De quelques tromperies de Princes par mots à double entente.
CHAPITRE VII.
Voulant deduire quelques tromperies gentilles tirees de mots de deux sens entre les François, il m' est tombé en la memoire une Histoire de mesme sujet d' Aurelian Empereur de Rome, lequel ayant mis le siege devant la ville de Thiane, pour donner cœur à ses soldats, protesta publiquement que si cette ville estoit prise, il ne pardonneroit à un seul chien: De laquelle parole les soldats faisans leur profit (car ils pensoient qu' un chacun passeroit au fil de l' espee) s' encouragerent de telle sorte qu' ils forcerent la place. Toutes-fois ce sage Empereur cognoissant de combien il empireroit sa renommee, & aussi quel tort il feroit à sa conscience de perdre tant d' ames tout d' un coup, soudain fit proclamer à son de trompe de ne tuer aucun homme ny femme: Et comme quelque Capitaine s' advantura de luy dire que ce n' estoit pas la promesse qu' il leur avoit faite avant qu' ils liurassent l' assaut. L' Empereur luy respondit que suivant sa promesse il donnoit puissance de mettre tous les chiens à mort sans aucune exception. Presque de cette mesme façon se trouva escorné Louys Duc d' Anjou, qui avoit esté adopté par Jeanne Roine de Sicile, & Comtesse de Provence: Ce Prince desirant se mettre en possession du Royaume de Sicile, qui luy avoit esté delaissé, tira vers cette coste là avec grande armee contre Charles, qui avoit espousé la niepce de la feuë Royne Jeanne, lequel seul comme plus proche habile à succeder, luy donnoit empeschement. Or s' estoit-il emparé de toutes les places plus fortes, & gardoit cette reigle de ne faire aucune saillie, combien qu' il fut souvent sommé par Louys de venir en champ de bataille, a fin que par la decision d' une journee l' on peust cognoistre auquel des deux appartenoit à juste tiltre le Royaume, d' autant que son armee mourant de faim & longues maladies, alloit tous les jours à veuë d' œil en empirant & diminuant. Quoy voyant Charles cauteleux, qui vouloit donner la baye à son ennemy, importuné de plus en plus de donner bataille, manda un jour par un Roy d' armes de Louys, qui estoit venu pour cet effect, que puis que son Maistre avoit si grande envie de choquer, qu' il asseurast de sa part qu' à certain jour qu' il luy nomma, il le verroit armé en blanc, & en tel equippage qu' il n' y avroit que redire, laquelle response fut fort agreable à Louys, qui pour cette cause fit tous ses preparatifs, & le jour venu ordonna ses gens en bataille rangee, attendant le semblable de son ennemy: Mais luy pour satisfaire à une partie de sa promesse, toutes-fois d' un autre sens que ne prenoit le Duc d' Anjou, monta sur un bon coursier, & armé de haut appareil vint voltiger en la face du Duc, luy mandant qu' il luy avoit tenu parole. De ce pas r'entra par un autre lieu dans la ville, dont Louys confus & despit, voyant son armee estre plus minee & defaicte par l' injure du temps, que par l' effort de son ennemy, delibera de reprendre l' adresse de France, & à son retour mourut. D' une telle tromperie furent deceus plusieurs François par les Anglois, mais avec plus grande compassion: Car Henry Roy d' Angleterre apres avoir espousé Catherine de France, fille de Charles VI. luy estant solement accordé le Royaume, en faveur de son mariage, voulut reduire sous sa puissance toutes les villes, desquelles Charles Dauphin de France s' estoit emparé. Dedans la ville de Melun au nom du Dauphin s' estoit mis le gentil Capitaine Barbezan, accompagné de plusieurs braves Seigneurs, qui soustindrent de telle furie le siege du Roy Henry, que ny par assauts, ny par mines, ne peut jamais la ville estre forcee. Au moyen dequoy l' Anglois tourna toutes ses pensees à les affamer. En quoy il besongna de sorte qu' au long aller ils furent contraints un mois entier faire abstinence de pain, vivans seulement de la chair de leurs chevaux, lesquels encores au lieu de foin & avoine ils nourrissoient des pailles de leurs licts coupees menu: Et neantmoins en cette disette de viures, lors que leurs ennemis sonnoient quelque allegresse ou fanfare dedans leur camp: ceux-cy ausquels manquoient clairons & trompettes pour estre bien entendus, leur respondoient hautement au carillon de leurs cloches. Qui rendoit l' ennemy esbahy à merveille de la magnanimité des tenans. D' autant que par plusieurs pauvres gens, qui par necessité de maladie avoient esté contraincts vuider la ville, ils avoient eu certains advertissemens de la defaillance des viures. En fin estans reduits en toute extremité, force leur fut de venir à quelque honneste composition, & à tant furent deleguez quelques-uns d' entr'eux pour parlementer avecques les Anglois, qui leur permettoit s' en aller le baston au poing: mais jamais les autres n' y voulurent condescendre, aymans trop mieux choisir la mort que tel party. Parquoy le Roy Henry finalement leur accorda qu' ils sortiroient leurs vies & bagues sauves. Ce que les pauvres Gentils-hommes François entendans sainement, luy envoyerent les clefs: Toutes-fois luy estant entré dans la ville, leur dist qu' il ne fausseroit sa foy, & qu' ils s' en iroient leurs vies & bagues sauves, mais en perpetuelles prisons, ausquelles il les confina dedans Paris. Exemple certes barbaresque & indigne d' un gentil Prince: car la magnanimité d' eux, employee au service de leur souverain Seigneur, les devoit garentir d' un tel tour: & à dire le vray cet acte estoit aussi peu honorable, que de celuy qui avoit promis surseance d' armes de quinze jours, durant lesquels il fourrageoit toutes les nuicts les terres de son ennemy, disant que dans sa capitulation il n' avoit esté faicte aucune mention des nuicts.
