Avoir laissé les Houzeaux pour denoter un homme qui est mort.
CHAPITRE XXXVIII.
Le peuple facetieusement dit assez souvent que l' on a laissé les Houzeaux, lors qu' il veut donner à entendre qu' un homme est allé de vie à trespas. Pour lequel proverbe y a une rencontre, qui fut trouvee bonne du temps de Charles VI. Enguerrant de Monstrelet nous apprend que lors que le Roy Henry d' Angleterre, qui se disoit Regent de France fut decedé au bois de Vincennes, Messire Sarrazin d' Arly, oncle du Vidame d' Amiens, aagé de 60. ans ou environ, & homme fort tourmenté de la goute, s' enqueroit volontiers des nouvelles. Au moyen dequoy l' un des siens nommé Haurenas retournant de Paris: il luy demanda s' il sçavoit rien du decez du Roy Henry, à quoy le Gentil-homme fit response que ouy, & qu' il l' avoit veu mort, & en effigie dedans la ville d' Abeville, luy racontant par le menu de quelle façon il estoit accoustré: Et comme Messire Sarrazin desirast sçavoir tout au long la parade & magnificence qui estoit au convoy de ce grand Roy, il luy demanda specialement s' il avoit bien pris garde à son image, l' autre luy ayant semblablement respondu que ouy: Or me dis par ton serment (luy fit-il) s' il avoit point de Houzeaux chaussez pour le moins jusques à la ville de Calais. Ha Monseigneur (respondit l' autre) non sur ma foy. Adonc Messire Sarrazin poursuivant: Jamais ne me croy, dit-il, s' il ne les a laissez en France: auquel mot tous ceux qui estoient presens commencerent à rire: Qui nous apprend, ou que deslors ce commun dire que nous tirons des Houzeaux estoit en usage, ou paravanture que cette rencontre fut tant favorisee du peuple, que de là en avant il fut induit de dire, qu' un homme avoit laissé ses Houzeaux quand il estoit decedé: & de fait encore que je sçache bien que quelques-fois Monstrelet se soit amusé à choses de petit effect, si semble-il que pour lors cette rencontre fut aucunement en usage par le peuple, puis que cet Historiographe a pris la peine de la nous escrire.
