Que ce n' est pas un petit secret à un homme d' Estat d' avoir des Predicateurs à poste.
CHAPITRE XXXVIII.
Jamais meurdre ne fut plus malheureux & meschant que celuy de Louys Duc d' Orleans en l' an 1407. dont Jean Duc de Bourgongne avoit esté instigateur. Chacun crioit harou contre luy, & specialement les Princes & grands Seigneurs: Tellement qu' en la premiere colere, il fut contraint de quitter Paris & se retirer en ses pays, où apres avoir aucunement recueilly ses esprits, & sçachant l' accusation que la Doüairiere d' Orleans avoit instituee contre luy devant le Roy, il delibera de se justifier, & retourna a la ville, où il n' eut autre Advocat qu' un Maistre Jean Petit Theologien, grand Predicateur: & fut sa justification non de denier l' assassin, car il estoit trop averé, ains de soustenir qu' à bonne & juste cause il avoit esté commis, c' est à sçavoir, pour le bien du Roy & de l' Estat. Proposition qui estoit fausse, & qui du commencement fut trouvee de fascheuse digestion: mais l' ayant depuis soustenuë au Parvy nostre Dame de Paris en presence d' une infinité de personnes, elle se trouva si plausible, que tout ce que firent de là en avant ceux qui soustenoient le party d' Orleans estoient tenus pour rebelles par le peuple: Et comme ainsi fust que quelques personnages d' honneur improperassent à Petit ce qu' il en avoit fait, il leur respondit qu' il avoit douze ou treize moyens pour le soustenir, mais que le principal estoit l' obligation qu' il avoit au Duc de Bourgongne, ayant esté entretenu par luy aux estudes, & estant encores à ses gages. Raison certes tres-digne d' un Caphard. Le Duc de Bourgongne voyant quel fruit luy avoit apporté cette premiere démarche, n' eut de là en avant autre plus grand soin que de captiver la bien-vueillance de l' Université de Paris, dans laquelle se trouverent une infinité de rejettons tels que Petit, qui guerroyerent par leur caquet dans leurs chaires les pauvres Princes d' Orleans, de telle façon que la porte de la Justice leur estant clause, ils furent contraincts d' avoir recours aux armes pour se la faire à eux mesmes: empirans par ce moyen leur marché, & en fin voyans le peu d' advancement qu' ils gagnoient par les armes, userent du mesme artifice que leur ennemy, qui fut de se mettre sous la protection du grand Gerson, lequel prenant leur cause en main, fit declarer au Concil de Constance la proposition tenuë par Petit, comme heretique & erroneee. Ce maistre Jean Petit Predicateur apporta les troubles sous Charles sixiesme en France. Un autre y apporta une bonne partie du repos sous Charles septiesme. Il y eut un frere Richard Cordelier (Monstrelet le fait Augustin, soit l' un, soit l' autre, il ne m' en chault) cestuy apres avoir suivy quelque temps le party Anglois dans Paris, se rendit en fin des nostres, faisant (si ainsi le faut dire) des miracles par sa langue pour le service du Roy: mais parce que Monstrelet n' en dit qu' un mot, & que j' ay recueilly une partie de cette Histoire d' un livre escrit à la main, dont je m' aide selon les occurences, je vous en feray ce petit discours. Ce Moine avant que se faire Royal, vint à Paris en l' an mil quatre cens vingt neuf, où il prescha au charnier de sainct Innocent avec une admiration infinie de tous, & estoit son Sermon de six heures d' ordinaire. Je vous veux representer tout de son long le passage dont j' ay recueilly cette Histoire. Item le Cordelier devant dit, preschoit le jour sainct Marc à Boulongne la petite, & là se trouva tout le peuple que j' ay dit: & pour vray icelle journee à revenir dudit Sermon furent les gens de Paris tellement tournez en devotion, qu' en moins de trois ou quatre heures eussiez veu plus de cent feux, en quoy les hommes ardoient tables, & tabliers, cartes, billes, billars, & toutes choses à quoy on se pouvoit courroucer, & maugreer à jeu convoiteux. Item celuy jour, & le lendemain les femmes ardoient tous les atours de leurs testes, & les pieces de cuir, ou Baleines qu' elles mettoient en leurs chaperons pour estre plus roides, les Damoiselles laissoient leurs cornes & leurs queuës, & grand foison de leurs pompes: & vrayement dix Sermons qu' il fit à Paris, & un à Boulogne tournerent plus le peuple à devotion que tous les Sermonneurs depuis cent ans n' avoient fait. Le dernier Sermon qu' il fit à Paris fut le lendemain sainct Martin vingtsixiesme Avril mil quatre cens vingt neuf, & dit au departir que l' an qui seroit apres on verroit les plus grandes merveilles qui furent oncques. A tant l' Autheur. Or ce Religieux plein de persuasion s' estant depuis retiré pardevers le Roy Charles septiesme marchoit à la teste de l' armee: mais le bon du compte est que les Parisiens le voyans joüer nouveau roolle, aussi voulurent-ils faire de leur costé le semblable. Car en despit de luy ils retournerent sur les bombances & jeux qu' il (ils) avoient quittez, estimans que c' eust esté pecher contre le S. Esprit, s' ils eussent reformé leurs vices par les exhortations de ce frere. Exemple qui n' est pas petit au sujet present, pour monstrer de quelle puissance sont les prescheurs, specialement pendant les guerres civiles. Je ne veux pas dire qu' il n' y en ait de gens de bien, mais tant y a qu' ils sont hommes, par consequent tantost possedez d' avarice, tantost d' une ambition dereglee: & n' est pas certes sans raison que nous appellons en Latin leurs Sermons, Concions: car tout ainsi qu' en la ville de Rome les Tribuns estoient ceux qui par leurs seditieuses Harangues, que l' on appelloit Concions, remuoyent les humeurs du peuple, contre les grands, sous le masque de la liberté qu' ils luy proposoient: Aussi font souvent nos Prescheurs de mesme, sous le faux pretexte du service de Dieu, ou du bien public, selon que les Princes acheptent leurs langues, lesquels n' ont quelquesfois autre Religion en eux que celle que la commodité de leurs affaires leur enseigne. Sur ces arrhes ceux qui sont du mestier de Sermonneurs & Prescheurs trouvent tousjours quelque eschantillon mal pris dans la saincte Escriture, qui leur sert d' eschapatoire pour soustenir leur party. Ce temps pendant un pauvre peuple guidé d' un bon zele, jette l' œil sur eux, & se laisse mener par l' aureille avec une simplicité qu' il tourne puis apres en fureur selon les occasions. On dira que cestuy est un pretexte de Machiavel, qui seroit beaucoup meilleur teu que dit, mais je suis contraint de le corner à son de trompe en cette calamité où nous nous sommes veuz plongez. Parce que si vous oyez les Predicateurs du jourd'huy dedans leurs chaires, ils n' ont autres declarations dans leurs bouches que celles qu' ils font encontre Machiavel: & neantmoins il n' y a celuy d' eux qui ne soit vrayement Machiaveliste, si nous appellons Machiaveliser quand un Predicateur est aux gages d' un grand Seigneur pour induire le peuple à le suivre.
