Jeux de Paulme, Bonnets ronds.
CHAPITRE XV.
Au milieu des affaires serieuses il n' est point hors de propos de donner quelque relasche à son esprit. Je veux que ce chapitre soit de cette marque, & par forme de passe temps conjoindre les jeux de Paulme, avec les Bonnets ronds. Car aussi est-ce un deduict qui est ordinairement aimé par les escoliers. Il me plaist doncques icy discourir dont vient que nous appellons jeux de Paulme, les Tripots, où nous prenons nostre esbat avec des Raquettes, & non avecques la paulme de la main, & les Bonnets que portent les gens de robbe longue, Bonnets ronds, combien qu' ils soient quarrez. Cela est estrange maintenant, & sera paravanture plus à l' advenir, & tel se mocquera de telles recherches, comme trop basses, qui peut estre en communs propos ne sera marry d' en faire son profit.
Lors que les Tripots furent introduits par la France, on ne sçavoit que c' estoit de Raquette, & y joüoit-on seulement avec le plat de la main, & de pelotes: chose que je descouvre d' un vieux livre en forme de papier journal, dont je m' aide souvent en ces miennes Recherches. En l' an 1427. (dit-il) vint à Paris une femme nommee Margot aagee de vingt-huict ans, qui estoit du pays de Hainault, laquelle joüoit mieux à la Paulme qu' oncques homme eust veu, & avec ce joüoit de l' avant main, & de l' arriere-main tres-puissamment, tres malicieusement, & tres habillement, comme pouvoit faire homme, & y avoit peu d' hommes qu' elle ne gagnast, si ce n' estoit les plus puissans joüeurs, & estoit le jeu de Paris, où le mieux joüoit en la ruë Garnier sainct Ladre, qui estoit nommé le petit Temple. Passage que vous voyez authorizer en tout & par tout mon opinion, de laquelle je me croy d' avantage, par ce qu' autresfois parlant à un nommé Gastelier, il me fit un discours qui est digne d' estre recité. Cet homme en sa jeunesse avoit esté bon joüeur de Paulme, & depuis fut long temps Huissier de la Cour, & venant sur l' aage, resigna son Estat: mais quelque ancienneté d' aage qu' il eust (car quand il m' aprit ce que je diray, il estoit aagé de 76. ans & plus) si ne pouvoit-il oublier son premier deduict. Et de fait il n' y avoit jour que s' il y avoit quelque belle partie en son quartier, il n' en voulust estre spectateur. C' estoit un plaisir auquel il finit ses jours, & moy jeune homme qui n' y prenois pas moins de plaisir que luy, le gouvernois de fos à autre par occasion. Un jour entre autres il me compta qu' en sa jeunesse il avoit esté des premiers joüeurs de Paulme de son temps, mais que le deduit en estoit tout autre, parce qu' ils joüoient seulement de la main, & poussoient de telle façon la pelote que fort souvent elle estoit portee au dessus des murailles, & lors les uns joüoient à mains descouvertes, & les autres pour se faire moins de mal y apportoient des gands doubles. Quelques uns depuis plus fins, pour se donner quelque advantage sur leurs compagnons y mirent des cordes, & tendons, a fin de jetter mieux & avec moins de peine la balle. Ce qui se pratiqua tout communément. Et finalement de là s' estoit introduite la Raquette telle que nous voyons aujourd'huy, en laissant la sophistiquerie du Gand: Ha! vrayement dis-je lors à par moy, il y a grande apparence d' estimer que le jeu de Paulme vient de là: par ce que l' exercice consistoit principalement au dedans de nostre main ouverte, que nous appellons Paulme, depuis lisant le passage que je vous ay cy-dessus recité, j' en fus du tout confirmé.
Pareille mutation est advenuë aux Bonnets que nous appellons Bonnets ronds, combien qu' ils soient quarrez. Car anciennement les plus grands portans les Chapperons sur leurs testes, l' usage petit à petit s' en estant perdu, cela demeura seulement aux gens de robbe longue, enquoy l' on s' aidoit du Bourlet qui est rond, lequel environnoit le circuit de nos testes, & ce surplus du chaperon pendoit d' un costé, & de l' autre on environnoit son col: Chose qui ne se peut mieux representer que par des petits Marmouzets qui sont encores au commencement des barreaux de la Chambre doree du Parlement de Paris. Cela estoit penible & une grande charge de teste, au moyen dequoy il fut trouvé bon de retrancher tous ces grands apentis du Chaperon, & se reserver seulement ce qui representoit le Bourlet pour couvrir la teste. C' est pourquoy on s' advisa de faire avec grandes aiguilles des Bonnets ronds qui representoient le Bourlet (& paravanture furent-ils appellez Bonnets au lieu de Bourlets par un doux eschangement de l' un à l' autre) ce qui continua longuement. Car encores de ma jeunesse les plus vieux Theologiens prenans à Religion de ne rien changer des vieilles coustumes, en portoient. Et y avoit un petit monde de peuple qui en vivoit en cette grande ruë des Cordelieres, aux fauxbourgs sainct Marceau de Paris, lesquels furent fort long temps en mauvais mesnage avec les Escoliers, jusques à faire une forme de guerre civile les uns contre les autres. A ces Bonnets ronds on commença d' y apporter je ne sçay quelle forme de quadrature grossiere & lourde, qui fut cause que de mes premiers ans j' ay veu qu' on les appelloit Bonnets à quatre brayettes: le premier qui y donna la façon, fut un nommé Patrouillet, lequel se fit fort riche Bonnetier aux despens de cette nouveauté, & en bastit une fort belle maison en la ruë de la Savaterie, qui appartient aujourd'huy à Monsieur du Val Conseiller. Depuis, le Bonnet ayant changé de forme, luy est toutesfois demeuré le nom de Bonnet rond. Coustume toutesfois tres-inepte, mesmes que nous reparions nos testes rondes de Bonnets quarrez. Enquoy l' on peut dire que par une grande bigarrerie nous avons par hazard trouvé la quadrature du cercle, amusoir ancien des Mathematiciens, où ils ne peurent jamais donner attainte.
