9. 6. Suite de la fondation de l' Université de Paris.

Suite de la fondation de l' Université de Paris.

CHAPITRE VI.

Lors que les bonnes lettres se voulurent habituer entre nous autres François, nous eusmes quatre braves guerriers qui se mirent sur les rangs, pour attaquer l' ignorance: Un Yve Evesque de Chartres, sous les regnes de Philippes I. & Louys le Gros, un S. Bernard fondateur de l' Abbaïe de Clairvaux, un Pierre Abelard, partie sous Louys le Gros, partie sous Louys VII. son fils. S. Bernard (dis-je) qui se fit ennemy formel d' Abelard, pour quelques propositions erronees qu' il soustenoit: mais au demeurant grand & signalé personnage entre les gens lettrez de son temps. Et outre ces trois, un Pierre Comestor qui vesquit sous le regne du mesme Louys VII. l' an 1178. Quant aux deux premiers, ils n' enseignerent jamais les lettres dedans Paris. Leurs devotes professions vouloient qu' ils residassent, l' un en sa ville Episcopale de Chartres: l' autre en son Abbaïe de Clairvaux, sinon lors que les affaires publiques de l' Eglise & du Royaume les contraignoient de s' en dispenser. Car quant à Pierre Comestor, i meit en lumiere son Histoire Ecclesiastique l' an 1172. & y a quelque apparence qu' il enseigna les bonnes lettres en l' Eglise de sainct Victor, où il est enterré. Quoy que soit son Epitaphe qui y est porte ces mots.

Petrus eram, quem petra tegit, dictusque Comestor,

Nunc comedor, vivus docui, &c.

Dernieres paroles qui me font croire qu' outre les livres par luy composez, il estoit monté en chaire pour enseigner la jeunesse.

Or de ces quatre grands personnages, Abelard est celuy qui sans doubte leut dedans Paris avec honneur, accompagné toutesfois de tant de traverses, qu' il fut contrainct de quitter la partie, se faisant Religieux profez de sainct Denis. Et comme il estoit d' un esprit versatil; aussi changea il depuis de diverses demeures sur nouvelles occasions; ores par necessité en la ville de Soissons, ores pour sa commodité en Champagne, où il fonda l' Abbaïe du Paraclit, puis en Bretagne où il fut esleu Abbé, & finalement au Monastere de Clugny, où il trouva la fin de sa vie, & de ses maux l' an 1142. C' est de luy mesme dedans les Epistres duquel nous trouvons quelques eschantillons, qui nous servent d' instructions & memoires pour cognoistre en quel estat estoient lors les Escoles de Paris, quand il y vint pour estudier. Car à vray dire nous serions lourches sans luy, au recit de l' ancienneté, dont je vous ay cy-dessus parlé. Auquel temps la Republique des Arts n' estoit encore en essence sous le nom d' Université. Vray qu' elle croissoit & augmentoit grandement d' Escoliers, estudians diversement selon leurs capacitez, qui de Grammariens, qui de Philosophes & Artiens, & qui de Theologiens. Pour ceste cause, a fin de descharger de leçons la maison Episcopale, on choisit le lieu plus proche & contigu d' icelle. Ce fut l' Eglise S. Julian, lors en venerable reputation, comme celle qu' on reputoit fille de la grande Eglise, par le consentement du Roy Louys VII. n' y ayant qu' un petit trajet d' eau à traverser de l' une à l' autre sur un pont, qui dés le regne de Philippes Auguste fut appellé Petit-pont. Ainsi apprenons nous de Rigord qui estoit du temps de luy, & fit l' histoire de sa vie apres son decez, que l' an 1206. il y eut une grande inondation de la riviere de Seine qui rompit trois arches du Petit-pont de Paris. Tres arcus parvi pontis fregit, & quamplures domos ibidem evertit. Par ainsi furent nos Escoles my-parties en deux. Dont celles de la Theologie demeurerent en la maison Episcopale, son originaire demeure, & celles tant de l' Humanité que Philosophie, au Prioré de S. Julian. Et fut la cause pour laquelle, par les Escoliers qui lors estudioient aux Arts furent leurs Recteurs esleus à S. Julian, & nul Docteur des Facultez de Theologie, Decret, Medecine, ne fut jamais esleu, ny ne pretendit pouvoir estre appellé à cette dignité de Recteur. Coustume qui s' est depuis continuee, & perpetuee jusques à nous. Et est une chose digne d' estre remarquee, qu' en ce mesme lieu se faisoit l' acte le plus solemnel pour les Arts. Ce que j' apprens d' un article de la reformation de l' Université faite par Jean Cardius d' Estouteville sous le titre des Artistes, qui est tel.

Item statuimus, & mandamus, ut actus ille solemnis, de disputatione quodlibetorum, qui dudum ad decus facultatis, exercitium studiorum, ac ingenia excitanda, fuit nobiliter institutus, observetur. Mandantes id in vim sanctae obedientiae, exercitium, iuxta veterem morem, apud sanctum Iulianum, omni excusatione postposita, reintegrari, & renovari, per praestantes ipsius fatultatis magistros, per singulas nationes eligendos. Qui nous monstre que cette Eglise fut du commencement le premier lieu, où les Maistres és Arts faisoient leurs premieres leçons, & exercices des lettres humaines. Vray que cela ne dura pas longuement: D' autant que nostre Université s' estant enflee, & accreuë en grand nombre d' Escoliers François, Picards, Normands, & Anglois, sous lesquels plusieurs nations estoient comprises, furent basties quatre grandes Escoles en leur faveur, sous le nom de Salles de France, Picardie, Normandie, Angleterre, & depuis furent ces dernieres intitulees d' Allemagne, comme je deduiray en son lieu: Escoles qui furent basties en la ruë au foüerre, non grandement esloignee de l' Eglise de S. Julian: Esquelles salles se firent de là en avant les lectures, tant en humanité, que Philosophie.

Quelque peu apres fut introduite la Faculté de Medecine, qui choisit son domicile non loing de la ruë au foüerre, & d' une mesme suite fut bastie l' Eglise en l' honneur de S. Nicolas ancien patron des Escoles, & le College des Bernardins, auquel se firent les anciennes assemblees, concernans les grandes consultations, comme nous apprenons des advis qui furent baillez à Messieurs de l' Université de Rouen, au procez faict à Jeanne, dite la Pucelle d' Orleans, le College des bons enfans: maison destinee pour ceux qui voudroient avoir part aux leçons qui se faisoient à sainct Victor: & combien qu' avecques le temps la Faculté de Decret fust logee au Clos Bruneau, comme nous voyons; toutesfois la verité est, que nos Escoles qui depuis prindrent le nom d' Université, ne gisoient que en cette basse liziere, que vous voyez se maintenir de l' une à l' autre, nostre Dame, Sainct Julian, ruës au Foüerre, de la Bucherie, jusques à l' Abbaïe de sainct Victor, hors les murs. Et n' avoient lors nos Escoles rien de commun avecques cette grande Montagne de saincte Geneviefve, & S. Jacques, & ruë de la Harpe, où les Muses se vindrent apres heberger: Chose mesme dont je pense avoir certain tesmoignage d' Abelard, lequel se voyant par le moyen d' une sienne maladie, chassé de la chaire qu' il pensoit luy appartenir en la maison Episcopale, pour se revanger de l' injure, qu' il pretendoit luy avoir esté faite: Extra civitatem (dit-il) in monte sanctae Genouefae, scholarum nostrarum castra posui, quasi eum obsessurus, qui nostrum occupaverat locum. L' Université n' estoit pas encore bastie, ains seulement commençoit de poindre. Mais le lieu dont Abelard avoit esté exterminé, estoit la maison Episcopale, premier fondement de nostre Université qui fut puis apres: & le lieu auquel malgré ses ennemis il continua ses leçons fut pres de S. Geneviefve. Qui nous enseigne presque que ce lieu estoit auparavant inaccoustumé aux lectures. Verité est que depuis se trouvans plusieurs personnages d' honneur, qui voulurent edifier des Colleges pour l' instruction de la jeunesse, ils choisirent le haut de cette montagne, comme celuy qui seroit à l' advenir un Parnasse de nostre France, auquel ils estimerent y avoir plus d' asseurance pour la santé. Qui fut une nouvelle police d' estude, aucunement prejudiciable à l' ancienne institution. Discours que je me reserve par autres chapitres, apres que j' auray deduit ce que je pense de l' ancienne institution.

9. 5. Premiere institution & progrez de l' Université de Paris, & de son ancienne situation.

Premiere institution & progrez de l' Université de Paris, & de son ancienne situation.

CHAPITRE V. 

Quant à moy suivant ce que je vous ay discouru par le precedant Chapitre, rejettant la fondation telle qu' est la commune ignorance, nous devons à mon advis tous estimer, que l' Université de Paris n' a esté jettee en moule tout d' un coup, & est une chose digne d' estre remarquee, qu' encore que l' usage des Universitez ne fust en ceste France du commencement, pour les longues guerres qui y estoient survenuës, & avoient troublé l' Estat ancien & ordinaire des Gaules: si est-ce que d' une bien longue ancienneté, il n' y avoit Eglise Cathedrale, en laquelle n' y eust une prebende affectee, pour le salaire de celuy qui enseigneroit les lettres ordinaires, & une autre pour celuy qui vacqueroit à l' enseignement de la Theologie. Le premier estoit appellé Escolatre, le second Theologal. En quelques Eglises n' y en avoit qu' un pour l' espargne, & és autres, deux. Du commencement ces places estoient baillees à personnages de merite, qu' on recherchoit par honneur, & se sentoient les Doyen, Chanoines & Chapitre bien honorez, quand ils en avoient pourveu un homme sortable. Mais comme par malheur, il advient ordinairement que tous mauvais exemples prennent leur source avecques le temps de beaux & loüables pretextes, aussi advint-il au cas qui s' offre, que peu à peu ceux qui desiroient entrer en ces grades, estoient contraincts avant que d' y estre admis, faire presens par forme de proficiat & gratification à uns & autres Chanoines, qui avoient plus de voix & creance en Chapitre pour la nomination. Qui estoit une vraye corruptelle, revestuë du masque de loüable coustume. Et de cet abus est parlé au Concil de Latran, tenu souz le Pape Alexandre troisiesme en un article qui s' adresse expressément à nostre Eglise Gallicane, qui est tel: Quanto Ecclesia Gallicana, maiorum personarum scientia, & honestate praefulget, &c. Article depuis transplanté mot pour mot aux Decretales de Gregoire neufiesme, chapitre Quanto de Magist. Ext. Et est cette mauvaise coustume condamnee par ce Concil, & ceux-là anathematizez qui de là en avant en useroient.

Ny pour tout cela vous ne trouverez en tout ce Concil estre parlé d' aucune Université chez nous: Et est advenu que toutes nos Universitez qui se trouvent en nostre France, elles ont esté depuis establies en nos Eglises Archiepiscopales, ou Episcopales: horsmis celle de Caen, qui ne fut institution Françoise, ains Anglesche, souz le peu de temps que le jeune Roy Henry sixiesme vint en France. Chose que je ne dis pas pour vilipender ce College, auquel se trouvent plusieurs gens d' honneur y avoir siege: ains pour dire ce qui est de la verité de l' Histoire.

Or les choses se passans de cette façon, je ne doute point que nostre Paris estant d' une longue ancienneté la ville metropolitaine de la France, & siege ordinaire de nos Rois, ainsi tant pour la commodité, & situation du lieu, que respect qu' on luy portoit, les gens plus doctes ne s' y habituassent, & ne desirassent d' avoir l' une de ces deux chaires, pour faire diversement monstre & banniere de leur sçavoir: Et qu' à cet effect, la maison Episcopale fut expressément choisie, long temps auparavant que l' Université eust esté creée. En quoy je pense avoir Pierre Abelard pour mon garand, grand personnage de son temps, s' il ne se fust trop flaté. Cestuy au recit qu' il fait de ses tribulations, en une longue Epistre Latine, nous dit que sur son jeune aage, il abandonna pere, mere, freres, & sœurs, & toute esperance de successions, tant directes que collaterales, pour s' habituer dans Paris, où les bonnes lettres commençoient de se loger, & que là il y avoit en la maison de l' Evesque deux doctes personnages, qui y faisoient lectures publiques. Un Guillaume de Champeau Archidiacre de Paris, qui s' estoit rendu admirable en l' explication de Priscian, & de la Philosophie, & avecques luy un Anseaulme, qui enseignoit la Theologie. Par cela nous n' apprenons pas que les Escoles de Paris fussent establies vers l' Eglise de nostre Dame. Mais comme Abelard nous discourant ses malheurs, il n' oublie rien en l' histoire de sa vie de ce qui fait, tant à son advantage que contre, aussi adjouste-il que quelques jours apres sa venuë, il avoit gaigné telle vogue sur ces deux precepteurs, qu' il leur faisoit à bonnes enseignes contraste. Au moyen dequoy y ayant lors une jeune fille nommée Heloïse tres-docte, qui se tenoit au cloüestre, chez Foubert son oncle, (quelques uns le disent pere) Chanoine de nostre Dame, il fut par luy prié de faire leçon à sa niepce, dedans sa maison, dont Abelard ne l' esconduit. Parce (dit-il) que la maison du Chanoine, Scholis nostris proxima erat. Passage dont je recueille, que c' estoit en la maison Episcopale, qu' on exerçoit les estudes, tant de Grammaire & Philosophie, que de la Theologie. Qui fut cause que les Libraires se vindrent loger là aupres. Ce dont nous avons encore veu de nostre temps quelques restes, & apparceuances en la ruë de nostre Dame non esloignee de cette Eglise.

Or les Estudes s' y estans de cette façon plantees, elles commencerent peu apres de s' apprivoiser du Monastere de Sainct Victor: Pour laquelle ancienneté recognoistre, outre ce que j' ay remarqué en mon troisiesme Livre, encore pensé-je estre indubitablement assisté de deux notables passages. Le premier d' un vieux Religieux de Jumege, qui fit quelques additions sur la Cronique de Sigebert: le second du mesme Abelard. Eodem tempore (dit le Religieux) quo ordines Cisterciensis, & Charthusiensis fuerunt creati, Magister Guillelmus de Campellis, qui fuerat Archidiaconus Parisiensis, vir admodum litteratus ac religiosus, assumpsit habitum Canonicis regularis, cum aliquibus suis discipulis, extra urbem Parisius, in loco ubi erat capella sancti Victoris Martyris. Assumpto autem illo ad Episcopatum Catalaunensem, Venerabili Gilduinus eius discipulus, primus Abbas ibi factus est. Par ce passage vous voyez que Champeaux qui s' estoit acquis tant de bruit dedans l' Eglise de Paris, quitta & son Archidiaconé, & sa robe seculiere, pour espouser une vie Monastique, avecques quelques siens Escoliers en la Chappelle sainct Victor, mais non que l' on y enseignast les bonnes lettres: Ce doubte vous sera levé par Abelard, au passage par moy, non entierement preallegué: Perveni tandem Parisius (dit Abelard) ubi idem maximè disciplina haec (il entendoit parler de la Philosophie) florere consueverat, ad Guillelmum scilicet Campellensem, praeceptorem meum in hoc Magisterio, re, famáque praecipuum. Et peu apres: Elapsis autem paucis annis, cum ex infirmitate iamdudum convaluissem, praeceptor ille meus, Parisiensis Archidiaconus habitu pristino renunciato, ad Regularium ordinem se contulit. Non tamen hic profeßionis habitus, aut ab urbe Parisiensi, aut à consueto Philosophiae studio substraxit, sed in ipso quoque Monasterio, ad quod se contulerat, statim more solito, publicas exercuit Scholas. Vous voyez que combien que Champeaux eust changé sa vie seculiere en reguliere, cela n' empescha pas qu' il ne continuast ses lectures anciennes en son nouveau Monastere de S. Victor, tout ainsi qu' auparavant en nostre Dame. Et à tant que les bonnes lettres furent en mesme temps enseignees en ces deux venerables maisons: mais qu' elles avoient pris leurs premieres nourritures en celles de nostre Dame.

Quelques uns paravanture trouveront mauvais que j' attribuë l' ouverture des Religieux de sainct Victor à Guillaume de Champeaux, laquelle par la voix commune du peuple, est attribuee à nostre Roy Louys le Gros, sixiesme de ce nom. Opinion qui n' est pas de prime face sans quelque apparence de verité. Car le mesme Roy par ses lettres en forme de Chartres de l' an mil cent treize, disoit que par l' advis de plusieurs Prelats & Seigneurs de son Conseil: In Ecclesia Beati Victoris, quae iuxta Parisiorum civitatem sita est, Canonicos regulariter viventes ordinari volui. Dementant par ce moyen, tant le Religieux de Jumege, qu' Abelard. Toutesfois il est certain que cette Eglise avoit esté auparavant reduicte en forme de Prioré par Champeaux, & quelques uns de ses Escoliers. A quoy le Roy Louys le Gros voulut apporter plus d' estoffe, comme vous pourrez voir par les mesmes lettres, esquelles il use de ces mots Dotavi, & ditavi: & non pas qu' il l' eust premierement fondee. Mais au lieu de Prieur il y establit un Abbé, comme nous apprenons de son Epitaphe, qui est au Cloüestre, joignant la porte de l' Eglise.

Insignis genitor Ludovici, Rex Ludovicus, 

Vir Clemens, Christi servorum semper amicus, 

Instituit, fecit, Pastorem Canonicorum.

In cella veteri, trans flumen Parisiorum.

Plus fidele commentaire ne pourriez vous avoir que cestuy, pour monstrer que Louys le Gros ne fut le premier fondateur, ny de cette Eglise, ny des Chanoines reguliers d' icelle, ains seulement de l' Abbé. Vray que l' Eglise S. Victor estant auparavant bastie, accompagnee de ses Religieux, le Roy Louys le Gros la fit de fonds en comble reedifier, dit un vieux Historiographe, qui n' a point inseré son nom. A quoy nous adjoustons que celuy qui premier en porta le tiltre d' Abbé, fut Gilduin l' un des principaux disciples de Champeaux, lors que son precepteur fut creé Evesque de Chaalons. Ce Roy fut le premier de la famille des Capets, qui meit (si ainsi me permettez de le dire) nos Rois hors de page. Car comme ainsi fust que sous ce nouveau changement de lignee souz Hugues Capet, plusieurs grands Seigneurs se fussent par un droit de bien-seance accommodez du bien de l' Eglise, ce Roy les sceut si bien mener à raison, qu' en fin de jeu toutes ces places mal prises furent renduës, & remises en leur premiere nature. Et pour cette cause dit Guillaume de Nangy en ses Annales de France, il fut appellé le Batailleux. Les belles victoires qu' il obtint, non seulement contre ces seigneurs mal-gisans, ains contre tous ses ennemis, furent cause à mon jugement, que par la rencontre du nom, il choisit ce Monastere S. Victor, & qu' il le dota de plusieurs grands biens, & prerogatives, pour luy servir à l' advenir de trophee. De maniere que la pauvreté en estant tout a fait bannie, & par consequent la necessité & disette, adoncques commencerent les Religieux à espandre successivement leurs semences: Uns Hugo, Adamus, Riccardus, Accordus, Galterus, Godofridus, Garnerius, Absalon, Leoninus, & plusieurs autres Religieux de mesme paste, par le moyen desquels l' Université s' accreut grandement avecques le temps. 

9. 4. Que l' opinion est erronée, par laquelle on attribuë l' institution de l' Université de Paris à l' Empereur Charlemagne.

Que l' opinion est erronée, par laquelle on attribuë l' institution de l' Université de Paris à l' Empereur Charlemagne.

CHAPITRE IV.

He vrayement ce n' est pas un petit honneur à cette noble Université, si elle a eu pour parrein l' Empereur Charlemagne, qui luy ait donné ce nom; quoy que soit qu' il ait esté dedans Paris le premier Autheur & Promoteur des bonnes lettres. De mesme façon vois-je qu' on luy attribuë l' Institution, & de nos Parlemens, & de nos douze Pairs de France. Luy (dis-je) qui fut premierement Roy de France, puis Patriciat de Rome, & de toute la Lombardie, & finalement Empereur de tout l' Occident. Tant y a qu' il se veit commander absolument à la France, Italie, & Allemagne. Il estoit vrayment grand Prince, personnage d' esprit, bien nourry és bonnes lettres, grand Capitaine & guerrier, a l' espee duquel nostre Royaume de France doit beaucoup; mais j' ose dire que sa memoire n' est moins obligee à nos plumes. Car quant à moy j' estime, que ny l' Ordre des Parlemens, ny des Pairs ne luy est deu, comme j' ay amplement verifié par parcelles dedans mon second Livre, ny aussi de l' Université de Paris, ainsi que j' ay amplement discouru au vingt-troisiesme chapitre du troisiesme. Toutesfois d' autant que ce Livre est expressément dedié pour la deduction des Universitez de la France, je donneray à cette nouvelle opinion plus d' air, contrevenant à l' ancienne. Les deux premiers que je vois de nostre temps, ou quelque peu auparavant n' avoir voulu adherer à Vincent, Gaguin, Gilles, & autres, sont Paule Emile, & Messire Jean du Tillet Evesque de Meaux, l' un en son Histoire generale de nostre France, l' autre en sa Chronique abregee. Deux personnages dont je fais grand compte en ce subject, & m' asseure qu' ils n' eussent oublié de faire mention de cette opinion, si par leurs estudes & recherches ils l' eussent trouvee veritable. Ils ne l' ont expressément contredite; ains seulement teuë, j' ay voulu dire sagement, monstrant par cette sagesse, qu' ils n' y adjoustoient aucune foy. Je suis le moindre des moindres: mais je pense avoir esté celuy, qui premier levay la paille en cet endroit l' an 1564. quand en ce grand theatre de la Cour de Parlement de Paris, en presence d' une infinité de gens de lettres plaidans pour l' Université de Paris, contre les Jesuites, apres avoir faict mon preambule, tel que je pensois necessaire, je commençay le demeurant de ma narration par ces mots. 

L' Université de Paris, soit qu' elle ait pris son commencement sous le grand Empereur Charlemagne (ainsi que le vulgaire de nos Annales estime) ou sous ce grand Philippes Auguste, sous lequel les bonnes lettres prindrent leur grand advancement & progrez, specialement en cette ville, par le moyen de Messire Pierre Lombard, Evesque du lieu, (en faveur duquel nous celebrons tous les ans un Anniversaire dedans l' Eglise sainct Marcel) a tousjours esté grandement cherie, aimee, & favorisee de nos Roys. Je me fermay en cela pour cet esgard: car ce n' estoit mon intention d' en discourir. Et a fin que ne pensiez que ce fust par nouvel esprit de contradiction que j' entray deslors en ce nouveau party, je sçay quel honneur je dois porter à une opinion commune, mais aussi sçay-je bien que la verité doit estre beaucoup plus honoree. Et pour cette cause je vous diray encore un coup que ce ne nous seroit pas un petit Autheur de nostre Université que Charlemagne: toutesfois je ne voy, ny qu' Aimoïn, ny Rheginon, ny Adon, ny Sigebert en facent aucune mention (car quant à l' Histoire de Turpin, c' est une Histoire supposee, & neantmoins encore n' en parle t' elle point.) Chose que non seulement ils n' eussent escoulé sous silence, mais l' eussent pris à nostre tres-grand honneur, s' estans arrestez par leurs œuvres à plusieurs parcelles, qui ne sont de tel merite que cette-cy. Mesme que Eghinard qui se dit avoir esté son Secretaire, semble avoir laissé aux autres Historiographes la deduction des exploits militaires de cet Empereur, & pris pour son partage seulement ce qui regarde le sçavoir & bonnes lettres qui estoient en cet Empereur, nous discourant qu' il avoit esté nourry, non seulement en sa langue naturelle, mais aussi en plusieurs estrangeres; Et specialement que la Latine luy estoit aussi familiere que sa langue maternelle: Et quant à la Grecque qu' il l' entendoit, ores qu' il ne la sceust prononcer, comme pareillement il avoit esté instruit en la Grammaire, & aux arts liberaux, premierement par Pierre Pisan, puis par Albin, surnommé Alcuin, voire avoit l' intelligence de l' Astronomie. Qu' il fit la vie des Roys de France en vers: donna à son vulgaire les noms des mois & des vents: Qu' à ses repas, pour ne perdre le temps, il se faisoit lire ou reciter quelque belle histoire: Bref estant la plus belle remarque dont Eghinard embellisse la vie de Charlemagne, que le soing qu' il avoit eu aux bonnes lettres & sciences; je ne me puis persuader, qu' il n' eust à la queuë de cecy parlé de cette Université, s' il en eust esté fondateur, tant pour la dignité du lieu, où elle eust esté establie (ancien sejour de nos Roys de France, dés l' advenement de Clovis) que pour l' excellence mesme d' un tel œuvre. Estant la plus belle closture que cet Historien eust peu adjouster à la suite de cette belle narration. J' ay dit tout cela en mon 3. Livre, je le repete mot pour mot, & paravanture la repetition n' en sera frustratoire & oiseuse, ayant à desraciner l' opinion fabuleuse de nostre Vincent de Beauvais. Ce que je vous verifieray encore amplement par un passage exprez des Constitutions de Charlemagne, & Louys le Debonnaire son fils, au 2. Livre article 5. où le Debonnaire escrit en cette façon aux Evesques qui habitoient en ses Provinces. Scholae sanè ad filios instruendos, vel edocendos, sicut nobis praeterito tempore, ad Attiniacum, promisistis, & vobis iniunximus, in congruis locis, ad multorum utilitatem & profectum, vobis ordinari, non negligatur. 

Il estoit Roy & Empereur, & comme tel desiroit qu' on establist Escoles en divers lieux, l' avoit auparavant, comme il dit, commandé. Commandement qu' il reïteroit par expres: Croyez que si cette mesme institution eust esté auparavant faite dedans Paris par l' Empereur son pere, il n' eust pas espargné cet exemple pour exciter ceux ausquels il avoit affaire, pour estre induits à luy obeïr.

J' adjouste que Charlemagne fit tenir pendant son Empire cinq Concils, à Majence, Rheims, Tours, Arles, & Chaalons sur Saone, & apres son decez Louys le Debonnaire son fils, puis Charles le Chauve son arriere-fils plusieurs autres, en tous lesquels nulle mention de cette Université, ny des Escholes qui y furent lors, ny depuis dressees. Car quant à tous les autres Roys qui sont venus depuis le Roy Louys le Gros, vous ne trouvez que chamaillis, coups d' espees, & à peu dire images des Rois, jusques à la venuë de Hugues Capet, & encore moins aucun soucy des sciences, non pas mesmes sous les mesmes Capet, Robert, Henry, Philippes premier de ce nom. Il estoit question d' assassiner un vieux Estat, & en asseurer un nouvel, puis de faire nouvelles conquestes au Levant sur les Sarrazins. En tous les livres qui ont esté diversement escrits de ce qui estoit de ce temps là, vous ne trouverez un seul mot de ces pretenduës Escoles. Qui me semblent grands arguments, pour monstrer que ce que l' on dict de Charlemagne, & de l' Anglois, & des Escossois est une Histoire fabuleuse. Singulierement eu esgard que tout ce que j' ay deduit cy-dessus prend sa source, dés & depuis Charlemagne sans discontinuation, & si ainsi me permettez de le dire de fil en aiguille, jusques à nostre Philippes II. qui fut le quatriesme Roy successif de nostre troisiesme lignee. Au contraire le plus ancien auquel nous sommes redeuables de cette creation faite par Charlemagne, c' est à Vincent de Beauvais, Religieux de l' Ordre des Freres Prescheurs de sainct Dominique, qui nasquit en Espagne l' an 1205. & mourut l' an 1258. Au regard de Charlemagne, qui nasquit l' an 742. & mourut l' an 814. Prenez tout cet entrejet de temps de sa nativité jusques à son decez, & le joignez à celuy de Vincent, vous y trouverez quelques quatre cens ans d' intervalle que plus que moins. Et luy mesme recognoist ne la tenir que d' une Cronique d' Arles, qui est sans nom, & depuis s' est avecques le temps perduë. Joint que je fais grand estat d' un Paule Emile, d' un Jean du Tillet Evesque, Jean du Tillet Greffier au Parlement son frere, Claude Fauchet premier President des Monnoyes, qui n' ont rien ignoré de nostre Histoire, & neantmoins passent ce present discours sous silence. Et ores que Pierre Maçon, & Jean de Serre, facent Charlemagne fondateur, l' un & l' autre oublie le compte des Moines Escossois: & signamment de Serre apres avoir sur le commencement de la vie, dit en passant que Charlemagne avoit esté fondateur de nostre Université, & poursuivant puis apres d' un long discours toute cette histoire, il ne touche un seul mot concernant cette fondation, non plus que Belle-Forest. Il n' est pas que Veigner au second Tome de son Histoire, apres avoir fait contenance de favoriser cette opinion, la contredit immediatement en l' article subsequent. Antoine l' Oisel Advocat, en son plaidoyé concernant la Collation de l' Eglise Parrochiale de Sainct Cosme & Sainct Damien, la soustint formellement estre supposee. Comme j' avois fait auparavant en l' an 1564. & depuis par le 23. chap. de mon 3. Livre, lequel vous pourrez pareillement voir, comme y estans plusieurs autres raisons deduites, que je n' ay icy touchees. Partant mettez en la balance les deux opinions qui regardent cette fondation, vous trouverez que celle qui est pour la negative est la meilleure. Voyons doncques maintenant quelle fut l' Institution & progrez de cette Université.