Entre Chien & Loup.
CHAPITRE XVI.
Il n' y a paravanture au Recueil des Adages d' Erasme deux bestes, esquelles il ait plus employé sa plume comme au Chien & au Loup: Mais ce sont en divers jeux. Icy nous les avons accouplez ensemble, quand quelqu'un s' achemine aux champs d' un bien grand matin, ou d' un grand soir, de telle façon qu' il luy est mal aisé voyant une beste, de juger si c' est un Chien ou un Loup: & voulant denoter ce temps, nous en avons faict ce proverbe, qui est entre Chien & Loup. Duquel Jean Antoine de Baïf voulut faire de nostre temps son profit au premier livre de sa Franc.
Comme le simple oiseau qui cherche sa pasture,
Lors qu' il n' est jour ne nuit (quand le veillant berger
Si c' est ou Chien ou Loup ne peut au vray juger)
Ne pensant au danger, ains à sa nourriture
S' empestre en la pantiere, &c.
Je vous laisse le demeurant du Sonnet, par lequel il dit avoir esté surpris tout ainsi comme l' oiseau. Chose qui ne regarde le discours du present chapitre. Seulement vous veux-je dire que ce proverbe a pris d' une bien longue ancienneté sa naissance chez nous. Et de fait Guillaume le Breton au troisiesme livre de sa Philippide discourant comme quelques Seigneurs Anglois vouloient dresser une algarade à nostre Roy Philippe Auguste, poursuit de cette façon sa pointe.
Postea vix summos aurora rubescere montes
Fecerat, & valles nondum primordia lucis
Attigerant, interque canem distare, lupúmque,
Nullus adhuc poterat aliquid discernere visu.
Quand je vous allegue le Breton, je le vous pleuvy avoir esté des domestiques du Roy dont il trompeta les grandeurs apres son decez. Que si les Gentils-hommes sont tres-aises d' authoriser leur noblesse d' une longue ancienneté, je ne seray marry de mettre ce proverbe sur les rangs, puisque d' un si long temps je le voy avoir esté en essence, & s' estre continué jusques à nous.
