VII. Clementis Papa III. bulla, qua S. ecclesiam Tarraconensem sub Sedis Apostolicae protectione constituit ac confirmat, an. MCLXXXVIII. (1188)

VII. 

Clementis Papa III. bulla, qua S. ecclesiam Tarraconensem sub Sedis Apostolicae protectione constituit ac confirmat, an. MCLXXXVIII. (1188) (Vid. pág. 79.) 

Ex autogr. in arch. eiusd. ecclesia. 

Clemens Episcopus servus servorum Dei. Dilectis filiis Raymundo Preposito et canonicis sanctae Ecclesiae Tarraconen. tam praesentibus quam futuris regularem vitam professis in perpetuum. Quotiens a Nobis petitur quod religioni et honestati convenire dinoscitur, animo nos decet libenti concedere, et petentium desideriis congruum suffragium impertiri. 

Ea propter, dilecti in Domino filii, vestris justis postulationibus clementer annuimus, et praefatam ecclesiam Sanctae Teclae, in qua divino estis obsequio mancipati, sub Beati Petri et nostra protectione suscipimus, et praesentis scripti privilegio communimus. In primis siquidem statuentes, ut ordo canonicus qui secundum Deum et Beati Augustini regulam, per bonae memoriae Bernardum (a) quondam Tarraconen. Archiepiscopum in eadem ecclesia institutus esse dinoscitur, perpetuis ibidem temporibus inviolabiliter observetur. Praeterea quascunque possessiones, quaecumque bona praedicta ecclesia in praesenciarum juste et canonice possidet, aut in futurum concessione Pontificum, largitione Regum vel Principum, oblatione fidelium, seu aliis justis modis praestante Domino poterit adipisci, firma vobis vestrisque successoribus et illibata permaneant. In quibus haec propriis duximus exprimenda vocabulis: locum ipsum, in quo praefata ecclesia sita est, cum omnibus pertinentiis suis, medietatem omnium decimarum Tarraconae et Tarraconen. territorii, sicut ipsum territorium terminatur in carta quondam Barchinonen. Comitis, in qua illud ecclesiae vestrae donavit, ex dono, videlicet, memorati Archiepiscopi. Item ex ejusdem donatione medietatem totius dominicaturae suae tam de terris quam de vineis et plantis, ortis, molendinis et furnis, de omnibus etiam adquisitionibus, sive de terra sive de mari, et de omnibus justitiis, sive de omnibus oblationibus et defunctionibus, et aliis omnibus, quae ad Archiepiscopum pertinere videntur, sicut in ejusdem Archiepiscopi scripto autentico plenitus continetur (b). Libertates quoque et immunitates, rationabiles consuetudines ecclesiae vestrae concessas, necnon et institutiones a memorato Archiepiscopo regulares in eadem ecclesia provide factas et hactenus observatas, sicut in ejus scripto autentico continetur, ratas habemus, eosque futuris temporibus illibatas manere censemus. Cum autem generale interdictum terrae fuerit, liceat vobis clausis januis, exclusis excomunicatis et interdictis, non pulsatis campanis, suppressa voce divina officia celebrare. Decernimus ergo, ut nulli omnino hominum fas sit praefatam ecclesiam temere perturbare, aut ejus possessiones auferre, vel ablatas retinere, minuere, seu quibuslibet vexationibus fatigare, sed omnia integra conserventur eorum, pro quorum gubernatione ac sustentatione concessa sunt, usibus omnimodis profutura: salva sedis Apostolicae auctoritate, et Terragonen. Archiepiscopi canonicâ justitiâ. Si qua igitur in futurum ecclesiastica saecularisve persona hanc nostrae constitutionis paginam sciens contra eam temere venire temptaverit, secundo, tertiove commonita, nisi reatum suum congrua satisfactione correxerit, potestatis, honorisque sui dignitate careat, reamque se divino juditio existere de perpetrata iniquitate cognoscat, et a sacratissimo Corpore ac Sanguine Dei et Domini Redemptoris nostri Jesu Xpti, aliena fiat, atque in extremo examine districtae ultioni subjaceat. Cunctis autem eidem loco sua jura servantibus sit pax Domini nostri Jesu Xpti. quatinus et hic fructum bonae actionis percipiant, et apud districtum Judicem praemia aeternae pacis inveniant. Amen, amen, amen.

Ego Clemens catholicae Eclesiae Episcopus subscribo. = Loco sigilli + Domine doce me facere voluntatem tuam. = Ego Theobaldus Hostien. et Velletren. Episcopus subscribo. = + Ego Johannes presbyter Cardinalis tit. Sti. Marci subscribo. = + Ego Laborans presbyter Cardinalis Stae. Mariae transtiberim tit. Calixti subscribo. = + Ego Pandulfus (quizás Randulfus) presbyter Cardinalis basilicae XII. Apostolorum subscribo. = + Ego Melior presbyter Cardinalis Sanctorum Johannis et Pauli tit. Pamachii subscribo. = + Ego Petrus presbyter Cardinalis tit. Sanctae Ceciliae subscribo. = + Ego Radulfus tit. Sanctae Praxedis presbyter Cardinalis subscribo. = + Ego Petrus tit. Sti. Clementis presbyter Cardinalis subscribo. = + Ego Bobo tit. Stae. Anastasiae presbyter Cardinalis subscribo. = + Ego Alexius tit. Stae. Sussanae presbyter Cardinalis subscribo. = + Ego Petrus presbyter Cardinalis tit. Sti. Petri ad vincula subscribo. = +Ego Jordanus presbyter Cardinalis Stae. Pudentianae tit. Pastoris subscribo. = + Ego Jacobus diaconus Cardinalis Stae. Mariae in Cosmidyn subscribo. = + Ego Gratianus Sanctorum Cosmae et Damiani diaconus Cardinalis subscribo. = + Ego Octavianus Sanctorum Sergii et Bachi diaconus Cardinalis subscribo. = + Ego Soffredus Stae. Mariae in via lata diaconus Cardinalis subscribo. = + Ego Bovus Sti. Georgii diaconus Cardinalis subscribo. = + Ego G. G. Stae. Mariae in porticu diaconus Cardinalis subscribo. = + Ego Johannes Felix diaconus Cardinalis Sti. Eustachii juxta Templum Agrippae subscribo. = + Ego Johannes Sti. Theodori diaconus Cardinalis subscribo. = + Ego Bernardus Stae. Mariae Novae diaconus Cardinalis subscribo. = + Ego Gregorius Stae. Mariae in aquiro diaconus Cardinalis subscribo. = 

Datum Lateran. per manum Moysi Stae. Romanae Ecclesiae subdiaconi, vicem agentis cancellarii VII. idus junii, indictione sexta, Incarnationis Dominicae anno M.CLXXXVIII. pontificatus vero Domini Clementis Papae III. anno primo.

(a) Bernardum scilicet Tort, qui vitam regularem primus omnium in hanc Ecclesiam invexit anno 1154. Unde frustra S. Oldegarius eius rei auctor a nonnullis inducitur. 

(b) Vide supra ad annum 1154 et 1159.

XXIII. Charta restitutionis decimarum civitatis Illerdensis. MCLXXXVIII

XXIII. 

Charta restitutionis decimarum civitatis Illerdensis quas eidem ecclesiae Comes Urgellensis usurpaverat: an. MCLXXXVIII. (1188) (Vid. pág. 115.)

Ex archiv. eccl. Illerden.

Quae a modernis geruntur memoriae scripturarum comendantur, ne in posterum a perversis modo aliquo subvertantur. Inde est quod ad notitiam cunctorum pervenire volo ego Ermengaudus Dei gratia Urgellensium Comes qualiter dimitto, reddo atque diffinio per me et per successores meos integre et sine omni diminutione omnes illas decimas Ilerdensis civitatis et tocius sui territorii et omnium suorum terminorum, tam castrorum mearum dominicaturarum, quam aliunde, quas injuste usurpavi et contra formam juris et equitatis, et contra statuta et diffinicionem patris mei violenter abstuli; reddo, inquam, dimitto atque diffinio integre et sine omni fraude Deo et Beatae Mariae Sedis Ilerdae et vobis Berengario, Ilerdensi Episcopo et canonicis eiusdem ecclesiae et omnibus successoribus vestris in perpetuum, pro quibus ego et mea terra vinculo excomunicationis eramus subiecti: et promito Deo et Beatae Mariae semper Virgini et vobis B. Ilerdensi Episcopo et ecclesiae Ilerdensi et canonicis ipsius ecclesiae in manu B. Terrachonensis Archiepiscopi, quod de cetero non accipiam neque accipere faciam ipsas predictas decimas pro quibus eram excomunicatus, nec ego nec aliquis homo vel femina per me aliquo modo eas accipiet, nec ero auctor seu defensor alicui qui aliquid de decimis predictae ecclesiae acceperit vel accipere voluerit ullo unquam in tempore, ymo ero defensor et adiutor contra omnes homines et feminas. Promitto etiam et convenio quod nunquam de cetero Ilerdensem ecclesiam pro jam dictis decimis vexabo vel inquietabo, et nunquam amplius neque ego neque aliquis per me decimas jam dictas ab Ilerdensi ecclesia, seu a clericis eius repetam vel repetere faciam. Insuper etiam pro ipsis decimis quas injuste vobis abstuli et violenter usurpavi preter id quod ad instantiam precum mearum et multorum amicorum meorum atque proborum hominum predictus B. Ilerdensis Episcopus et canonici eiusdem ecclesiae mihi condonaverunt, restituo eidem ecclesiae et vobis B. Ilerdensi Episcopo et canonicis ipsius ecclesiae D. morabatinos lupinos et aiares boni auri rectique ponderis ad vestram voluntatem. Si qua vero persona secularis vel ecclesiastica hanc paginam nostrae diffinitionis sacramento nostro confirmatam, ausu temerario infringere temptaverit, indignationem Dei incurrat, et nisi satisfecerit, excomunicationi semper subjaceat, et ut superius scriptum est, firmum ratum atque inconvulsum omni tempore permaneat et inviolabiliter a me et ab omnibus successoribus meis custodiatur, et fideliter observetur. = Ego Ermengaudus Dei gratia Urgellensis Comes sacramento a me corporaliter tactis sacrosanctis Evangeliis praestito, bono animo et spontanea voluntate confirmo. = Ego Raimundus de Rivellis super animam Comitis mandato ipsius idem juro. Facta carta XVIII. kalendas julii anno Domini Incarnati M.C.LXXX.VIII. = Sig+num Ermengaudi Urgellensis Comitis qui hoc firmo et concedo et testes firmare rogo. = Sig+num Alvirae uxoris meae quae hoc concedit. = Sig+num Guillermi de Cervaria. = Sig+num Raimundi de Rivellis. = Sig+num Guillermi de Fluviano. = Sig+num Guillermi de Concabela. = Sig+num Arnaldi de Sanaugia. = Sig+num Raimundi de Zolivela (ça Olivela, Olivella, Solivella). = Sig+num Petri de Belvis. = Sig+num Gombaldi de Gissona. = Sig+num Guillermi Percheti. = Sig+num Petri Sicfrem. = Sig+num Isarni de Tolosa. = Sig+num Bernardi de Girona. = Sig+num Guillermi de Rezes. = Sig+num Guillermi Balbi. = Sig+num Petri Balbi. = Sig+num Poncii de Isarno. = Sig+num Petri de Raimundo Bernardi. = Sig+num Arnaldi de Samatano. =  Sig+num Petri de Tarascone. = Sig+num Stephani de Marimundo (Marimon). = Sig+num Guillermi Lambrez. = Sig+num Raimundi de Lerato. = Sig+num Petri de Porta Rege. = Sig+num Guillermi Frealandi. = Sig+num Arnaldi Gras Bajuli Comitis. = Ego Johannes de Ager precepto Domini Ermengaudi, Comitis Urgellensis hanc cartam scripsi et hoc + feci. = Ego Johannes scriptor hanc cartam scripsi et de manu mea hoc sig+num feci.