De la juste vangeance de Dieu, pour une impieté commise de fils à pere, & au contraire repremiation pour pieté.
CHAPITRE XXIII.
Combien qu' il ne soit en nous d' assoir nostre jugement sur les jugemens de Dieu, toutesfois pour autant qu' il commanda par expres à celuy qui veut viure heureusement, de porter toute obeïssance à son pere, je me suis advisé d' inserer en ce lieu deux exemples fort recommandables pour cet effect, tous contraires, & escheus en deux freres germains, Robert & Henry, celuy-là fils aisné, & cestuy puisné de ce grand Guillaume le Bastard. Lequel par sa vaillantise & proüesse, ayant reduit sous son obeïssance le Royaume d' Angleterre, & rendu l' Escosse tributaire, Robert paradventure ennuyé que son pere pour sa longue vie ne luy quittoit la place, ou bien poussé d' un mauvais vent entreprist de le guerroyer au pays de Normandie, aidé à cette entreprise de la faveur du Roy de France Philippes I. du nom, qui volontiers eust empesché d' agrandir à veuë d' œil un voisin si pres de ses portes: Laquelle guerre fut conduite jusques à tel poinct, que le pere & le fils avecques leurs gens descendirent en champ de bataille, qui ne prist fin sinon par la rencontre du pere & fils, sans se cognoistre. En quoy fut la meslee telle que Robert bleça griefvement son pere. Ce que dés l' instant mesme venu à sa cognoissance par le haut cry que jetta Guillaume pour la douleur qu' il sentit, Robert esmeu d' une juste compassion, soudain luy demanda pardon, & ainsi larmoyans & l' un & l' autre par une taisible instigation de leur sang, entrerent en reconciliation: Ce neantmoins Dieu duquel les promesses ne furent jamais menteuses, depuis luy donna tout le loisir de recognoistre sa faute, pour avoir faict la guerre à son pere. Car estant Guillaume decedé, pendant que Robert voyageoit en la Germanie, combien que par droict de nature la couronne luy appartint, si est-ce que Guillaume le Roux sien frere, qui le secondoit en aage, l' en frustra. Qui causa entre les deux freres depuis grandes guerres, & querelles, pour lesquelles assopir fut finalement arresté qu' à Robert demeureroit le Duché de Normandie, & à Guillaume le Royaume d' Angleterre, à la charge que le premier d' eux mourant sans hoirs procreez de son corps, le survivant luy succederoit. Les choses sembloient estre par cette capitulation en bon train: Toutesfois voyez comme l' on ne peut fuir son malheur, estant depuis cette grande croisade juree, qui fut faicte du temps de Godeffroy de Boüillon, entre les Princes Chrestiens, Robert pour n' estre veu demeurer derriere, engagea son Duché de Normandie à son frere, pour tenir compagnie aux autres Princes Pelerins, auquel voyage apres plusieurs memorables exploicts d' armes, il fut d' un commun consentement de tous, eleu Roy de Hierusalem. Toutesfois adverty de la mort de Guillaume, il n' accepta le Royaume qui luy estoit offert, esperant r'entrer en celuy d' Angleterre tant par le moyen de son droict d' ainesse, que par les traictez & accords qui s' estoient passez entr'eux. Ainsi retournant plein d' espoir, trouva neantmoins le Royaume, & son Duché possedez par Henry son plus jeune frere, qui le mena par plusieurs guerres à telle raison, que finallement il le prit, & fit tenir sous seure garde, l' espace de 25. ans, en laquelle ce pauvre Prince desherité de tous ces estats, & honneurs finit ses jours miserablement.
Au contraire Henry prospera de là en avant en toutes ses affaires d' un grand heur. Ayant esté sa posterité continuee à la couronne jusques à nous: Faveur du Ciel que quelques autheurs ont voulu attribuer à un acte de pieté qu' il observa envers son pere apres sa mort. Car estant Guillaume son pere decedé, ainsi qu' on le portoit en terre, avec toutes pompes & magnificences, en un monastere qu' il avoit fait bastir, se presenta un Gentilhomme, qui comme demy forcené s' opposoit à cet enterrement, disant que le lieu où avoit esté construite cette Eglise luy appartenoit, & que par force, & authorité absoluë il avoit esté par Guillaume despossedé de son bien, sans qu' il en peust du vivant de luy avoir recompence. Parquoy requeroit qu' on eust à luy en faire raison pour la descharge de l' ame du trespassé. Pendant laquelle controuverse, survint une si grande ravine d' eau du Ciel, qu' un chacun abandonna ce grand Roy, horsmis son fils Henry, lequel esmeu d' une pieté filiale, tint compagnie à ce pauvre corps, jusques à ce qu' il le vit posé au lieu où il faut que chacun de nous face estat de s' acheminer. O miserable condition de ce genre humain, puis qu' un si grand Prince & Seigneur se trouva au dernier service qu' on luy devoit, non seulement laissé des siens, mais à peine peut trouver un coin de terre pour donner repos à ce corps qui tout le temps de sa vie avoit couru une infinité de travaux: Et vrayement à bonne raison ce grand Souldan d' Egypte mourant par son testament ordonna qu' avant d' estre ensevely, son successeur fist porter parmy tout son camp, au bout d' une lance le linceul duquel il devoit estre ensevely, faisant à sçavoir à chacun que de toutes ses conquestes il ne rapportoit autre despoüille que ce drap. Or pour ne m' esgarer de mon propos, on tient que depuis cette pieté pratiquee par le fils envers le pere, toutes ses entreprises prospererent de là en avant tres-heureusement, tout ainsi comme au rebours depuis la desobeïssance de Robert, tous ses projets & desseins s' esnanouïrent (sic : esvanouïrent) avec le vent en fumee.
