8. 60. Villon, Villonner, Villonnerie.

Villon, Villonner, Villonnerie.

CHAPITRE LX.

Peu de Villons en bon sçavoir, 

Trop de Villons pour decevoir.

Dit Clement Marot, au commencement de quelques oeuvres de François Villon, qu' il corrigea. Quant au premier vers, je n' en puis demeurer d' accord, quant au second, je luy en passe condemnation. Marot estoit un bel esprit nourry en la Cour de nos Roys, né dés le ventre de sa mere pour faire des vers François: Mais homme qui n' eut plus de sçavoir acquis que ce qu' il en falloit pour sa portee. C' est pourquoy il admire en Villon un sçavoir qui ne gisoit qu' en apparence. Bien rencontra-il heureusement quand il dit, n' y avoir que trop de Villons pour decevoir. Car, Villon fut un Escolier de Paris, doüé d' assez bel esprit, mais un maistre passé en friponneries. On dit en commun proverbe, de telle vie, telle fin. Cela se trouve presque verifié en luy. Lisez la plus grande partie de ses oeuvres, il fait trophee de ses tromperies, esquelles il estoit un superlatif, aussi eut-il presque une mort de mesmes, si nous croyons à ce quatrain qu' il fit de luy.

Je suis François dont ce me poise, 

Né de Paris, prés de Pontoise, 

Or d' une corde d' une toise 

Sçavra mon col que mon cul poise.

C' estoit qu' il avoit esté condamné d' estre pendu & estranglé par sentence, dont il appella en la Cour de Parlement, & pendant sa cause d' appel fit un Epitaphe de luy & de ses complices, en forme de Balade: & deux autres, l' une sur l' appel qu' il avoit interjetté, & l' autre qu' il presenta à la Cour de Parlement. Si ce qu' il raconte de soy fut executé, je ne voy nul subject de rire: Si pour se joüer de sa plume, encores y avoit-il moins d' occasion de l' escrire. Car il pouvoit donner carriere à son esprit en plusieurs autres matieres, sans nous laisser en suspens, sçavoir s' il fut pendu ou non: Quant à moy pour le peu d' interest que j' y ay, je ne m' en donne pas grande peine. Quelques uns disent que le Roy Louys unziesme luy sauva la vie: Qu' il ait esté un bon fripon, qui en friponnant faisoit profession expresse de tromperie & larcin, il n' en faut meilleur tesmoignage que cestuy. D' autant que la posterité a nommé un Villon, celuy qui eshontement se mesloit du mestier de trompeur, dont aussi nous fismes Villonner, & Villonnerie: Mots qui tombent aussi souvent en nos bouches pour tel subject, comme le Patelin, Pateliner, & Patelinage, celuy qui par beaux semblans & douces paroles engeaule quelqu'un.