Nul n' est Prophete en son pays.
CHAPITRE XXVIII.
Jamais Proverbe ne fut plus veritable que cestuy: Car il nous a esté donné de la main de celuy qui en l' un de ses principaux tiltres se glorifioit d' estre la mesme Verité. Comme aussi le devons nous pour tel recognoistre. Chacun estant sans luy plongé dans l' abysme des tenebres, & neantmoins encores reçoit ce Proverbe quelque explication: Parce que de le prendre cruëment, & d' estimer que nul ne soit Prophete en son pays, nous avons veu le contraire par plusieurs exemples, mesmes par sainct Jean Baptiste son Precurseur, qui non seulement fut mis au rang des Prophetes, ains estimé Prince de tous autres Prophetes: Aussi en voyons nous d' autres dans la Bible avoir predit une infinité de choses sur l' avenement futur de nostre Seigneur, lesquels avoient pris leurs naissances au lieu mesmes où ils exerçoient leurs Propheties. Doncques la verité est que sous cest Adage, nostre Seigneur Jesus-Christ nous voulut enseigner que naturellement le peuple mesprise celuy qu' il a veu en son pays venir d' un bas lieu en un grand rang, & fait plus d' estat de l' autre dont il ne sçait les commencements & progrés, comme mesme cela se justifie par deux exemples, l' un tiré du vieux Testament, l' autre du Nouveau. Quand Dieu eut appellé Saül fils de Cis, conducteur d' asnes, à la Couronne des enfans d' Israël, il luy departit par mesme moyen l' esprit, & don de Prophetie: Et comme le peuple le voyoit, au milieu des autres Prophetes, prophetiser, il commença de s' en mocquer: Disant, n' est-ce pas icy le fils de Cis? comme s' il eust voulu dire, se peut-il faire que cestuy qui estoit extraict d' un si bas lieu, & auquel nous avons veu conduire les asnes, peut avoir attaint à ce hault poinct de Prophetie? Le semblable advint à nostre Seigneur, lors que faisant des miracles paradoxes devant tous, plusieurs ne se pouvoient induire à y croire. Comment, disoient-ils, n' est-ce pas icy le fils de ce Joseph charpentier, que nous avons veu entre nous, qui se mesle maintenant de faire des miracles? Car ils avoient opinion que Jesus Christ estoit vray enfant de Joseph. Toutesfois en telles affaires, la longue habitude & continuë de nos actions, fait puis apres oublier au peuple la memoire de ce que nous fusmes en nostre jeunesse. Ceux qui se veulent rendre plus admirables en leurs devotions, doivent espouser une solitude, & ne communiquer pas d' ordinaire avecques le peuple. Les frequentations, & privautez que nous avons des uns aux autres, diminuent je ne sçay quoy de l' opinion que l' on avoit conceuë de nous. Soit que cela procede, ou de nos imperfections, ou imperfections des autres qui nous mesurent à leur aulne: Je veux dire qu' estans toutes choses selon le sens humain accomplies en nous, ils y trouvent à redire par une envie, ou deffaut qui est en eux. Cela est cause que nostre sage Philippes de Commines en son histoire du Roy Louys XI. deffend sur toutes choses, les entre-veuës des Princes, comme n' apportans autre fruit le plus souvent, qu' un rabais de la reputation qu' ils avoient les uns des autres.
