris, par Hannibal Coldreto: Par Patrice Culan 1588. persuadé par un meschant Jesuite nommé Holt. Et par Edoüard Squirre l' an mil cinq cens nonante sept par les inductions de leur Pere Richard Walpod. Ainsi deux fois contre nostre grand Roy Henry IIII. reduict sous l' obeyssance du sainct Siege de Rome, l' une en l' an mil cinq cens nonante trois par Pierre Barriere dit la Barre, dedans la ville de Melun, au beau milieu de la trefue, l' autre en celle de Paris l' an mil cinq cens nonante quatre par Jean Chastel dedans la Paix: celuy la mené à la main par les instructions & memoires de Varade & Commole Jesuites, & cestuy-cy nourry en leur escole dedans Paris: Ainsi l' ont-ils voulu de fraische memoire pratiquer, en l' an mil six cens cinq par leur Garnet contre Jacques Roy d' Angleterre, Escosse & Hibernie, c' est à dire la grande Bretagne. Et qui est une chose pleine de pitié & d' horreur tout ensemble: C' est que tout ainsi que le Prince des Assassins du Levant promettoit un Paradis asseuré à ceux qu' il mettoit en œuvre, là & au cas qu' ils mourussent sur cette querele, aussi font le semblable nos Jesuites à leurs champions, ausquels ils administrent premierement le Sainct Sacrement de penitence, puis celuy de communion, & armez de cette devotion leur laschent franchement la bride pour executer leurs detestables parricides. Institution impie, abhominable, & abhorrente de nostre Religion Chrestienne, mais grand artifice du Diable, pour les faire redouter, & consequemment quelquesfois embrasser par les Princes & grands Seigneurs, a fin de ne tomber en leurs aguets. Et qui est un malheur admirable, ce venin s' est espandu dedans quelques autres membres de nostre Eglise. Comme nous vismes par le malheureux parricide commis le deuxiesme jour d' Aoust mil cinq cens octante neuf en la personne de nostre bon Roy Henry troisiesme, à Sainct Cloud, par frere Jacques Clement Jacobin. Que Jean Mariana Jesuite a solemnizé comme chose tres-saincte au premier livre de son institution du Prince, chapitre sixiesme. Mais pour ne m' esloigner de mon but, combien que du commencement ces Assassins demeurassent en certaine contree, toutesfois ils furent depuis espandus en forme de secte par tout le Levant, ainsi que nous tesmoigne Jean Sire de Joinville, que les appelle Beduins: Mais il est certain que leur vray nom estoit d' Assassins, comme nous apprenons de Raphael Volaterran en sa Geographie, de Paule Aemile en ses Croniques de France, & de Guillaume Nangy par moy cy dessus allegué. Nicolas Gilles en ses Annales les appelle Arsacides d' un mot corrompu. Or d' eux est venu que la posterité tant en France, qu' en Italie: (car & François & Italiens entreprenoient d' ordinaire ensemblement tels voyages de Levant) appella Assassins ceux qui de sens froid, & guet apens faisoient des meurdres, & Assaßinats le mal qui en advenoit.

Au regard de l' Apanage, qui a exercité plusieurs esprits de la France, pour sçavoir dont il prenoit son origine: il est certain que tant sous la premiere que seconde lignee de nos Rois, mesmes bien avant sous la troisiesme, les Apannages estoient incogneus entre les enfans puisnez de la Couronne, tels que nous les observons aujourd'huy. Paul Aemile, autheur duquel je fais grand compte entre tous nos Historiographes, dit que Baudoüin Comte de Flandres, & Louys Comte de Blois s' estans croisez avec le Venitien, Baudoüin s' estant emparé de l' Empire de Constantinople, departit entre ses principaux Capitaines quelques Provinces, par forme de Panage. Nous y avons adjousté quelques formalitez tirees de nostre vieille Loy Salique.

4. 27. D' une maniere assez familiere aux anciens François,

D' une maniere assez familiere aux anciens François, & mesmement aux Advocats au commencement de leurs Plaidoyez d' importance, & des harangues qui se font par les gens du Roy, en la ville de Paris à l' ouverture des Parlemens.

CHAPITRE XXVII.

D' aytant que l' artifice inusité fait tenir le juge sur ses gardes, les longues harangues de tout temps & ancienneté ont esté deffenduës és Cours souveraines de France, comme jadis en la ville d' Athenes: Mais au lieu d' icelles les anciens Advocats eurent une solemnelle coustume és matieres de consequence, d' encommencer leurs plaidoyez par quelque passage de la saincte Escriture: Dont il me plaist de rapporter en ce lieu quelques exemples des causes plus notables. En l' accusation qui fut intentee devant Louys Hutin contre Enguerrand de Marigny, Maistre Jean de Meheye Advocat, accusateur commença par ce verset, Non nobis Domine, non nobis, sed nomini tuo da gloriam. Poursuivant tout le fil de sa harangue sur ce que Enguerrand s' estoit attribué toutes prerogatives Royales: Et à tant avoir commis infinis crimes de leze Majesté: Et la cause qui fut traittee devant Philippes de Valois sur la reformation des entreprises de l' Eglise contre l' authorité du Roy, Maistre Pierre de Congneres Advocat du Roy en son Parlement de Paris prit ce theme, Reddite Caesari quae sunt Caesaris, & quae sunt Dei, Deo. Et messire Jean Bertrand Archevesque de Sens, qui plaidoit pour le Clergé, Deum timete, Regem honorificate. De la mesme façon en un plaidoyé notable qui fut tenu en plein Parlement 1432. pour les privileges de l' Université de Paris, commença l' Advocat d' icelle de cette façon: Tu es qui restitues haereditatem meam mihi. Quand maistre Jean Petit vint au Parlement pour justifier le Duc de Bourgongne de l' assassin qu' il avoit fait faire à Louys Duc d' Orleans, il commença par ce verset le 4. Mars 1407. Proximi ad proximum. Et quelques jours apres maistre Jean Cousinot plaidant pour la veufve & enfans du deffunct, prit son theme par ces mots. Haec vidua erat, quam cum vidisset dominus, misericordia commotus est super eam. Chose qui fut non seulement observee par les Advocats, mais aussi és solemnelles harangues: Comme en une question qui se presenta contre le Pape Benedict tenant son siege en Avignon, sur ce que plusieurs des Prelats de la France estoient d' avis qu' il se falloit soustraire de sa puissance, si volontairement il ne se vouloit démettre du Pontificat, Maistre Jean Juvenal des Ursins Advocat du Roy commença par ce Psalme: Viriliter agite, confortetur cor vestrum, omnes qui speratis in Domino. Concluant pour la puissance du Roy, & adherant avec l' Université de Paris. En ce mesme temps apres l' accord fait en la ville de Bourges entre la maison d' Orleans, & celle de Bourgongne, les estats estans assemblez pour confirmer cette union, & neantmoins requerir argent pour faire teste aux Anglois, Maistre Benoist Gentian Advocat envoyé par les Parisiens, commença, Imperavit ventis & mari, facta est tranquillitas. Aussi apres la malheureuse journee d' Azincour, pendant que les Bourguignons rodoient devant Paris, Maugier premier President proposa devant Louys Dauphin pour le fait des gendarmes, & pour la desolation du Royaume par le moyen des Anglois, commençant son theme par ces mots: Domine salva nos. Et aux Estats tenus en la ville de Tours devant le Roy Charles huictiesme, maistre Jean de Reilly Docteur en Theologie, & Chanoine de Nostre Dame de Paris, eleu & deputé pour porter la parole pour les trois Estats, commença le theme de sa harangue par ce verset d' Esdras, Benedictus Deus qui dedit hanc voluntatem in cor Regis: Comme semblablement en une autre harangue faicte par maistre Jean Gerson, Chancelier de l' Université de Paris, proposant pour l' Université devant le Roy Charles VI. il commença par ces mots, Vivat Rex, Vivat Rex, Vivat Rex, Tertio Regum, primo. Laquelle coustume combien que pour le jourd'huy soit demeuree seulement aux Prescheurs en leurs sermons, si est-ce qu' encores y en restoit-il quelques traces sous le regne du Roy François premier de ce nom, devant lequel maistre Jean Bouchard Advocat en la Cour de Parlement de Paris plaidant pour les Eglises conventuelles contre le Concordat fait avecques le Pape Leon, commença par ce verset addressant à Dieu sa parole. Domine scis quia dilexi, scis quia non tacui, scis quia ex animo dixi, scis quia fleus, cum dicerem, & non audirer. Remonstrant sur ce theme avec une hardiesse admirable, la desolation & desbauche qui adviendroit en l' Eglise par la rupture de la pragmatique Sanction, & extermination des Elections, qui estoient de droict divin. Soustenant qu' il n' estoit en la puissance d' homme vivant, quelque dignité qu' il eust, de les pouvoir supprimer. La suitte des ans a depuis apporté autres façons aux plaidoyez dont je ne parleray.

Bien veux-je avant que clorre ce chapitre vous discourir dont sont venuës les harangues que les Advocats du Roy font deux fois l' an aux ouvertures generales de plaidoyez en la Cour de Parlement de Paris. Car c' est une chose dont j' ay veu la naissance & accroissement de mon temps. Lors que je vins au Palais (qui fut au mois de Novembre, 1549.) cette façon de haranguer n' estoit en usage. Mais en ouvrant le pas aux octaves de la S. Martin, & de Pasques, si entre les deux Parlemens, les gens du Roy avoient observé quelques fautes aux Advocats, Procureurs, ou Solliciteurs en l' exercice de leurs charges, le premier Advocat du Roy, apres la lecture des Ordonnances, remonstroit sommairement tout ce qu' il pensoit estre de ce suject: prenant conclusions convenables. Alors le President se levoit pour prendre l' advis des Conseillers, & apres avoir fait quelque Remonstrance, prononçoit l' Arrest sur la reformation requise. Ce fait les autres Advocats venoient aux prises, & plaidoient tout ainsi qu' aux autres jours ordinaires. Car cette ceremonie estoit courte, de laquelle encores nous retenons une remarque. D' autant que combien que l' Advocat du Roy contente quelquesfois plus ses opinions, que celles du Barreau, si est-ce que le President se leve tout ainsi qu' anciennement, pour recueillir les voix des Conseillers, comme s' il estoit question de faire un Arrest, & neantmoins son project n' est que de respondre aux discours faits par l' Advocat du Roy.

Le premier qui y apporta de la façon fut maistre Baptiste du Mesnil, en l' an 1557. personnage de singuliere recommandation. Il me souvient qu' il nous entretint une demie matinee de quelques passages d' Asconius Pedianus, pour monstrer la difference qu' il y avoit dedans Rome entre l' Advocat, & le Procureur. Quelque temps apres deceda maistre Aimond Boucherat son compagnon, & par son decés fut pourveu de son Estat, maistre Guy du Faur, seigneur de Pibrac dont le nom depuis a esté en grande vogue par la France. Cettuy ayant obtenu de monsieur du Mesnil, par forme de courtoisie, de faire l' ouverture du Parlement le lendemain d' une Quasimodo, se voulut donner plus ample carriere que n' avoit fait son compagnon. Et lors ces deux beaux esprits commencerent de haranguer à l' envy l' un de l' autre, à qui mieux mieux. Du Mesnil à la Sainct Martin, & Pibrac apres Pasques. Chose depuis tournee en coustume en leurs successeurs. Au sieur de Pibrac par sa demission maistre Barnabé Brisson, homme de profonde lecture, succeda, qui le voulut renvier sur son resignant, mais d' une eloquence plus sombre, & moins relevee. Il resigna son estat à maistre Jacques Faye, Seigneur d' Espesse, lequel bien qu' il manquast aucunement en l' action, si ne devoit il rien aux autres. Il estoit d' un cerveau solide, & avoit beaucoup veu, leu, & retenu, & les passoit en belles similitudes esquelles il estoit inimitable. Tous ces braves esprits furent diversement conviez à cette nouvelle eloquence par messire Christofle de Tou premier President: qui prenoit une infinité de plaisir à les escouter, & leur respondre. Simbolizans tous en un point, qui estoit de remplir leurs harangues d' eschantillons de divers Autheurs. Chose du tout incognuë aux anciens Orateurs, tant Grecs, que Romains: & dont me plaignant un jour à monsieur d' Espesse (duquel j' estois voisin & amy) il en fit une à l' antique en l' an 1586. qui est la neufiesme des siennes, sur la loüange & recommandation de l' Eloquence: Et me dit apres que cette seule luy avoit plus cousté à faire, que trois des autres precedentes, qu' il avoit rapiecees de plusieurs passages. Le sieur de Pibrac fit imprimer de son vivant, deux des siennes: Et apres le decés du sieur d' Espesse, ses amis firent imprimer toutes les siennes, qui sont dix en nombre, plus belles paraventure, à lire, qu' elles n' avoient esté à prononcer. En l' an 1585. Maistre Jacques Mangot luy fut baillé pour compagnon, par la promotion de Maistre Augustin de Tou en l' estat de President. Cettuy au sortir de son enfance avoit esté mis par ses pere & mere en la garde de maistre Pierre Picheret, Docteur en Theologie, grand personnage, tant en mœurs, qu' erudition: lequel pour bannir de soy toute ambition s' estoit confiné en un arrierecoin de la Champagne. Là ce jeune enfant ayant eu pour miroir ce sainct object, eut depuis pour precepteur aux lettres Grecques & Latines, maistre Denis Lambin professeur du Roy en l' Université de Paris, & en Jurisprudence le grand Cuias. Il estoit fils de Maistre Claude Mangot l' un des premiers Advocats de nostre temps: sous lequel apres son retour des Universitez, il voüa un silence quatre ans entiers assidu en toutes ses consultations sans mot dire: & depuis se jettant au barreau, fit reluire en luy une jeunesse admirable entre les Advocats. Quelque peu apres il fut maistre des Requestes de l' Hostel du Roy, & en mesme temps Procureur general de la Chambre des Comptes de Paris. Par le moyen desquels deux estats, il eut entree au Conseil privé du Roy, Cour de Parlement, & Chambre des Comptes. C' est pourquoy luy qui avoit beau jugement, grande memoire, les inventions en main, la lecture des autheurs Grecs, Latins, & François, mesmes des memoriaux les plus signalez de la Chambre des Comptes, dont il avoit fait fidelles extraicts, il se rendit universel, & se forma une habitude des affaires d' Estat, de la Justice, & bonnes lettres tout ensemble. De maniere que les vertus qui reluisoient particulierement en chacun des autres, se trouverent generalement accomplies en luy. N' y ayant qu' un vice dont on le pouvoit reprendre, de ne se pouvoir estancher, mais vice qui provenoit de l' abondance de son esprit. Parler trois heures continuës ne luy estoit rien: aussi frais au partir de là, qu' au commencement. A l' ouverture d' un Parlement il fit une longue harangue, (premiere & derniere des siennes, car il fut depuis prevenu de mort) laquelle bien menagee par un autre, il en feroit à bonne mesure, trois & quatre. C' estoit pour bien dire un grand vin dedans un fraisle vaisseau, qui ne pouvoit estre de duree: Tout ainsi que je le vous pleuvy pour tel, aussi soudain, apres son decés, ce grand & judicieux d' Espesse, qui l' avoit comme son compagnon d' armes haleiné vingt mois au Parquet, ne douta de faire l' ouverture du Parlement à la sainct Martin ensuyvant, l' an mil cinq cens quatre-vingts & sept, sur la seule commemoration des vertus de cette belle ame. Ce qui n' avoit jamais esté faict pour nul autre. Estimant ne pouvoir proposer plus beau miroir aux Advocats que celuy-là. A quoy Messire Achilles de Harlay premier President, sceut fort bien repartir par une belle contrebaterie. Je ne vous parleray de ceux qui ont survescu ces Seigneurs: Leur presence me recommande d' en plus penser, & moins dire. Me contentant de vous avoir monstré au doigt, comme cette coustume s' est plantee. Peut-estre adviendra-il que tout ainsi qu' elle s' insinua inesperément entre nous, aussi se deffera elle de soy-mesme. Quoy que soit je sçay par la bouche de feu monsieur l' Advocat Marion, personnage de grand esprit, & admirable en belles pointes, qu' il desiroit pour son regard reprendre les anciens arrhemens du Parquet.