Du Proverbe, Bonne renommee vaut mieux que ceinture doree.
CHAPITRE XI.
Il semble de prime face que ce proverbe soit un dire esvolé. Car je vous prie, quelle rencontre a la bonne renommee avecques la Ceinture doree? Toutesfois lisant un arrest ancien qui est encores pour le jourd'huy inseré aux Registres du Chastelet de Paris, j' estimay qu' en ce proverbe il y avoit une notable sentence, & une longue ancienneté tout ensemble. Car par arrest qui est du 28. de Juin, l' an 1420. il est porté en termes exprés que deffences sont faictes à toutes femmes amoureuses, filles de joye, & paillardes de ne porter robbes à collets renversez, queuës, ne ceintures dorees, boutonnieres à leurs chaperons, sur peine de confiscation, & amende, & que les Huissiers de Parlement, Commissaires, & Sergents du Chastelet qui les trouveroient, eussent à les mener prisonnieres. Pareil arrest fut donné & proclamé à son de trompe & cry public par les carrefours de Paris en l' an 1446. Mais outre la Ceinture doree, & collets renversez on leur deffend encores de porter pannes de gris, ny de menu verd à leurs robbes. Qui nous enseigne que la ceinture doree estoit lors une remarque de preude-femme. Parquoy celuy qui premierement mist en avant ce proverbe, voulut tout autant dire, comme quand nous disons que l' habit ne faict pas le Moine: qui est un proverbe ancien, dont usa autresfois Jean de Mehun dans son Roman de la Roze: C' est à dire que combien que celles qui vouloient faire les femmes de bien, portassent les ceintures dorees: toutesfois la bonne renommee leur estoit beaucoup plus seante, & que peu estoit la ceinture doree, qui ne l' accompaignoit d' un bon bruit. Au surplus (je diray cecy en passant) à la mienne volonté que ceux qui donnerent cest arrest eussent tourné la chance, & que non seulement és ceintures dorees, ains en toutes autres dorures, & affiquets, ils eussent fait deffences à toutes femmes d' honneur d' en porter, sur peine d' estre declarees putains: Car il n' y avroit point plus prompt moyen que cestuy, pour bannir la superfluité & bombance des Dames, & en cette façon lisons nous qu' un ancien Legislateur bannit les abus & excez qui se trouvoient és habits des Dames dans sa Republique.
