LV. Decretum electionis D. Bernardi de Berga, Episcopi Barchinonensis.

LV. 

Decretum electionis D. Bernardi de Berga, Episcopi Barchinonensis. (Vid. pág. 198.)

Ex arch. eccl. Barcin. cubic. III. tit. Constitut. scrin. 4, núm. 10.

Reverentissimo Patri et Domino W. Del dignatione Tarraconensi Archiepiscopo, Apostolicae Sedis Legato universus clerus ecclesiae Barchinonensis, necnon et populus eiusdem civitatis cum reverentia salutem et obedientiam. Vestrae discretionis excellentiam indubitanter scimus, Pater et Domine, non ignorare qualiter et in quem modum Barchinonensis ecclesia suo carens Pastore proprii Rectoris consolationem rationabili proposito canonice debuit affectare. Quapropter ne per Pastoris absentiam grex Dominicus perfidorum luporum morsibus pateret, et ne raptoris improbi praeda fieret, nos eiusdem ecclesiae canonici, Sanctorum Patrum statuta et antiquae libertatis nostrae consuetudinem sequentes ad petitionem plebis, invocata prius Sancti Spiritus gratia, communi voto necnon et consensu, elegimus nobis in Pontificem Domnum Bernardum, ecclesiae nostrae Archidiaconum, virum utique prudentem, hospitalem, litteratum, moribus ornatum, castum, sobrium et mansuetum, Deo et hominibus per omnia placentem. Praedictum igitur electum ad vestrae benignitatis praesentiam mittere curavimus, unanimiter postulantes et obsecrantes ut per Spiritus Sancti gratiam et vestram ministrationem nobis illud consecretis in Pontificem, quatenus auctore Deo... Pastor idoneus praeesse valeat et prodesse, nosque sub eius sacro regimine Domino semper militemus ... Ut autem omnium nostrum vota in hanc electionem convenire noscatis, in hoc canonico … manibus subscripsimus electioni ... Actum est VII kalendas julii, anno ab Incarnatione Domini M.C.LXXII. 

Raimundus Primicherius, levita. = Bernardus de Podioalto (Puigalt). = Magister V. praesbiter et canonicus. = Berengarius de Fontajada, subdiaconus (a: Hic moritur anno 1205.). = Pontius de Milgrato (Malgrat), levita et canonicus. = Raimundus, levita et Decanus. = Petrus de Rivipullo, subdiaconus. = Berengarius de Palaciolo. = Berengarius de Arcubus, levita et canonicus. = Berengarius Rubeus, levita et canonicus. = Martinus Parvus, levita et canonicus. = Bernardus de Serriano, subdiaconus canonicus. = Petrus de Rivosicco, canonicus. = Arnaldus de Villamaiori, eiusdem ecclesiae Stator Regis. = Raimundus, praesbiter. = Petrus, praesbiter. = Pontius, praesbiter Sancti Johannis. = Geraldus de Bonastre, eiusdem ecclesiae praesbiter.

LIV. Convenientia pacis et treugae inter Alphonsum II. Aragoniae Regem, et Lupum, Regem Valentiae et Murciae: anno MCLXVIII. (1163)

LIV.

Convenientia pacis et treugae inter Alphonsum II. Aragoniae Regem, et Lupum, Regem Valentiae et Murciae: anno MCLXVIII. (1163) 

(Vid. pág. 197.) 

Ex arch. reg. Barcin.

Sit notum cunctis quod ego Geraldus de Jorba convenio persolvere XXV. millia morabat. pro Rege Lupo (domino) meo Ildefonso, Regi Aragonensi, et Guillermo de Montepessulano. Tali scilicet modo, quod usque ad XXX. dies primos venturos habeam tibi Guillermo, vel ...  (ille cui) tu mihi mandaveris V. millia paccatos de supra dictis XXV. mille morabat.; et quod hoc tibi, Guillerme, sic attendant ... tibi frater meus Guilermus de Cervaria et Lodoreng; et ego facio tibi jurare Guillermum de Alcharaz filium meum, qui … si ego non persolvero tibi vel cui tu mandaveris, jam dicta V. millia morabat. usque ad jam dictos XXX. dies, teneant tibi, Guillerme, et Domino Regi ostaticum pro illis V. mille morabat, ubicumque tu, Guillerme, volueris, et eis mandaveris a Gerunda usque Illerdam. Reliqua vero XX. millia morabat. Rex Lupus persolvet tibi, vel cui tu mandaveris, usque ad Nativitatem Domini primam venientem, vel quam citius ego potero ab illo habere. Ego vero Rex convenio tibi Geraldo de Jorba quod teneam pacem Regi Lupo; et facio hoc tibi jurare Peregrino de Castello Azolo (Castellazoli y variantes), et Blascho Romeu, meo maiori domo, et Ximinio de Artusela, meo Alferiz (alférez); et convenio tibi sub illo eodem sacramento quod ipsi pro me tibi faciunt, quod ego faciam tenere et observare ipsam pacem ab hominibus meis Regi Lupo et quod faciam eam teneri et jurari a Petro de Castello Azolo, Sancio Enegons de Darocha, Galindo Exameniz de Belxit (Belchite), Petro Ortiz et Ximinio de Orrea (Urrea). Et ego Guillermus de Montepessulano convenio tibi Geraldo de Jorba quod faciam istos praedictos tibi jurare, sicut Dominus meus tibi promittit, pro posse meo. Aut si non potero hoc facere (fer ho; hacerlo), tenebo tibi ostaticum, ubicumque tu mihi mandaveris a Gerunda usque Ilerdam, donec supra dicta V. millia morabat. sint tibi persoluta cum illo gravamine quod inde feceris. Et postquam isti supra dicti juraverint, statim mea erunt supra dicta V. millia morabat. ita quod ex tunc non tenebor tibi de hiis V. mille morabat. sed tantumodo de ipsa pace, quod teneatur per bonam fidem secundum meum posse, a proximis kalendis may venturis usque ad duos annos. Simili quoque modo convenio ego Geraldus tibi Domino meo Ildefonso Regi Aragonensi, et tibi Guillermo de Montepessulano, quod Rex Lupus firmet hanc pacem per suos Alchadits, et solvat praedicta statutis temporibus. Juro ego Guillermus de Cervaria tibi Domino meo Ildefonso Regi Aragonensi, et tibi Guillermo de Montepessulano quod tenebo ostaticum, sicut superius scriptum est, per bonam et rectam fidem sine engan per Deum et haec sancta IIII. evangelia. Similiter juro ego Lodoreng. Similiter juro ego Guillermus de Alcharaz, mandato patris mei Geraldi de Jorba. Juro ego Blascho Romeu, maiordomo ex mandato Domini mei Ildefonsi, Regis Aragonensis, quod tenebo et faciam tenere pacem, Regi Lupo secundum meum posse per bonam fidem sine engan a proximis kalendis may primis venientibus usque ad duos annos. Similiter juro ego Peregrinus de Castello Azolo. Similiter juro ego Ximinius de Artusela. Actum est hoc in presentia Domini Archiepiscopi Terrachonensis, Episcopi Barchinonensis, Hugonis de Baucio, Achuionis de Castro novo, Guillermi Raymundi Gantelmi, Guillermi Ulrici et Gerbaldi anno ab Incarnatione Domini millesimo CLXVIII. nonis novembris. Ego Bernardus de Calidis, scriba Regis scripsi hanc cartam cum litteris supra positis in linea II. et III. et V. et VI. et rasis et emendatis in linea X. et XI. et feci hoc sig+num.

LIII. Charta pacti initi inter Ferdinandum, Hispaniarum Regem, et Alphonsum, Regem Aragonum: an. MCLXII.

LIII.

Charta pacti initi inter Ferdinandum, Hispaniarum Regem, et Alphonsum, Regem Aragonum: an. MCLXII. (1162) (Vid. página 195.)

Scripturae titulus custos est memoriae. Ideoque ego Fernandus Dei gratia Ispaniarum Rex convenio hoc scripto vobis, consanguineo meo Ildefonso Dei gratia Regi Aragonensi et Comiti Barchinonensi, qui meam sororem ducitis in uxorem, et religione sacramenti firmo cum Archiepiscopis, Episcopis, Comitibus et Baronibus terrae meae facientibus vobis hominium et mecum sacramentum quod ego consilio et auxilio cum omnibus meis sim vobis fidelis amicus et vestri corporis et honoris tutor, defensor atque adiutor contra omnes homines et foeminas qui sunt in regno vestro et extra regnum vestrum, tam Christianos quam Sarracenos et praecipue contra Regem Navarrae eiusdemque terram et homines, et quod nullum inimicum vestrum foveam in regno meo nec in vestro, nec vassallum meum nec vestrum, et sim amicorum vestrorum amicus et inimicorum inimicus, nec faciam cum Rege Navarrae nec cum aliquo inimico vestro treguas nec pactum sine consilio et mandato vestro, sed illos quos potero vestrae ditioni per pacem submittam, et quos non potero per pacem, per vim pro posse vobis subdam. Si quis vero meus vasallus in hoc pacto mecum esse noluerit, honorem et terram ei auferam, et de eo quantum mandaveritis faciam. Supra scriptum autem pactum et convenientiam tenebo et tenere faciam omni tempore per fidem rectam sine vestro engan. Hoc pactum et hanc convenientiam sacro et stabili juramento firmatam feci vobis post obitum patris vestri in Agreda V. kalendas octobris, quando per manum Bernardi, Terrachonensis Archiepiscopi, et Guillermi, Barchinonensis, et Petri, Caesaraugustani, et Martini, Tirasonensis Episcoporum, atque Baronum terrae vestrae in defensionem et tutelam vos et terram vestram suscepi. Et ego Ildefonsus Dei gratia Rex Aragonensis et Comes Barchinonensis, convenio vobis, Fernando Dei gratia Regi Ispaniarum, consanguineo et sororio meo, quem loco patris tutorem ac defensorem meum et terrae meae suscepi, et religione sacramenti firmo cum Archiepiscopis, Episcopis, Comitibus et Baronibus terrae meae facientibus vobis hominium et mecum sacramentum quod ego consilio et auxilio cum omnibus meis sim vobis fidelis amicus et vestri corporis et honoris defensor atque adjutor contra omnes homines et foeminas qui in regno vestro sunt et extra regnum vestrum, tam Christianos quam Sarracenos et praecipue contra Regem Navarrae, eiusdemque terram et homines, et quod nullum inimicum vestrum foveam in regno meo nec in vestro, nec vasallum meum nec vestrum, et sim amicorum vestrorum amicus et inimicorum inimicus; nec faciam cum Rege Navarrae nec cum aliquo inimico vestro treguas nec pactum sine consilio et mandato vestro, sed illos quos potero vestrae ditioni per pacem submittam, et quos non potero per pacem, per vim pro posse vobis subdam. Si quis vero meus vassallus in hoc pacto mecum esse noluerit, honorem et terram ei auferam et de eo quantum mandaveritis faciam. Supra scriptum autem pactum et convenientiam tenebo et tenere faciam omni tempore per fidem rectam sine vestro engan. Hoc pactum et hanc convenientiam sacro et stabili juramento firmatam feci vobis post obitum patris mei in Agreda V. kalendas octobris, quando per manum Bernardi, Terrachonensis Archiepiscopi, et Guillermi, Barchinonensis, et Petri, Caesaraugustani, et Martini, Tirasonensis Episcoporum atque Baronum terrae meae in defensionem et tutelam vestram me et terram meam suscepistis. Actum est hoc sub era M.CC. = Juro Ego Fernandus Dei gratia Ispaniarum Rex, quod sicut superius scriptum est et melius ad utilitatem de vobis Rege Ildefonso, consanguineo meo intelligi potest, ita omni tempore tenebo et tenere faciam per bonam fidem sine engan, per Deum et haec sancta IIII. evangelia. = Et ego similiter Ildefonsus Dei gratia Aragonensis Rex et Barchinonensis Comes juro quod sicut superius scriptum est et melius ad utilitatem vestram intelligi potest, ita omni tempore tenebo et tenere faciam per bonam fidem sine engan per Deum et haec sancta IIII. evangelia. = Ego Fernandus Dei gratia Rex Hispanorum hoc convenientiae scriptum + propria manu et signo meo roboro et confirmo. = Huius rei testes sunt in quorum praesentia facta est praescripta convenientia ex parte Domini Regis Fernandi, Johannes, Toletanus Archiepiscopus, Petrus, Miduniensis, Ordonius, Salamantinus, Celebrunus, Seguntinus, Johannes, Oxomensis Episcopi, Alvarus Rodiz, Nunno Fernandiz, Ferrandus Poncii, signifer Regis, Petrus Pelagii Pauper, Nunno Melendiz, Velascho Melendiz, Munnio Sanxo. = Et ex parte Domini Regis Ildefonsi Bernardus, Terrachonensis Archiepiscopus, Guillermus, Barchinonensis, Petrus, Caesaraugustanus, Martinus, Tirosonensis Episcopi, Fortunio Acenarz, Blasco, Petrus Urtiz, Sancius Enegons, Palacinus, Galindus Examenz, Marcus, Peregrinus, Petrus Lobez de Luna, Petrus Lobez de Lusia, Arpa, Fortunio Destada (d' Estada), Petrus Dalcala (d' Alcalá), Petrus Pardus, Petrus Darvanes, Marcus de Rada, Guillermus de Castro Vetulo, Guillermus de Cervera. = Poncius levita qui hoc scripsit +.