XIV. Adriani Papae IV. Breve ad eundem Episcopum super componenda ipsius cum Comite Urgellensi discordia, circa anno MCLVI.

XIV. 

Adriani Papae IV. Breve ad eundem (pone eumd.) Episcopum super componenda ipsius cum Comite Urgellensi discordia, circa anno MCLVI. (Vid. pág. 52). 

Ex arch. Eccl. Urgell. 

Adrianus Episcopus servus servorum Dei. Venerabili fratri Urgellensi Episcopo salutem et apostolicam benedictionem. Nobilis vir Urgellensis Comes, sicut accepimus, compunctus in se ipso, et conversus ad cor, pacem tecum et concordiam habere desiderat, et in comunionem postulat fidelium revocari, paratum se omnimodis asseverans, vel convenire tecum tanquam cum Episcopo suo pacifice, vel quod justum fuerit, medianti tibi judicio, exhibere. Unde quoniam oblatam a delinquentibus satisfactionem non debemus abicere, qui eos ad conversionis gratiam debemus modis omnibus invitare, per praesentia scripta fraternitati tuae mandamus, quatinus sufficienti cautione in manus venerabilis fratris nostri B. Narbonensis Archiepiscopi per pignora vel obsides ab eodem Comite de facienda tibi justitia, et satisfactione praestanda, exhibita, a vinculo eum excomunicationis absolvas, et postmodum ad praesentiam eiusdem fratris nostri, et karissimi filii nostri R. Barchinonensis Comitis, cum ab eis fueris vocatus, accedas, et quod ipsi inter vos judicaverint, suscipias et observes. Gratissimum autem nobis existet pacifice si cum eo potueris convenire. Ex hoc enim plenior et purior inter vos poterit concordia reformari. Datum Lateranni II. idus decembris. 

XIII. Litterae Eugenii Papae III. ad Bernardum Sancti, Urgellen. Episc. ob varia crimina apud Sed. apostol. accusatum, anno MCL aut circiter.

XIII. 

Litterae Eugenii Papae III. ad Bernardum Sancti, Urgellen. Episc. ob varia crimina apud Sed. apostol. accusatum, anno MCL aut circiter. (Vid. pág. 51). 

Ex arch. Eccl. Urgell. 

Eugenius Episcopus servus servorum Dei. Venerabili fratri B. Urgellensi Episcopo salutem et apostolicam benedictionem. Quotiens ea de fratribus et coepiscopis nostris audimus, quae illos reprehensibiles ostendunt, et tristitiam nobis generant, et de correctione ipsorum nos oportet esse solicitos. Venerabilis frater noster B. Terraconensis Archiepiscopus ad nostram praesentiam veniens adversus te, frater Episcope, defensionem erroris proposuit. Petrus quoque Guillermi Archidiaconus, et B. Petri, Urgellensis clericus super crimine symoniae se accusatores personam tuam dixerunt. Quia igitur crimina, quae personis ecclesiasticis, et praecipue fratribus nostris impinguntur, silentio praetermittere non possumus, nec debemus, causam ipsam venerabili fratri nostro W. Ebredunen. Archiepiscopo Apostolicae Sedis Legato audiendam, discutiendamque commisimus. Praesentium itaque tibi auctoritate mandamus, quatenus cum ab eodem fratre nostro fueris evocatus, eius praesentiam adeas, super praedictis capitulis respondere paratus. Praeterea nichilominus tibi mandamus, ut ea quae post appellationem ad nos factam, P. Archidiacono, et B. per te vel per alios abstulisti, eis cum integritate restituas. Datum Ferentini XVI. kalendas aprilis. 

XII. Acta consecrationis Ecclesiae S. Martini de Cardos in Comitatu Palliarensi, anno MCXLV.

XII. 

Acta consecrationis Ecclesiae S. Martini de Cardos in Comitatu Palliarensi, anno MCXLV. (Vid. pág. 49). 

Ex autogr. in arch. monast. Gerren. 

Anno Dominicae Incarnationis C.XLV. post M. Era Millessima C.LXXXIII Indicione VIII. venit Domnus Bernardus Sancti Spiritus gratia cooperante Urgellitanae Ecclesiae Episcopus in Paliarensium par... (vi)lle quae dicitur Cardos, Dei verbum praedicare Christum desiderantibus. Incolae vero gaudentes... tantes in eius sermonibus, rogaverunt illum ut consecraret Ecclesiam in honore Beati... loco, qui vocatur Civitas antiquitus. Pontifex itaque videns hominum praedictae... votum, satisfecit peticioni eorum. Feria namque post Domini Circumcisionem II. nonas.... venit Domnus Pontifex ad jam dictum locum, comitatus multitudine Clericorum hac... et consecravit praelibatam Ecclesiam in honore Beati Martini Confessoris et reposuit ibi reliquias Sancti Germerii et Salutiferi ligni Domini nostri Jesu Christi et eiusdem cenae panis et aliorum Sanctorum. Et quoniam praedicta ecclesia est solitaris et paupercula praedictae vallis habitatores ad decantandam et inluminandam jam dictam ecclesiam in suorum remisione peccaminum de unaqueque parrochia per unumquemque annum persolvunt quod in hac subscriptum est cartula. Parrochia de Ribera I. modium de Blad. Surri dimidium mod., Annas et Bonestarre I. mod., Estaon I. mod., Carcibros dimidium mod., et homines de Asnet rogavit Domnus Praesul ut faciant illam Ecclesiam cantare et inluminare: et homines convenerunt ita facere sicut Episcopus praecepit. In tali conventu, ut clericos de Sancto Martino serviat ipsam Ecclesiam de Asneto, et cum ipsis oblacionibus vel elemosinis gubernet Ecclesiam Sancti Martini. Aros I. mod., Esturi I. mod. Bennetegenestarre I. mod., Ladros I. mod., Serraeleseret I. mod., Ladorre I. mod., Boldis e Boldis I... Aniet dimidium, Tavascan I. mod. Ego quippe Vidal Ezc. totum quod habeo vel habuero aut adquisiero usque ad diem mortis meae totum ab integrum dono et concedo Beato Martino, et habitatoribus praedicti loci in manu Domni praefati Episcopi, id sunt, vineas, terras, casas, ortos. Omnia dono sicut superius scriptum est Sancto Martino, si... imento (impedimento) alienae personae. 

Ego siquidem Bernardus Dei gratia Urgellensis Episcopus haec praedicta concedo praedictae ecclesiae et ibidem habitantibus clericis, et quidquid deinceps rite oblatum fueri in eodem loco. Et iterum concedo ut quisquis indulgenciae causa ad dedicationem huius ecclesiae cum luminaribus advenerint, de poenitencia unde digne satisfecerit, XX. dies Deo actore ei condonamus. = Sig+num Bernardi Urgellensis Episcopi. = Sig+num Vitalis qui hoc laudo. = Si quis inquietaverit hoc in quadruplum componat, et nisi satisfecerit excomunicacioni subjaceat. = Sig+num Guillermi de Planedes. = Ato Presbyter rogatus scripsit et subscripsit die et anno quo supra.