4. 33. Du droict de Chambellage porté par quelques Coustumes, & dont il procede.

Du droict de Chambellage porté par quelques Coustumes, & dont il procede.

CHAPITRE XXXIII.

Le Chambellage est un droict qui se paye par le vassal au Seigneur feodal, advenant changement de main, ainsi que nous voyons en celles de Meaux, Senlis & Mante, & nommément par celle de Mante, c' est un escu qui est deu au Seigneur, par celle de Senlis vingt sols Parisis, le tout selon les cas plus particulierement specifiez par icelles, mais dont en est peu proceder, & le mot & l' usage? Je vous ay dit au deuxiesme de ces miennes Recherches, qu' il y avoit cinq Estats prés de nos Roys anciennement fort authorisez depuis la venuë de Hugues Capet. Les Chancelier, grand Chambellan, grand Maistre, grand Bouteiller & Connestable. Authorité qui se continua jusques bien avant sous le regne de S. Louys. Or eurent-ils divers droicts qui leur furent diversement attribuez, & entr'autres le grand Bouteiller á chaque mutation d' Archevesque, Evesque, Abbé ou Abbesse, avoit droict de prendre cent sols. Quoy que soit, je trouve au plus ancien Registre de la Chambre des Comptes, intitulé le Livre Croix, que ce droict fut payé à Jean Dacre grand Bouteiller, par les Archevesques de Rheims, Sens, Bourges, Tours, Lyon, & Roüen: Par les Evesques de Langres, Laon, Beauvais, Chaalons, Noyon, Paris, Soissons, Tournay, Senlis, Teroüenne, Meaux, Chartres, Orleans, Auxerre, Troyes, Neuers, Mascon, Chaalon sur Saulne, Autun, Arras, Clairmont, Limoges, Amiens: Abbez de S. Denis, S. Germain des prez, S. Geneviefve, S. Magloire, S. Cornille à Compiegne, S. Medard de Soissons, l' Abbé de Corbie, de Montreil sur la mer, S. Sulpice de Bourges, de Tournay, S. Messan, Ferriere, S. Colombe de Sens, de Valery, de Montigny les Estampes: Abbesses de Cheles, de nostre Dame de Poissy, Montmartre, Faresmoutier. Or tout ainsi que le grand Bouteiller, aussi eut le grand Chambellan un certain droict sur les vassaux qui relevoient nuëment du Roy leurs Fiefs en foy & hommage. Car comme ainsi soit que le vassal se presentant à la Chambre du Roy, pour estre receu en foy, fust introduict par le grand Chambellan, ou autres Chambellans: aussi pour recognoistre cette courtoisie, les vassaux luy faisoient present de certaine somme de deniers. Et comme il advient ordinairement que toutes choses qui sont du commencement introduites de curialité, & comme disent les Ecclesiastics d' une loüable coustume, se tournent par progrez du temps en obligation: Aussi fut-il par arrest de l' an 1272. ordonné que les Chambellans avroient droict de prendre de tous vassaux qui relevoient du Roy vingt sols pour un fief de 50. liures de rente, & au dessous: 50. sols pour un fief qui vaudroit cent liures de revenu, & cent sols, le tout Parisis, pour celuy qui valoit cinq cens liures, & au dessous. Ancienneté que je recueille du registre de S. Just, Maistre des Comptes. De laquelle encores avons nous une remarque en la Chambre des Comptes de Paris, parce que nos Roys s' estans voulu garantir de cette importunité de recevoir entre leurs mains le serment de fidelité de leurs vassaux: & ayans remis cette charge à la Chambre des Comptes lors qu' elle fut establie à Paris, toutes & quantesfois qu' un vassal y est introduit par le premier Huissier, ou son Commis, pour y faire l' hommage, il luy doit certum quid en deniers, que l' on appelle le Chambellage, & ce, à mon jugement, pour autant que ce droict estant deu au Chambellan, parce qu' il introduisoit le vassal au Roy: Aussi les premiers Huissiers faisans le semblable envers la Chambre, ils se feirent accroire que ils devoient joüyr de mesme droict.

Cela soit par moy dit, a fin de ne rien oublier de ce que je pense appartenir au present sujet. Mais pour finir ce Chapitre par où je l' ay commencé, l' une des plus solemnelles foys & hommages, qui fut jamais faicte en France, est celle de François Duc de Bretagne, à nostre Charles VII. en la ville de Chinon, le 14. de Mars 1445. où le Seigneur de Varennes Grand Chambellan fit approcher le Duc, luy disant telles paroles. Monsieur de Bretagne vous faites la foy & hommage lige au Roy vostre souverain Seigneur cy-present, à cause de sa Couronne, de vostre Duché de Bretagne, ses appartenances & dependances, & luy promettez foy & loyauté, & le servir envers & contre tous, sans aucun excepter. 

A quoy le Duc respondit, adressant sa parole au Roy. Monsieur, je vous fais la foy & hommage telle & semblable, que mes predecesseurs Ducs de Bretagne ont accoustumé de faire à vos predecesseurs. Auquel hommage il fut receu en cette façon, & luy en furent decernees lettres. Je vous represente par exprez cet exemple, pour vous monstrer qu' en ces hommages signalez, le grand Chambellan estoit celuy qui avoit la charge d' introduire les vassaux au Roy.

Fin du quatriesme Livre des Recherches.

Chapitre IV. De ce que l' ancien Romain appelloit les Gaulois legers.

De ce que l' ancien Romain appelloit les Gaulois legers.

CHAPITRE IV.

Plusieurs ont attribué au Gaulois une inconstance d' esprit, comme si elle luy fut familiere sur toutes autres nations, par un commandement du Ciel. De ma part, encores que paraventure je ne vueille du tout bannir ce vice de luy (ne m' estant en ce lieu proposé seulement que ce que la verité me dicte) toutesfois il me semble que tels personnages digerent assez cruëment ceste affaire. Car quelquesfois dans Cesar, qui est l' un de nos premiers parrains pour ce regard, il est advenu de nous baptiser de ce nom : au contraire Aurelian Empereur, ainsi que recite Vopisque, escrivant au Senat de Rome: Nous avons, disoit-il, estably sur les marches de delà le Rhin, Lieutenant general pour nous, Postume, lequel aussi nous avons esleu Visempereur des Gaules, digne à mon jugement de la severité du Gaulois, en la presence duquel la Majesté de l' Empire, & le bon droict à chacun sera gardé. Qui monstre que le jugement de tous n' a pas esté en cet endroit d' une mesme façon conforme. Aussi qui recherchera les choses de pres, certainement il verra que ceste legereté improperee au Gaulois, ne luy provenoit point tant d' un cerveau mal arresté, que pour recouvrer ceste premiere liberté que Cesar luy avoit emblee: reputant à liberté, ou de n' être sous une servitude estrangere, ou d' avoir Empereur à sa poste, & qui eust esté fait de sa main. A ceste cause voyez vous bien peu, que ce mesme Cesar nous appelle legers, que tout d' une suitte il ne die, & adonnez à choses nouvelles & mutations. Et semblablement Trebelle Pollion, parlant de la legereté Gauloise, adjouste par mesme moyen, une envie qui nous suivoit continuellement, comme fait l' umbre le corps, de n' obeïr à l' Empire: tellement qu' encor que pour n' être les plus forts, nos entreprises ne reüscissent à bon effect, ce neantmoins aux premieres offres de mutations tousjours nous esbranlasmes nous contre la puissance du Senat Romain. Iaçoit que pour nous alecher & induire plus facilement à leur obeïr, Jules Cesar, comme recite Suetone, & à son exemple quelques autres Empereurs, comme dit Tacite, donnassent à plusieurs Gaulois seance au Senat de Rome. Ainsi lisons-nous que Tibere pour quelque temps Gouverneur des Gaules sous Auguste (car je ne me veux amuser aux revoltes qui se firent sous Jules Cesar) se trouva assez empesché à reduire ceste Province en bon train, pour les divorces qui y sourdoient contre l' Empire par les factions des Potentats. Et peu de temps apres Sacrovir s' y voulut nommer Empereur: comme du temps de Neron, Vindex: dessous Severe, Albin: sous Galien, Postume, Marie, & Victorin: Tetrique, sous Aurelian: Saturnin & Procule, sous Probe: Maxence & Silvain, du temps de Constance: & finalement Constantin & son fils sous l' Empire d' Arcade & Honore, qui fut non loing auparavant le regne & domination des François. De maniere que la Gaule par les Romains subjuguee, servir d' un perpetuel pensement à celuy qui estoit revestu du droict d' Empire par le Senat, pour destourner de luy les embusches d' oysiueté. Tant estoient les Gaulois acharnez au recouvrement de leur liberté: estimans (ainsi que maintenant je disois, & comme font ordinairement tous peuples) être libres s' ils avoient Prince par eux instalé dans leurs pays: ou pour le moins avoir plus facile accés, & ressource à leur pretenduë liberté, si par leur moyen les cartes estoient tousjours broüillees. Et me souvient sur ce mesme propos, que Cesar en quelque passage, attribuant à une legereté d' esprit les rebellions que nous brassions contre luy en ce nouvel envahissement de Province, est contraint en passant de dire, qu' entre les autres occasions de nos revoltes, la principale venoit de ce qu' il nous estoit fascheux de perdre avec nostre liberté la reputation que nous avions acquise par plusieurs siecles de nostre vaillantise & proüesse. Chose, qui aduint mesmement de dire à Caton (afin que paraventure on ne pense que Cesar se vueille donner trop beau jeu) en une harangue qu' il fit au Senat, recitee par Saluste, où il dit que les Grecs en science, les Gaulois au fait des armes & haute chevalerie estoient estimez emporter le dessus de toutes autres nations. Au moyen dequoy ne faut trouver estrange, si les Gaulois se ressentans de leur ancienne generosité, brassoient tousjours nouvelle algarade. Laquelle chose ne venant à bonne assuë, furent pour ceste occasion reputez du populaire Romain, legers.