XXIII. Bernardi Comitis Bisuldunensis donatio, qua ecclesiam S. Mariae de Bisulduno subjicit monasterio S. Ruphi ad Rhodanum. an. MLXXXIV. (1084)

XXIII.

Bernardi Comitis Bisuldunensis donatio, qua ecclesiam S. Mariae de Bisulduno subjicit monasterio S. Ruphi ad Rhodanum. an. MLXXXIV. (1084) (Vid. pág 83).

Ex arch. S. Mariae Bisuldun. 

Anno ab Incarnatione Domini millesimo octuagesimo quarto: ego Bernardus gratia Dei Comes Bisuldunensis sciens ob hoc me potentis saecularis personae dignitate sublimatum, quatenus ecclesiam Christi totis debeam viribus augmentare, propter remedium animae meae, consilio et assensu Domini Berengarii Praesulis Gerundensis, necnon et aliorum nobilium virorum, clericorum scilicet atque laycorum, dono Deo et ecclesiae Sancti Ruffi, quae sita est supra fluvium Rhodani, et Domino Arberto ejusdem loci Abbati, atque clero ibidem Domino servienti ecclesiam Beatae Mariae Virginis intra muros Bisulduni fundatam (a), cum omnibus, quae ad eamdem quocumque modo pertinent ecclesiam; quam donationem perpetuo volo semper jure consistere, tali videlicet firmitate, ut nec a me, nec a filio meo, nec ab alia aliqua persona possit dirumpi (- dirrumpere), sed quamdiu canonice vixerit Domnus Albertus, Abbas Sancti Ruffi, successoresque ejus, et ejusdem loci clerici teneant, habeant, possideant, ordinent et disponant secundum regulam Sanctissimi Patris Augustini praefatam ecclesiam Beatae Dei Genitricis Mariae cum omnibus, quae sub ejus haberi noscuntur ditione quaecumque Pontificum ac Principum, et aliorum virorum collatione, absque mei et omnium hominum inquietatione. Quod si ego, vel aliqua utriusque sexus persona contra hanc scripturam donationis venerit ad irrumpendum, omni genere excommunicationis percutiatur in perpetuum. Acta est haec scriptura donationis sexto kals. octobris anno vigesimo quinto regni Philipi Regis. = S. + Bernardi Comitis Bisuldunensis, qui hanc scripturam fieri jussi, firmavi, et testes firmare rogavi. = S. + Willelmi Vice-comitis. = S. + Petri Vice-comitis. = S. + Arnaldi Joannis. = S. + Guillelmi Otonis. = S. + Raymundi Odegarii. = + Gaufredus canonicus et levita scripsit in Castro novo sub die et anno quibus supra.

(a) Huius donationis confirmationem vide in Bulla Paschalis Papae II infra ad annum 1115 (.) Quod autem exterae nationis monasterio ecclesiae nostrae subderentur, in causa fuit tum Principum pietas, tum eius monasterii sanctitatis fama, ex quo et Episcopi saepius postulati, et canonicorum regularium domus ad illius normam constitutae; multe preterea dona eidem a Principibus potissimum Barchinonensibus collata sunt.

XXII. Compositio Willelmi, Comitis Bisuldunensis cum Berengario Gerundensi Episcopo, unde ecclesiam S. Mariae Bisuldun. consecratam esse constat. an. MLV. (1055)

XXII.

Compositio Willelmi, Comitis Bisuldunensis cum Berengario Gerundensi Episcopo, unde ecclesiam S. Mariae Bisuldun. consecratam esse constat. an. MLV. (1055) (Vid. pág. 79).

Ex arch. eiusd. eccl. 

Sit notum hominibus cunctis praesentibus, et futuris quod ego Willelmus (b) Comes Bisuldunensis, tactus amore Dei Omnipotentis, oravi Dominum Berengarium Gerundensem Episcopum magnis ad me venire praecibus, ut consecraret ecclesiam Sanctae Dei Genitricis Mariae, quae est in castello vocitato Bisulduno; quod digne et elegantissime praedictus Praesul peregit. 

(b) Statim in huius instrumenti limine cernis, lector, Willelmum hunc in vivis adhuc agere anno 1055; et integra quidem valetudine, utpote qui S. Sepulchri visitationem aggredi meditabatur. Inde corrigendus est Petrus de Marca, qui in Marca Hisp. pág. 544. ait Villelmum supremum diem anno 1052. obiisse. 

Quapropter ego jam dictus Guillelmus Comes, gratia ea, scilicet Dei, ob honorem Dei ejusque gloriossisimi sepulcri, quod cupio adire, parco atque omnino indulgeo Pontifici praefato cunctarum reatus quaerimoniarum, quae mihi insunt de eo. Preterea libenti animo fideliter dono et trado Omnipotenti Deo ejusque Beatissimae Mariae, seu etiam praedicto Episcopo omnes usaticos et albergas, et quicquid ullo modo recte aut injuste inherant mihi in dominicatura, quam dicunt Bascara, et in pertinentiis ejus omnibus, et quae inibi fuerunt patris mei atque Comitum retroactis temporibus, ut libere et quiete praedictus Praesul habeat praefatam dominicaturam, et omnes illius successores ammodo et usque in aeternum. Post hanc deliberationem a me recte peractam, non sit fas ulli Comitum sequentium quiquam mali, vel inquietudinis ibi exercere, sed semper in jure Dei potentialiter honorabiliterque incombulse consistere. Ego namque Willelmus jam dictus Comes prompta voluntate perfeci hoc donum Deo, nihil juris retento, insistente Domno Raymundo Barchinonense Comite, et Marchione, et Poncio Vice-comite, et Guillelmo, et Berengario Abbate, et multitudine Procerum, non solum clericorum verum etiam laycorum, et monachorum. Et ut hoc donum ratum omni tempore permaneret, accepi duos mulos a praefato Episcopo. Quod manu propria firmavi, et ut ab omnibus firmaretur rogavi. Actum est hoc quarto kals. septembris anno vigesimoquinto Henrici Regis. = + Willelmus Comes. = + Willelmus Vicecomes. = + Arnallus Joannis. = + Raymundus Adamari. = + Bernardus Joannes. = + Andreas Abba... = + Scriptum per manum Guillelmi Gerundensis Clerici die et anno prefato.

XXI. Bernardi Comitis Bisuldunensis, Willelmi filii, donatio ad ecclesiam S. Mariae Bisuldunens. de decima monetae *cusae in Bisulduno an. MLXXIV. (1074)

XXI.

Bernardi Comitis Bisuldunensis, Willelmi filii, donatio ad ecclesiam S. Mariae Bisuldunens. de decima monetae *cusae in Bisulduno an. MLXXIV. (1074) (Vid. pág. 70.)

Ex arch. eccl. S. Mariae Bisuldun. 

Notum sit omnibus hominibus presentibus, et futuris, quia ego Bernardus gratia Dei Comes recognosco, quoniam pater meus Willelmus Comes bonae memoriae dedit Domino Deo et Sancto Ligno Crucis, et Sanctae Mariae cujus ecclesia est consecrata juxta murus Bisulduni, ipsa moneta de praescripto Bisulduno, et ego teneo eam per benefitium praedictae Sanctae Mariae. Et propter hoc in nomine Domini, ego praedictus Bernardus, gratia Dei Comes, donator sum Domino Deo et Sancto Ligno Crucis et Sanctae Mariae et Sancto Michaeli, et Sancto Genesio, et omnibus Sanctis, quorum reliquiae sunt in praedicta ecclesia, propter eleemosinam, et propter animam praedicti patris mei Willelmi et fratris mei, vel omnium parentum meorum seu propter remedium animae meae de omnibus peccatis meis, ipsam decimam de ipsa moneta, quae fuerit facta in praedicto Bisulduno amodo et usque in sempiternum, tam de auro, quam de argento quam in monetatico, et in capite, ut praedictus locus Sanctae Mariae semper quiete teneat, et habeat et possideat sine blandimento de ullo homine vel foemina, in tali videlicet ratione, ut nec ego, nec aliquis Comes, qui futurus sit post me, neque Abbas, neque aliquis clericus possit ipsum praedictum decimum aliquo malo ingenio tollere, aut commutare vel alienare, neque per fabum, neque per ullum assensamentum, sed semper stet in dominio, et in communitate canonicae praedicti loci. Et si est homo, vel homines, foemina vel foeminas, qui tollat, aut tollant, aut tollere voluerint hoc superius scriptum, id est, ipsum decimum de ipsa moneta, in iram Dei Omnipotentis incurrat, et fiat participatio ejus cum Datan, et Abiron, et cum Juda traditore, qui Dominum tradidit, et sit anathema, maranatha. Et sicut superius scriptum est, sic trado in dominio, et potestate Sanctae Mariae, et aliorum Sanctorum sine ulla reservatione, et sine enganno. Quod si ego donator, aut ullus homo, vel foemina, qui contra hanc cartam donationis venerit ad inrumpendum, vox ejus in nullo proficiat, et pro temporali poena velut sacrilegus componat, et in antea ista scriptura donationis incomvulsa permaneat omnique tempore. Facta ista carta donationis quinto idus septembris anno decimo quinto regni Philippi Regis. = Sig+num Bernardi gratia Dei Comitis, qui istam cartam donationis fieri jussi, firmavi, et testes firmare rogavi. = Sig+num Raimundi Comitis, qui hoc donum laudo et firmo (a). Sig+num Arnalli Delorcio. = + Guillelmus Sacerdos, qui istam cartam donationis rogatus scripsi et subscripsi die et anno quo supra. 

(a) Hunc Raymundum existimo fuisse Comitem Palliariensem: aut verius Raim. Berengarium huius nominis III. Comitem Barcinonensem, qui mortuo Bernardo Comite, et in comitatu Bisuldunensi successit, illiusque donationem ratam haberi voluit.