XXV. Poncii de Jardino, Episcopi Maioricensis constitutio

XXV.

Domini Poncii de Jardino, Episcopi Maioricensis constitutio qua cavetur ne clerici pueros levent de sacro fonte, qui sibi intra tertiam consanguinitatis lineam coniuncti non sint, an. MCCXCVIII. (Vid. pág. 154.)

Ex lib. Constitut. eccl. Maioric.

Quoniam inimicus noster non dormit, sed multis multiplices parare festinat insidias, et frequenter ut durius feriat in lucis Angelum se transformat, curandum est provide sic huius vitae cursum peragere, quod cum venerit non inveniat nos inhermes, sed virtutis incrementis *accineti (no se ve bien), deiecta huius hostis vesania, mereamur feliciter Sanctorum sedibus collocari. Quo circa nos Poncius Dei gratia Episcopus Maioric. de fratrum nostrorum consilio presenti decreto salubriter statuimus, ut nullus de canonicis nostris seu aliis quibuscumque clericis in nostra civitate vel diocesi constitutis, filios aliquorum sibi non coniunctorum citra tertiam lineam parentelae audeat de sacro baptismo suscipere, nec sibi ex sacramento huiusmodi compatres facere nec comatres, nisi cum ratione sui oficii voluerit aliquos baptizare. Qui vobis contrarium fuerint, nisi iminente forsitan hiis qui baptizandi fuerint, mortis periculo, et alii inveniri non possint, qui eos de dicto sacro baptismo suscipiant, tamquam nostrae constitutionis violator malivolus, correctione debita ad arbitrium iudicis castigetur. Quod est actum III. non. octob., anno Domini M.CC.LXXXX octavo. = Nos Poncius Dei gratia Episcopus Maioric. subscribimus. = Ego Bereng. de Cunillis, Archidiac. Maioric. subscribo. = Ego Bartolomeus Valentini, Thesaurarius Maioric. subscribo. = Ego Arnaldus de Turri, canonicus et Praepositus Maioric. subscribo. = Ego Petrus de Turricella, canonicus Maioric. subscribo. = Signum Jacobi de Marina, notarii publici. Maioric. qui hoc scribi fecit et clausit.

XXIV. Bulla Bonifacii Papae VIII. qua insulam Minoricarum ad diocesim Maioricensem pertinere decernit, 1295

XXIV.

Bulla Bonifacii Papae VIII. qua insulam Minoricarum ad diocesim Maioricensem pertinere decernit, an. MCCXCV (1295). (Vid. pág. 152.)

Ex origin. in arch. eccl. Maioric.

Bonifacius Episcopus servus servorum Dei. Venerabili fratri Poncio, Episcopo Maioricarum, salutem et Apostolicam benedictionem. Cum insula Minoricarum de novo de manibus Sarracenorum erepta, et ad cultum nominis Christiani redacta fore noscatur, et per hoc cuius diocesani Episcopi iurisdictioni eadem insula subiecta esse deberet, hucusque non fuerit ordinatum; nos, nolentes ut deinceps occasione huiusmodi, habitatores eiusdem insulae circa spiritualia defectum aliquem patiantur, insulam ipsam tibi tamquam proprio diocesano, et episcopali Sedi Maioricarum subesse, ac omnia iura episcopalia; quae tam ex lege diocesana, quam iurisditionis competunt, ad te tuosque successores Maioricarum Episcopos, qui pro tempore fuerint, in eadem insula pertinere, auctoritate Apostolica decernentes, tibi et eisdem successoribus praesentium tenore concedimus, ut praefata jura omnia exercere libere in perpetuum in praedicta insula valeatis. Tu itaque praefectus ad ista, sic de hominibus ipsius insulae in spiritualibus tuae curae commisis paternam sollicitudinem habeas, quod sicut pastor bonus eis ita praesis ut prosis, ipsique sub tuo salutari ac provido regimine spiritualibus proficiant incrementis. Nulli ergo, etc. Si quis autem, etc. = Datum Anagniae XV. kal. augusti, pontificatus nostri anno primo.

XXIII. Clementis IV. Jacobo, Regi Maioricarum, 1248

XXIII.

Clementis IV. litterae quibus Jacobo, Regi Maioricarum iniungit ut decimas ab ecclesia Maioricensi plene percipi patiatur, an. MCCXLVIII (1248). (Vid. pág. 144.)

Ex cartor. eccl. Maioric. quod librum. viridem (llibre verd : libro verde) ibi vocant, fol. 51.

Clemens Episcopus servus servorum Dei. Dilecto filio nobili viro Jacobo (a) nato carissimi in Christo filii nostri, illustris Regis Aragonum, salutem et Apostolicam benedictionem. Sua nobis venerabilis frater noster Episcopus, et dilecti filii Capitulum Maioric. petitione monstrarunt, quod dudum inter bonae memoriae Maioric. Episcopum, et carissimum in Christo filium nostrum, illustrem Regem Aragonum, patrem tuum super decimis insulae Maioricae, quae de dioecesi Maioricae existit, materia questionis exorta, tandem inter Episcopum et Regem praedictos, absque consensu ipsius Capituli, quaedam compositio intervenit, talis videlicet quod idem Rex duas partes, dictusque Episcopus tertiam partem decimarum perciperent earumdem, si ad hoc assensus accederet Romani Pontificiis, ad quem Maioric. ecclesia inmediate noscitur pertinere. Et licet in compositione huiusmodi eiusdem Rom. Pontificis non intervenisset assensus, tu tamen qui eandem insulam tenes, pretextu talis compositionis dictas duas partes decimarum percipis earundem, in dictorum Episcopi et Capituli ecclesiae praefatae non modicum praeiudicium et gravamen. Quare praefati Episcopus et Capitulum humiliter petebant a nobis ut providere super hoc eis et eidem ecclesiae paterna sollicitudine curaremus. Cum itaque decimas suis Dominus exhibendas ministris in signum universalis dominii reservarit, nobilitatem tuam rogandam duximus attentius et hortandam, quatinus eosdem Episcopum et Capitulum ob reverentiam Apostolicae Sedis et nostram libere patiaris cum integritate percipere decimas memoratas, ipsosque sibi dimittas liberas et quietas. Preces nostras in hac parte taliter impleturus, quod exinde tibi a Retributore bonorum omnium perempnis vitae premium, et a nobis condigna proveniat actio gratiarum. = Dat. Viterbii idus junii, pontificatus nostri anno quarto.

(a) Filio scilicet Jacobi I. Aragonum Regis, qui regnum Maioricarum a patre regendum cum comitatibus Ceritaniae, Rossilionis, etc., suscepit (leo uscepit).