Premier abus qui s' est trouvé en la promotion des Professeurs du Roy qui en produit plusieurs autres, au prejudice de l' Université.
CHAPITRE XX.
Advint en l' an 1566. que Dampetre Cozelle Sicilien, fut pourveu par la mort de Pasquier Hamel de la place de lecteur du Roy aux Mathematiques, homme qui entrant en la chaire se trouva si disgracié, qu' il ne sçavoit parler Latin ny François. De maniere qu' il fut deux & trois fois chiflé & baffoüé par tout l' auditoire, & par ce moyen contraint de quitter sa place, mais par une voye inacoustumée, & non jamais auparavant pratiquée la resigna à Charpentier, homme non aucunement nourry aux Mathematiques, mais qui d' ailleurs reluisoit en plusieurs bonnes parties, & par ses lectures s' estoit moyenné grand credit dedans l' Université.
Ramus qui en enseignant la jeunesse estoit un homme d' Estat, ne peut souffrir cette injure estre faite à l' Université. Au moyen dequoy il prend cette querelle en main, presente sa requeste à la Cour contre Charpentier, & tout d' une main obtient lettres du Roy, affin que pour obvier aux abus, nul ne fust à l' avenir admis en leur College, qu' il n' eust auparavant suby l' examen en l' art dont il vouloit faire profession. Grande cause, & deux braves champions, qui sans ministere d' Advocats entrerent au champ, en presence du Parlement, & d' une infinité de peuple. En quoy je puis dire, comme celuy qui veis demesler ce fuzeau, que ce fut à bien assailly bien defendu, & à un beau jeu beau retour.
Tous deux parlans Latin, furent ouïs par leurs bouches, avecques une admirable faculté, & facilité de bien dire. Ramus disoit que c' estoit un nouveau monstre qu' on introduisoit en leur compagnie, d' y proceder par resignation, & non par merite. Et chose encores plus monstrueuse, de voir un Sicilien gratifier de cette place un François à luy incognu. Accusant taisiblement qu' en la resignation il y avoit eu bource desliée. Qu' autre chaire n' estoit vacquante par la mort de Pasquier Hamel que celle de Mathematiques, & que le sens commun ne pouvoit porter, que Dampetre aucunement nourry en ce subject eust esté contraint de quiter la partie, par ce qu' il ne pouvoit descouvrir ses conceptions en langue Latine, & qu' il luy eust esté loisible de surroger en son lieu un homme du tout ignorant les Mathematiques, & qui sçavoit seulement parler: partant concluoit à ce que Charpentier ne fust receu, qu' il n' eust esté premierement examiné sur le fait des Mathematiques, & qu' en enterinant les lettres patentes du Roy, le semblable fust à l' avenir observé en la promotion de ceux qui voudroient estre Professeurs du Roy. Contre cecy Charpentier, qui sçavoit se joüer & de sa langue, & de son esprit, ne revoqua du commencement en doubte qu' il estoit peu versé aux Mathematiques, esquelles toutesfois (mettant en jeu la rencontre de Ciceron) si on luy eschauffoit la cervelle il se monstreroit grand Maistre & Docteur passé en trois jours, comme faisant peu de compte, & mettant sous pieds cette objection. Mais pour recompense il coucha principalement de sa personne, que dés & depuis vingt ans en là il avoit bien merité des bonnes lettres dedans l' Université, dont il pouvoit produire pour pieces justificatives, une infinité de tesmoins ses disciples, tous personnages d' honneur & de qualité; que par degrez il avoit acquis quelque nom. Premierement Regent grandement recognu, puis Procureur de sa nation, puis Recteur, & finalement entre ses compagnons avoit sans aucun contredit obtenu le premier lieu de licence en la Faculté de Medecine. Tellement que nul ne pouvoit, ou devoit luy envier ce nouveau grade de Professeur du Roy, & que s' il n' estoit capable pour enseigner les Mathematiques, il y avoit en luy une infinité d' autres subjects dont il pouvoit accommoder le public par ses lectures au contentement d' un chacun. Je vous ay reduit en petit volume les plaidoyez de l' un, & de l' autre, qui toutesfois occuperent l' audience toute une matinée. En fin la Cour, apres avoir veu ces deux champions vaillamment combatre, leur sonna un hola, par un appointé au Conseil, & ce pendant Charpentier ne laissa d' exercer sa charge. Combat qui engendra depuis deux grandes playes. Car Charpentier ayant avecques la resignation de l' Italien couvé dedans son ame une vengeance Italienne six ans entiers, fit ainsi que l' on dit, en l' execution de la journée sainct Barthelemy 1572. assassiner Ramus, par gens de sac & de corde, à ce par luy attitrez. Et depuis, comme nous sommes en un Royaume de consequence, ce qui s' estoit passé par connivence en la personne de Charpentier pour ses merites ouvrit la porte à d' autres, de telle façon que nous avons veu un Professeur du Roy s' estre demis de sa place en faveur du mariage de sa fille, & un enfant fort jeune avoir esté pourveu de la chaire de feu son pere, pour honorer sa memoire, comme si ce fust une chose patrimoniale & hereditaire. Non que je ne les estime avoir esté, & estre gens capables & suffisans aux professions qu' ils ont exercées & exercent; mais la façon ne m' en peut plaire, craignant qu' avecques le temps ces places n' aillent au mespris. Je voy le docte Cardinal du Perron mettre toute on estude au bastiment du College dont je vous ay cy dessus parlé. Dieu vueille que par cy apres ce ne soit un corps sans ame, & un magnifique College de pierres, au lieu de celuy qui fut premierement basty en hommes par le Roy François.
