Raimond Bistors d' Arles.
Aissi col fortz castels, ben establitz,
A son guerrier si ten e si defen,
Tro 'l ven de genz e d' armas afortitz
Tan que lo venz e lo forssa e 'l pren,
Me sui d' amor defendutz tota via,
Dompna, tro vi vostre cors benestan;
Mas en vos es tot so qu' obs li avia
A mi penre, per que, merce claman,
Me rend a vos et a lei derenan.
En vos es sens qu' es de totz bes razitz,
Que us capdella ab joi et ab joven,
E tals beutatz que, chascun que us ve, ditz
Que genser es del mon, e ges no i men;
Et en vos es valors e cortesia,
Prez e honors e tot bon aib prezan.
E quant eu vi qu' amors me combatia
Ab tals armas, s' anc mi trobet tiran,
Trobet m' adoncs humil e merceian.
Domna, pres sui, e si vos no m' etz gitz
Morrai, qu' amors m' a ir' e mal talen,
Car tro que us vi non poc esser feritz
De sas armas nuls temps, mas eu enten
Que atressi m devetz esser amia;
S' al prim que us vi fui vostre ses engan,
Com m' es Amors mala et enemia!
Quar, anc nuls temps, no m' ac a son coman,
Tro que m conques ab vos que valetz tan.
Per amor sui e per mon cor traitz,
Si col rics homs es traitz per la gen
Ab cui el ven el camp, e s' es plevitz,
Que illfaill als ops; domna, tot aissi m pren
Qu' amors mi met e mos fols cors en via
Que us clam merce a lei de fin aman;
E quan vos cug preiar la lenga m lia,
Qu'el cor en ai escritz tot mon deman,
Doncs ez ab vos et amors al mieu dan.
Vostre gen cors avinen, gais, complitz
De totz los bes que a cors son plazen,
Bella dompna, m' es tan fort abellitz
Que res mas vos no m pot faire jauzen;
E si ab vos ai de joi carestia,
Ben l' auria ab cellas que non an:
Mas si com vos l' avetz tot en baillia
M' en fesessez vos ric e benanan
No us aus pregar mas que vauc m' o oran.
Cansos, vai t'en a la gensor que sia,
A Na Costanza d' Est, on tut be van,
Que tan bella non sai ni tan prezan.
Ai! Bels Fenics! merces e cortesia
Me vaill' ab vos, qu' eu no m mor' aman
E camz' el nom de TANTS TRIST en Tristan.
