Quel aage pouvoit avoir le jeune Clotaire lors que Fredegonde sa mere en fit pavois contre ses ennemis.
CHAPITRE III.
Je vous ay sur la fin de l' autre Chapitre recité un traict de sagesse & magnanimité admirable de Fredegonde: quand assistee de la presence du Roy Clotaire son enfant, elle fit teste à Childebert Roy d' Austrasie. Mais la question n' est pas petite, de sçavoir quel aage ce jeune Prince pouvoit avoir. SI vous parlez à Aimoïn le Moine, il vous dira au troisiesme livre de son Histoire, qu' il estoit encores à la mammelle. Placuit, dit il, cunctis quod dixerat Regina, & ex consilij sententia, regem adhuc sugentem matris ubera, ferrata agmina, & quelques lignes apres. Interea Fredegundis Clotarium filium suum proprijs gestans ulnis, usque ad locum certaminis praecedebat exercitum. Cela vous monstre que cette Royne estant à la teste de son armee, portoit son enfançon entre ses bras qui estoit encore au berceau. Les autres luy donnent huit ou neuf ans. Et c' est la cause pour laquelle nostre Ronsard en sa Franciade, balançant entre ces deux opinions, nous voulut servir de ces huict vers, parlant ainsi de Fredegonde.
Elle sans peur, ny de Dieu, ny des Loix,
Toute effrontee, ayant encor les doigts
Rouges du sang de son mary, pour taire
Par un beau fait, le meurtre, & l' adultere,
Ira guerriere au milieu des combats,
Tiendra son fils de six ans en ses bras,
(Traistre pitié) pendant à sa mammelle,
Dont son paillard aura pris la tutelle.
Quant à moy je suis tres-aise pour flater nos Chroniques, de croire que Clotaire estoit encore à la mammelle, a fin que nostre Fredegonde soit la seconde de ce nom, qui sous pareilles arrhes se rendit victorieuse de ses ennemis: car la premiere avoit esté Royne de Macedoine.
Et de fait de cette mesme creance fut nostre Roy Charles cinquiesme, & tout son Conseil, quand par son Edict de la majorité de nos Roys à quatorze ans, verifié en sa Cour de Parlement le vingt-septiesme du mois de May mil trois cens septante cinq, pour monstrer qu' il n' entendoit par fols discours enjamber sur la puissance ordinaire de la nature, il dit que Dieu distribuoit à largesse ses graces aux Roys, dont il estoit eschars envers tous les autres. Et adjouste tout d' une suite qu' on avoit autresfois veu en France, & en Macedoine, deux petits Roys en berceroles avoir obtenus deux grandes victoires. Toutesfois s' il vous plaist vous arrester au calcul & supputation des annees, il est certain & sans doute que Clotaire n' estoit lors à la mammelle. Car le Roy Chilperic son pere fut tué l' an cinq cens quatre-vingts huit. Auquel temps ce petit Prince estoit seulement aagé de quatre mois. Le Roy Gontran son oncle mourut en l' an cinq cens nonante sept. Et Aimoïn demeure d' accord que la bataille dont j' ay parlé fut seulement baillee apres son decez. Il est doncques vray de dire que Clotaire estoit lors aagé de neuf ans pour le moins. Je vous touche cette corde par forme d' une longue parenthese, mais non sans propos; car cestuy est un des placards de nostre histoire de plus grande & singuliere recommandation: Maintenant je discourray de la Royne Brunehaud ainsi que le porte la commune de nos Histoires.
