Albertet de Gap, ou Albert de Sisteron.
Atrestal vol faire de mi m' amia,
Com lo rics hom fai del bon escudier,
Que, per aisso qu' el lo serv voluntier,
Li aloigna mais sa cavallaria;
Mas a lieis non calria
D' aisso gaire temer,
Que, on mais mi faria
D'amor ni de plazer,
E plus fizel m' auria.
Fizel m' aura trop mieills que non solia,
Qu' ieu l' am totz jorns, sempre huoi mais que hier,
Que tant son plus doblat miei cossirier
Con lo sols es plus chautz contra 'l mieich dia;
E s' amors l' en fazia
La veritat saber,
Ben leu non li plairia
Qu' il me fezes doler,
Que merces l' en penria.
E si merces tant son cor humilia
Que no m laisse morir d' un desirier,
Mi, que sui sieus liges, ses parsonier,
Merce fara mesclad' ab cortesia;
E s' ieu en lieis faillia,
Mal respieg posc' aver
En nuill' autra que sia,
S' ella no m vol valer
Cui totz temps serviria.
Que ges mos cors no s cambia ni s desvia
De ben servir lo sieu cors presentier,
D' aital servir com de mi l' a mestier
De ben e d' als qu' ieu 'l faire poiria:
Qu' il sap qu' ieu non deuria
Faire mais son voler;
E si ella m disia,
D'aisso que m promet, ver,
Bel guizardon n' auria.
Bel guizardon n' aurai, sol que no m dia
Qu' ieu fatz que fols car la prec ni l' enquier,
Qu' ieu am pro mais un plazer messongier
De lieis, qu' aver d' un' autra seignoria;
Ni en tota ma via
Mon cor ni mon esper
Non vuoill de sa baillia,
So sapch' ill ben en ver,
Partir, on qu' ieu m' estia.
Cansos, en Lombardia
Vuoill que fassatz saber
Que sil bella chausia,
En cui ai mon esper,
De mi li sovenria.
Domna, on que ieu sia
Fatz vostre pretz saber,
Car jois e cortesia
E sens o fan voler,
Que us meilluran quec dia.
